ម៉ុត ខ្លឹមខ្មៅ អ្នកប្រដាល់ក្លិបអាណាចក្រគុនខ្មែរ ដែលជាអតីតម្ចាស់ខ្សែក្រវាត់លីអូ និងស្រាបៀរកម្ពុជា ហើយក៏ធ្លាប់ផ្ដួលអ្នកប្រដាល់ថៃអស់ជាច្រើននាក់មកហើយនោះ ពេលនេះបានត្រូវអ្នកប្រដាល់ថៃកេងកាត វ៉.ស៊ូងនឹន( Kengkat Wor.Shungnuen) វាយឲ្យសន្លប់ក្នុងទឹកទី៤ កាលពីយប់ថ្ងៃទី០៨ ខែកុម្ភៈ ឆ្នាំ២០១៩ នៅលើសង្វៀនគូបូតាបាយ័នស្ទឹងមានជ័យ។
ខ្លឹមខ្មៅ ចាញ់ក្រោមជង្គង់របស់កេងកាត វ៉.ស៊ូងនឹន ដែលបានអុកត្រូវពោះទឹករបស់គេជាច្រើនជង្គង់ ធ្វើឲ្យ មុត ខ្លឹមខ្មៅ ដួលចុកឆ្អល់លើរេញ ហើយទោះបីអាជ្ញាកណ្ដាលរាប់ដល់ដប់ហើយក្តី ក៏គេមិនអាចបន្តការប្រកួតទៀតបានដែរ។
ស្ថានភាពប្រកួតក្នុងទឹកដំបូង មុត ខ្លឹមខ្មៅ គេបានធ្វើឲ្យអ្នកប្រដាល់ថៃកេងកាត ភ័យលួសព្រលឹងម្តងៗដែរ តាមរយៈការប្រើកែងវាយទៅលើកេងកាត ប៉ុន្តែខ្លឹមខ្មៅវាយល្អបានតែពីរទឹកដំបូងប៉ុណ្ណោះ ។ មកដល់ទឹកទី៣និងទឹកទី៤ ខ្លឹមខ្មៅ ស្រុតធ្លាក់កម្លាំង នាំឲ្យកេងកាត គេសម្រុកចូលវាយជង្គង់ដែលធ្វើឲ្យខ្លឹមខ្លៅការពារមិនបាន ក៏ត្រូវជង្គង់សន្លប់តែម្តង។ អ្នកប្រដាល់ ម៉ុត ខ្លឹមខ្មៅ និង កេងកាត វ៉.ស៊ូងនឹន ជួបប្រកួតគ្នាក្នុងទម្ងន់៦៧គីឡូក្រាម។
កេងកាត វ៉.ស៊ូងនឹន ជាអ្នកប្រដាល់ថៃជើងចាស់និងធ្លាប់ឡើងមកប្រកួតនៅកម្ពុជាច្រើនលើកហើយកន្លងមក។ អ្នកប្រដាល់ថៃរូបនេះ តាមអ្នកផ្គូផ្គងឲ្យដឹងនោះថា គេជាជើងខ្លាំងមួយរូបដែរនៅស្រុកថៃ ហើយគេជាជើងឯករងខ្សែក្រវាត់Wurkz ទម្ងន់៦៧គីឡូក្រាម ក្រោយពីប្រកួតផ្ដាច់ព្រ័ត្រចាញ់ មាជ សុខរ៉ា អ្នកប្រដាល់ក្លិបពុទ្ធសេរីវង្សកីឡាដោយពិន្ទុនោះ។ បន្ទាប់មក កេងកាត វ៉.ស៊ូងនឹន បានមកប្រកួតសងសឹកវិញ និង បានផ្ដួលយកឈ្នះ មាជ សុខរ៉ា ក្នុងទឹកទី៥ កាលពីថ្ងៃទី១៣ ខែមករា ឆ្នាំ២០១៩ នៅសង្វៀនស្ទឹងមានជ័យនេះ។
ចំពោះ មាស សារ៉ាក់ អ្នកប្រដាល់ក្លិបអាណាចក្រគុនខ្មែរ ដែលត្រូវគេផ្គូឲ្យជួបប្រកួតជាមួយអ្នកប្រដាល់ថៃចំណូលថ្មី បូវី ព្រហ្មថាន់ចៃ (Bovi Prumthanchai) ក្នុងទម្ងន់៦០គីឡូក្រាមនោះ គឺ សារ៉ាក់ វេទនាមែនទែន ដោយត្រូវអ្នកប្រដាល់ថៃរូបនោះ វាយដូចបាវសាក់។ សារ៉ាក់ ត្រូវអាជ្ញាកណ្ដាលរាប់៨ ដល់ទៅ២ដង ក្នុងទឹកទី៣ម្តង និងទឹកទី៤ម្តង ដោយសារត្រូវជង្គង់របស់ បូវី ព្រហ្មថាន់ចៃ។ តែយ៉ាងណា មាស សារ៉ាក់ បានខំប្រឹងប្រកួតរហូត ដល់ចប់ទឹក៥ និងចាញ់បូវី ត្រឹមពិន្ទុប៉ុណ្ណោះ។
សូមបញ្ជាក់ថា មាស សារ៉ាក់ ជាអ្នកប្រដាល់ជើងខ្លាំងចាស់វស្សាម្នាក់។ គេជួបប្រកួតជាមួយថៃចុងក្រោយនេះ គឺបានផ្ដួលអ្នកប្រដាល់ថៃ ស៊ុបពើបាស ថ.ត គុតណាមសៃ ក្នុងទឹកទី១ប៉ុណ្ណោះ កាលពីថ្ងៃទី០១ ខែកុម្ភៈ ឆ្នាំ២០១៩កន្លងទៅនេះ។ ដោយសារតែថ្វីដៃល្អបែបនេះ ទើបគេផ្គូឲ្យជួបប្រកួតជាមួយថៃ បូវី ព្រហ្មថាន់ចៃ នៅពេលនេះទៀត។ ប៉ុន្តែសារ៉ាក់ ទៅមិនរួចជាមួយ បូវី ព្រហ្មថាន់ចៃ នោះឡើយ។
ចំពោះការប្រកួតរវាងអ្នកប្រដាល់រួមជាតិវិញ កំពែង ខ្មៅ អ្នកប្រដាល់សមាគមកីឡា ក្រសួងកសិកម្ម បានផ្ដួល អេលីត កែវឡុង ក្លិបឆ្មាសសែនសុខគុនខ្មែរ ឲ្យសន្លប់ក្នុងទឹកទី២ ដោយកែងរបស់គេ។ ឯ ហេង ពុទ្ធ អ្នកប្រដាល់ក្លិបកងចក្ររាជសីហ៍មានរិទ្ធ បានផ្ដួល ចាន់ ចឿក អ្នកប្រដាល់ក្លិបនិរោធមានជ័យ ឲ្យបោះបង់ចោលការប្រកួតក្នុងទឹកទី៣ ហើយនូវ ស៊ីណាត ក្លិបកងពលតូចទ័ពឆ័ត្រយោង៩១១ បានផ្ដួល សៃ ប៊ុនទូច ក្លិបកុសលកីឡា ឲ្យសន្លប់ក្នុងទឹកទី១ប៉ុណ្ណោះ៕
Source: Kampuchea Thmey Daily
0 Comments