ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា បានជំរុញឲ្យក្រសួងកសិកម្ម រុក្ខាប្រមាញ់ និងនេសាទ ក្រសួងពាណិជ្ជកម្ម និងគ្រប់អភិបាលរាជធានី ខេត្ត ត្រូវបំផុសឲ្យមានផលិតកម្មក្នុងស្រុកនានាបម្រើឲ្យវិស័យទេសចរណ៍ តាមរយៈបាវចនាវិស័យទេសចរណ៍ គឺជាការនាំចេញនៅនឹងកន្លែង ហើយទីក្រុងទេសចរណ៍ធំៗទាំងអស់ត្រូវតែជាទីក្រុងដែលមានខ្សែក្រវាត់បៃតង(Green Belt)។
សម្តេចតេជោ ហ៊ុន សែន បានជំរុញបែបនេះ នៅក្នុងពិធីអបអរសាទរទិវាជាតិទីក្រុងស្អាតលើកទី៧ ឆ្នាំ២០១៩ ក្រោមប្រធានបទ “ទីក្រុងស្អាត៖ ទីក្រុងផ្តល់ភាពកក់ក្តៅ” អមជាមួយពិធីប្រគល់ជ័យលាភីរង្វាន់សម្តេចតេជោនាយករដ្ឋមន្ត្រី សម្រាប់ធុរកិច្ចបៃតងក្នុងវិស័យទេសចរណ៍លើកទី៣ ជ័យលាភីទីក្រុងដែលបានរៀបចំពិធីបុណ្យចូលឆ្នាំសកលល្អជាងគេប្រចាំឆ្នាំនិងជ័យលាភីបង្គន់សាធារណៈកម្ពុជាលើកទី១ នៅសណ្ឋាគារសុខាភ្នំពេញនាព្រឹកថ្ងៃទី ២៥ ខែកុម្ភៈ នេះ។
សម្តេចតេជោនាយករដ្ឋមន្ត្រី បានមានប្រសាសន៍ថា ទន្ទឹមនេះត្រូវធ្វើយុទ្ធនាការទីក្រុងស្អាត: ទីក្រុងដែលមានសុវត្ថិភាពចំណីអាហារនិងស្នើឲ្យភាគីពាក់ព័ន្ធចូលរួមអនុវត្តក្រមប្រតិបតិ្តភោជនីយដ្ឋានស្អាតឲ្យបានទូលំទូលាយនិងសូមប្រកាសដាក់ឲ្យអនុវត្តស្តង់ដារវិថីម្ហូបអាហារ (Food Street) ដែលជាសូចនាករថ្មីមួយទៀត ក្នុងស្តង់ដារទីក្រុងស្អាតនិងចលនាប្រឡងប្រណាំង ទីក្រុងស្អាត : ទីក្រុងមានវិថីម្ហូបអាហារស្អាតជារៀងរាល់ឆ្នាំ។
ទន្ទឹមនេះ ក្រសួងកសិកម្ម រុក្ខាប្រមាញ់ និងនេសាទ ក្រសួងពាណិជ្ជកម្ម និងគ្រប់អភិបាលរាជធានី ខេត្តត្រូវបំផុសឲ្យមានផលិតកម្មក្នុងស្រុកនានាបម្រើឲ្យវិស័យទេសចរណ៍តាមរយៈបាវចនាវិស័យទេសចរណ៍គឺជាការនាំចេញនឹងកន្លែងហើយទីក្រុងទេសចរណ៍ធំៗទាំងអស់ត្រូវតែជាទីក្រុងដែលមានខ្សែក្រវាត់បៃតង (Green Belt)។
