អ្នកការទូតអាមេរិកដែលដឹកនាំការពិភាក្សាជាមួយក្រុមតាលីបង់បាននិយាយកាលពីថ្ងៃសុក្រថា លោកសង្ឃឹមថា នឹងបានឃើញកិច្ចព្រមព្រៀងសន្តិភាពមួយមុនការបោះឆ្នោតប្រធានាធិបតីរបស់ប្រទេសអាហ្វហ្គានីស្ថាននៅខែកក្កដា។
លោក Zalmay Khalilzad អតីតឯកអគ្គរដ្ឋទូតប្រចាំប្រទេសអាហ្វហ្គានីស្ថានក៏បានសង្កត់ធ្ងន់ផងដែរថា ការដកកងទ័ពរបស់សហរដ្ឋអាមេរិកនឹងពឹងផ្អែកលើលក្ខខណ្ឌនៅលើដីហើយមិនមែនទៅតាមកាលវិភាគជាក់លាក់ណាមួយនោះទេ។
កិច្ចពិភាក្សានេះបានធ្វើឡើងខណៈលោកប្រធានាធិបតី Donald Trump ជំរុញឲ្យបញ្ចប់ជម្លោះអាហ្វហ្គានីស្ថានដែលនៅទីនោះ ទាហានអាមេរិកប្រហែល១៤,០០០នាក់នៅតែត្រូវបានដាក់ពង្រាយហើយមានជនស៊ីវិលនិងយោធារាប់ពាន់នាក់បានស្លាប់។
លោក Khalilzad បានប្រាប់ទស្សនិកជននៅវិទ្យាស្ថានសន្តិភាពអាមេរិកក្នុងរដ្ឋធានីវ៉ាស៊ីនតោនថា “ពេលវេលានៃដំណោះស្រាយសន្តិភាពចេញពីទស្សនៈរបស់យើងគឺកាន់តែឆាប់កាន់តែប្រសើរ។ មានការបោះឆ្នោតមួយ ខ្ញុំដឹងថា ការឈានដល់កិច្ចព្រមព្រៀងសន្តិភាពមួយគឺមានភាពស្មុគស្មាញខ្លាំងណាស់។ ប៉ុន្តែវានឹងកាន់តែល្អប្រសើរសម្រាប់ប្រទេសអាហ្វហ្គានីស្ថានប្រសិនបើយើងអាចទទួលបានកិច្ចព្រមព្រៀងសន្តិភាពមួយមុនការបោះឆ្នោត”។
ការបោះឆ្នោតក្នុងប្រទេសអាហ្វហ្គានីស្ថានពីដើមឡើយត្រូវបានគេគ្រោងធ្វើនៅថ្ងៃទី២០ខែមេសាប៉ុន្តែត្រូវបានពន្យាររយៈពេលបីខែដោយសារតែការចរចាសន្តិភាពនៅតែបន្ត។ លោកប្រធានាធិបតី Ashraf Ghani ដែលជាប់ឆ្នោតក្នុងឆ្នាំ២០១៤កំពុងស្វែងរកអាណត្តិទីពីរ។
កាលពីសប្តាហ៍មុន លោក Khalilzad បានប្រកាសពីគម្រោងព្រាងមួយសម្រាប់កិច្ចព្រមព្រៀងសន្តិភាពបើទោះបីជាលោកបានព្រមានថា ឧបសគ្គចម្បងៗនៅតែមានក៏ដោយ។
ទោះបីជាយ៉ាងណាក៏ដោយ ក្រុមអ្នករិះគន់មានការសង្ស័យចំពោះហេតុផលមួយចំនួនដោយសារតែការចរចានេះមិនទាន់រួមបញ្ចូលរដ្ឋាភិបាលអាហ្វហ្គានីស្ថានដែលក្រុមតាលីបង់ចាត់ទុកថាជាអាយ៉ងដែលគាំទ្រដោយអាមេរិក៕ AFP
Source: Kampuchea Thmey Daily
0 Comments