ភ្នំពេញ ៖ ឆ្នាំ២០១៨ ខេត្តបន្ទាយមានជ័យប្រមូលចំណូលពន្ធ និងរដ្ឋាករបានសរុប ១.៣២២.១០១, ១៨លានរៀល ស្មើនឹង១១៣, ៣២% នៃផែនការ កើនឡើងចំនួន៣៨២.៦២៨,៩១លានរៀល ធៀបឆ្នាំ ២០១៧ និងចំណូលប្រាក់ ពិន័យបានពីបង្ក្រាបទំនិញគេចពន្ធសរុប១០.៤៣៩,៧៨លានរៀល ក្នុងនោះទំនិញដែលផ្តល់ចំណូលខ្ពស់រួមមាន រថយន្ត ម៉ូតូ ភេសជ្ជៈគ្រឿងឧបភោគ បរិភោគ ស៊ីម៉ង់.។ល។ ដោយឡែក ចំណូលសាខាពន្ធដារខេត្ត ប្រមូលចំណូលបានសរុប៦១.០៤៨,៥ ២លានរៀល កើនជាងឆ្នាំ២០១៧ ចំនួន២៩.១២៨, ២៨លានរៀល។
នៅក្នុងជំនួបពិភាក្សាស្វែង យល់ពីការប្រឈម និងការរីកចម្រើនរបស់ខេត្តជាមួយគណៈប្រតិភូគណៈកម្មការជំនាញ នៃរដ្ឋសភា ដឹកនាំដោយលោកបណ្ឌិតរដ្ឋ ជាម យៀប ប្រធានគណៈកម្មការសេដ្ឋ កិច្ច ហិរញ្ញវត្ថុ ធនាគារ និងសវន កម្ម នៃរដ្ឋសភា នៅខេត្តបន្ទាយ មានជ័យ កាលពីថ្ងៃទី៨ ខែកុម្ភៈនេះ លោក សួន បវរ គណៈអភិ បាលខេត្តបន្ទាយមានជ័យបានរាយការណ៍បន្តថា ទន្ទឹមនឹងការរីកចម្រើននេះ ខេត្តក៏មានបញ្ហាប្រឈមមួយចំនួនផងដែរដូចជា នៅតាមច្រកអន្តរជាតិចំនួន៤ និងចក្ររបៀងចំនួន៦១ ដែលនៅមានការគេចពន្ធ ផ្នែកពន្ធដាររបស់ខេត្តនៅខ្វះបុគ្គលិកជំនាញក្នុងការប្រមូលពន្ធ។
ក្នុងជំនួបនោះដែរ លោកបណ្ឌិតរដ្ឋ ជាម យៀប បានថ្លែងអំណរ និង វាយតម្លៃខ្ពស់នូវរាល់សមិទ្ធផលដែលខេត្តទទួលបានក្នុងរយៈពេលកន្លងមក។ លោកបណ្ឌិតរដ្ឋបញ្ជាក់ថា សមិទ្ធផលទាំងនេះ ជាកិច្ចខិត ខំប្រឹងប្រែងទាំងអស់គ្នា ទាំងថ្នាក់ជាតិ និងថ្នាក់ក្រោមជាតិ ជាពិសេសថ្នាក់ដឹកនាំខេត្តបន្ទាយមានជ័យ និងមន្ត្រីរាជការគ្រប់លំដាប់ថ្នាក់ដែលជាប្រតិបត្តិករផ្ទាល់នៅទីនេះ ហើយរាល់បញ្ហាប្រឈមគណៈកម្មការនឹងធ្វើរបាយការណ៍តាមរយៈប្រធានរដ្ឋសភា នៃព្រះរាជាណាចក្រកម្ពុជា ដើម្បីដាក់ជូនរាជរដ្ឋាភិបាលធ្វើការដោះស្រាយជូន។
លោកបណ្ឌិតរដ្ឋ ជាម យៀប ក៏បានផ្តល់អនុសាសន៍មួយចំនួនដល់ខេត្តត្រូវពង្រឹងការអនុវត្តច្បាប់ ជាពិសេសការប្រមូលពន្ធ ដើម្បីបង្កើនថវិកាជាតិសម្រាប់ការអភិវឌ្ឍជាតិឲ្យមានការឈានឡើង។ នាឧកាសនោះដែរ គណៈប្រតិភូគណៈកម្មការជំនាញ នៃរដ្ឋសភា ក៏បានចុះពិនិត្យមើលសកម្មភាពអនុវត្តជាក់ស្ដែងដល់ទីកន្លែង ដើម្បីស្វែងយល់បន្ថែមទៀត។
តាមប្រសាសន៍ លោក សួន បវរ គណៈអភិបាលខេត្តបន្ទាយមានជ័យបានឲ្យដឹងថា ខេត្តបន្ទាយមានជ័យ គឺជាខេត្តមួយក្នុងចំណោមរាជធានីខេត្តទូទាំង២៥ប្រទេស ដែលចាប់បដិសន្ធិ នាថ្ងៃទី៧ ខែ មករា ឆ្នាំ១៩៨៨ ដែលមានចម្ងាយ៣៥៩គីឡូម៉ែត្រពីរាជធានីភ្នំពេញមានព្រំប្រទល់ជាប់ជាមួយប្រទេសថៃឡង់ដ៍ប្រវែង១៥៣គីឡូម៉ែត្រ មានក្រុង/ស្រុកជាប់តាមបណ្ដោយព្រំប្រទល់ចំនួន៥ គឺស្រុកម៉ាឡៃ ក្រុងប៉ោយប៉ែត ស្រុកអូរជ្រៅ ស្រុកស្វាយចេក ស្រុកថ្មពួក។ ខេត្តមាន ផ្ទៃដីសរុប៦.៦៧៩គីឡូម៉ែត្រការ៉េចែកចេញជាពីក្រុង៧ស្រុក មាន៥៥ឃុំ ១០សង្កាត់ និង៦៥៨ភូមិ មានប្រជាជន១៨៨.៣៦៩គ្រួសារ មនុស្សសរុប៨៣៥.៤១៩នាក់ ក្នុងនោះស្រី៣៨៣.០៥២នាក់ ក្នុងនោះអ្នកប្រកបមុខរបរកសិកម្មជាចម្បងមាន៧១% អ្នកប្រកបមុខរបរសេវាកម្មមានចំនួន២៨% និងមុខ របរសិប្បកម្មមាន១%៕
Source: Kampuchea Thmey Daily
0 Comments