ជាថ្មីម្តងទៀត ខ្ញុំសូមអំពាវនាវដល់បងប្អូនប្រជាពលរដ្ឋក្រសួង-ស្ថាប័ន អាជ្ញាធរគ្រប់លំដាប់ថ្នាក់ ជាពិសេសរដ្ឋបាលថ្នាក់ក្រោមជាតិ វិស័យឯកជន ដៃគូអភិវឌ្ឍ និងភាគីពាក់ព័ន្ធទាំងអស់ សូមចូលរួមគាំទ្រ និងជំរុញចលនាប្រឡងប្រណាំងទីក្រុងស្អាតឱ្យបានសកម្ម និងទូលំទូលាយដើម្បីជំរុញការអភិវឌ្ឍសេដ្ឋកិច្ចបៃតងនៅកម្ពុជាឲ្យកាន់តែរស់រវើក និងប្រកបដោយចីរភាព។
នៅក្នុងឱកាសនោះដែរ សម្តេចតេជោនាយករដ្ឋមន្ត្រី បានថ្លែងអំពាវនាវឲ្យរួមគ្នាទប់ស្កាត់ ប្រយុទ្ធប្រឆាំងជាមួយអំពើភេរវកម្ម ដើម្បីធានាដល់គោលដៅទេសចរណ៍របស់កម្ពុជាហើយក៏បានថ្លែងអំពាវនាវឲ្យរួមគ្នារក្សាឲ្យបាននូវស្ថិរភាពនយោបាយសង្គមនៅកម្ពុជា ព្រោះគ្មានអ្នកទេសចរណាទៅលេងកម្សាន្តនៅប្រទេសដែលគ្មានសន្តិភាព ស្ថិរភាពនយោបាយ និង សន្តិសុខសង្គមនោះឡើយ។
សម្តេចតេជោ ហ៊ុន សែន មានប្រសាសន៍ថា សម្តេចនៅតែផ្តល់ការលើកទឹកចិត្ត និងដាក់ចេញនូវបទបញ្ជាទាក់ទងនឹងសន្តិភាពនិងស្ថិរភាពខាងនយោបាយ សន្តិសុខសណ្តាប់ធ្នាប់សង្គម ធានាធ្វើយ៉ាងម៉េចកុំឲ្យកម្ពុជាមានអំពើភេរវកម្មកើតឡើងនៅតាមតំបន់ទេសចរណ៍នានា។ មិនថាតើនៅតាមតំបន់ទេសចរណ៍ទេត្រូវធ្វើឲ្យភូមិមួយ រោងចក្រមួយ សណ្ឋាគារមួយ សហគ្រាសមួយ ក្លាយទៅជាតំបន់សុខសាន្តមួយ។ សម្តេចបន្តថា សម្តេចធ្លាប់ទៅជួបកម្មករដែលមកដល់ពេលនេះមានប្រមាណជា ៩០ម៉ឺននាក់រួចទៅហើយ ហើយក៏មានប្រមាណ១.០០០រោងចក្រដែលសម្តេចបានប្រាប់ពួកគេឲ្យរួមគ្នាចូលរួមចំណែកដើម្បីធ្វើឲ្យរោងចក្រមួយក្លាយទៅជាសហគមន៍សុខសាន្តមួយ កុំឲ្យកន្លែងនោះក្លាយទៅជាកន្លែងបងតូចបងធំ ក្លាយទៅជាកន្លែងដែលចែកចាយគ្រឿងញៀន ក្លាយជាកន្លែងដែលមានការឆ្លងជំងឺអេដស៍។ សម្តេចមានប្រសាន៍ថា បើធ្វើបានដូចនេះ ពួកគាត់នឹងបានរួមចំណែកធ្វើឲ្យប្រទេសជាតិ អនុវត្តន៍បានល្អនូវគោលនយោបាយភូមិឃុំមានសុវត្ថិភាព ដែលទៅដល់ទីណាក៏ដោយ គ្មានរឿងអ្វីកើតឡើងដែរ។
ជាមួយគ្នានេះ សម្តេចតេជោ ហ៊ុន សែន បានថ្លែងកោតសរសើរដល់នគរបាលទេសចរណ៍ មន្ត្រីបេតិកភណ្ឌដែលបានប្រឹងប្រែងធ្វើការងារ រក្សាសុខសុវត្ថិភាពសម្រាប់ភ្ញៀវទេសចរយ៉ាងល្អប្រសើរកន្លងមក។ បើទោះបីនៅមានបញ្ហាឆក់កាបូបភ្ញៀវទេសចរខ្លះៗ តែត្រូវខិតខំការពារសុវត្ថិភាពភ្ញៀវឲ្យបានល្អ។
សម្តេចតេជោ ហ៊ុន សែន ក៏បានណែនាំដល់អ្នកប្រកបអាជីវកម្មផ្នែកទេសចរណ៍ឲ្យប្រឹងប្រែងទាក់ទាញអ្នកទេសចរមកលេងកម្សាន្តនៅកម្ពុជាជារឿងមួយលំបាកហើយ ដូចនេះការបន្តធ្វើឲ្យអ្នកទេសចរនោះមកលេងម្តងហើយ ចង់មកលេងជាថ្មីទៀត ហើយនាំមិត្តភក្តិសាច់ញាតិមកលេងទៀត វាជារឿងកាន់តែលំបាក ព្រោះយើងត្រូវធ្វើឲ្យទេសចរទាំងអស់ពេញចិត្តជាមួយសេវារបស់យើង ។ ជាមួយនេះ សម្តេចតេជោ ក៏បានថ្លែងឲ្យដឹងទៀតថា នៅពេលខាងមុខកម្ពុជានិងកសាងបន្ថែមទៀតនូវហេដ្ឋារចនាសម្ព័ន្ធតភ្ជាប់ឲ្យកាន់តែច្រើនថែមទៀតរួមទាំងផ្លូវនៅតាមព្រំដែនជាមួយប្រទេសថៃដែលតភ្ជាប់ផ្លូវចេញពីខេត្តពោធិ៍សាត់ ទៅថ្មដារ និងចេញពីថ្មដារ ទៅកោះកុង និងភ្ជាប់ផ្លូវពីថ្មដារ ចេញទៅប៉ៃលិន និង បាត់ដំបង ភ្ជាប់ជាមួយខេត្តពោធិ៍សាត់ផងដែរ ដើម្បីបង្កលក្ខណៈងាយស្រួល ដល់ការធ្វើដំណើររបស់អ្នកទេសចរ។
សម្តេចតេជោ ហ៊ុន សែន បានបន្តថា «សូមបញ្ជាក់បន្ថែមថា បើយើងចង់ទាក់ទាញភ្ញៀវទេសចរមកលេងប្រទេសយើង អ្វីដែលយើងបានធ្វើកន្លងទៅហើយដែលទទួលជោគជ័យរួចមកហើយ ត្រូវខិតខំបន្តទៀត។ការផ្សព្វផ្សាយតាមទូរទស្សន៍ព័ត៌មានសំខាន់ៗពីទេសចរណ៍កម្ពុជាជារឿងមួយហើយ តែការផ្សព្វផ្សាយ តាមរយៈនៃអ្នកទេសចរ ដែលអញ្ជើញមកកម្ពុជា ទើបជារឿងដែលសំខាន់»។
បើយោងតាមរបាយការណ៍របស់ក្រសួងទេសចរណ៍នៅឆ្នាំ២០១៨ កន្លងទៅនេះ កម្ពុជាសម្រេចបានកំណើនក្នុងអត្រា ១0,៧% ជាមួយនឹងការមកដល់នៃទេសចរអន្តរជាតិជាង ៦,២ លាននាក់ និងនាំប្រាក់ចំណូលប្រមាណ ៤.៣៥៦ លានដុល្លារចាក់បញ្ចូលក្នុងសេដ្ឋកិច្ចជាតិ។ នៅឆ្នាំ២០១៩ កម្ពុជារំពឹងថា នឹងទទួលភ្ញៀវទេសចរអន្តរជាតិប្រមាណ ៦.៧ លាននាក់ នៅឆ្នាំ២០២០ នឹងទទួលបានប្រមាណជាង ៧លាននាក់នឹងនាំមកនូវចំណូលប្រមាណ ៥ ប៊ីលានដុល្លារ បង្កើតនូវឱកាសការងារបានប្រមាណជិត ១លាននាក់និងនៅឆ្នាំ២០៣០អាចនឹងទទួលបានទេសចរអន្តរជាតិប្រមាណ ១៥លាននាក់នាំមកនូវចំណូលប្រមាណ ១០ ប៊ីលានដុល្លារបង្កើតឱកាសការងារប្រមាណជិត ២លាននាក់។
ដើម្បីត្រៀមទទួលស្វាគមន៍ភ្ញៀវទេសចរអន្តរជាតិដូចបានជម្រាបជូនខាងលើជាយុទ្ធសាស្ត្រគឺក្រសួងត្រូវធ្វើឲ្យកម្ពុជាក្លាយជាគោលដៅទេសចរណ៍ប្រកបដោយភាពទាក់ទាញនិង ផ្តល់ភាពកក់ក្តៅដល់ភ្ញៀវទេសចរតាមរយៈការបង្កើតឲ្យមានផលិតផលទេសចរណ៍ថ្មីៗ និងប្រកបដោយភាពវ័យឆ្លាត ស្អាត និងបៃតង (Smart, Clean & Green)។
ក្នុងចលនាប្រឡងប្រណាំងទីក្រុងស្អាតរាជរដ្ឋាភិបាលបានកំណត់យកថ្ងៃទី២៧ ខែកុម្ភៈ ជារៀងរាល់ឆ្នាំដើម្បីប្រារព្ធពិធីអបអរសាទរទិវាជាតិទីក្រុងស្អាតហើយផ្តើមចេញពីចលនាប្រឡងប្រណាំងនេះ រាជរដ្ឋាភិបាលក៏បានអនុញ្ញាតឲ្យដាក់ចេញនូវចលនាប្រឡងប្រណាំង «រង្វាន់សម្តេចតេជោនាយករដ្ឋមន្ត្រីសម្រាប់ធុរកិច្ចបៃតងក្នុងវិស័យទេសចរណ៍ » តាមរយៈអនុក្រឹត្យលេខ ១២៣ អនក្រ.បក ចុះថ្ងៃទី១៤ ខែកញ្ញា ឆ្នាំ២០១៥ ដោយប្រសិទ្ធនាមថា «រង្វាន់សម្តេចតេជោនាយករដ្ឋមន្ត្រីសម្រាប់ធុរកិច្ចបៃតងក្នុងវិស័យទេសចរណ៍» ដើម្បីលើកទឹកចិត្តនិងទទួលស្គាល់កិច្ចខិតខំប្រឹងប្រែងរបស់ផ្នែកឯកជនក្នុងវិស័យទេសចរណ៍និងវិស័យពាក់ព័ន្ធដែលមានស្នាដៃល្អចូលរួមទ្រទ្រង់ដល់ចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ» និងជាការលើកកម្ពស់ភាពស្អាត និងបៃតងនៅកម្ពុជា។
បើយោងតាមក្រសួងទេសចរណ៍ជ័យលាភីសម្តេចតេជោនាយករដ្ឋមន្ត្រីសម្រាប់ធុរកិច្ចបៃតងក្នុងវិស័យទេសចរណ៍ជ័យលាភីទីក្រុងដែលបានរៀបចំពិធីបុណ្យចូលឆ្នាំសកលល្អជាងគេបំផុតប្រចាំឆ្នាំ - Best Countdown City of the Year និងជ័យលាភីបង្គន់សាធារណៈកម្ពុជា គឺជាមូលដ្ឋានបន្ថែមមួយទៀតសម្រាប់កម្ពុជាក្នុងការត្រៀមខ្លួនចូលរួមអនុវត្តនូវស្តង់ដារទីក្រុងទេសចរណ៍ស្អាតអាស៊ាន ហើយដែលរាជរដ្ឋាភិបាលបានសម្រេចជ្រើសរើសបេក្ខភាពក្រុង/ខណ្ឌថ្មីចំនួន ៦ ទៀត (រួមមាន ខណ្ឌដូនពេញនៃរាជធានីភ្នំពេញ ក្រុងកំពត ក្រុងកំពង់ចាម ក្រុងពោធិ៍សាត់ ក្រុងតាខ្មៅ និងក្រុងកំពង់ឆ្នាំង) ដើម្បីចូលរួមចលនាប្រឡងប្រណាំងទីក្រុងទេសចរណ៍ស្អាត-អាស៊ានលើកទី២ នេះ ដែលជ័យលាភីនឹងប្រកាស នៅខែមករា ឆ្នាំ២០២០ ខាងមុខនេះ នៅប្រទេសប្រ៊ុយណេ៕
Source: Kampuchea Thmey Daily
0 Comments