រតនគិរី ៖ រថយន្តកាមរីចំនួនពីរគ្រឿងដឹកឈើប្រណិតប្រភេទគ្រញូងត្រូវបានកម្លាំងនគរបាលប្រឆាំងបទល្មើសសេដ្ឋកិច្ចខេត្តធ្វើការបង្ក្រាបបាននៅវេលាម៉ោង២២និង១៥នាទីថ្ងៃទី៥ ខែកញ្ញា ឆ្នាំ២០១៥។ រថយន្តទី១ ម៉ាកកាមរីគូទស្វិតពណ៌ទឹកប៊ិចពាក់ស្លាកលេខភព២-ង៥១១៦ បង្ក្រាបបាននៅចំណុចភូមិឡាអ៊ិន ឃុំតាអង ស្រុកកូនមុំ, រថយន្តទី២ ម៉ាកកាមរីឆ្លាមពណ៌ត្រីឆ្លូញអត់ស្លាកលេខបង្ក្រាបបាននៅភូមិ០២ ឃុំត្រពាំងច្រេស ស្រុកកូនមុំ។
ប្រភពពីមន្ត្រីការិយាល័យនគរបាលប្រឆាំងបទល្មើសសេដ្ឋកិច្ចខេត្តបានប្រាបដល់ក្រុមអ្នកការសែតថា ក្រោយពីទទួលព័ត៌មានសម្ងាត់ពីភ្នាក់ងារថាមានរថយន្តដឹកឈើប្រណិតប្រភេទគ្រញូងចំនួនពីរគ្រឿងមកពីខេត្តព្រះវិហារឆ្លងកាត់ខេត្តស្ទឹងត្រែងទើបឈានដល់ការបង្ក្រាបនៅក្នុងស្រុកកូនមុំខេត្តរតនគិរីនេះតែម្ដង។ ប្រភពបន្តទៀតថា រថយន្តកាមរីគូទស្វិតអ្នកបើកបរឈ្មោះ”អែលពៅ” ភេទប្រុសអាយុ៤៥ឆ្នាំ ត្រូវរត់គេចខ្លួនភ្លាមៗ។ កាមរីឆ្លាមអ្នកបើកបរឈ្មោះ”សាតសិរី”ភេទប្រុសឃាត់ខ្លួនបាននៅកន្លែងបង្ក្រាប រួចបញ្ជូនមនុស្ស និងវត្ថុតាងមករក្សាទុកនៅការិយាល័យប្រឆាំងបទល្មើសសេដ្ឋកិច្ចនៃស្នងការខេត្ត និងធ្វើកំណត់ហេតុប្រគល់ជូនជំនាញផ្នែករដ្ឋបាលព្រៃឈើលំផាត់នៅព្រឹកថ្ងៃបន្ទាប់ដើម្បីចាត់ការតាមច្បាប់ព្រៃឈើ។
បន្ទាប់ពីជំនាញរដ្ឋបាលព្រៃឈើធ្វើការវាស់វែងឃើញថា នៅក្នុងនោះ រឹបអូសបានឈើប្រណិតប្រភេទក្រញូងក្រាក់ក្នុងរថយន្តទាំងពីរចំនួន២០៣ដុំស្មើនឹង៩៦០គីឡូក្រាម រួចរក្សាទុកនៅផ្នែករដ្ឋបាលព្រៃឈើលំផាត់ចាត់ការបន្ត។
សូមបញ្ជាក់ថា ប្រភេទឈើប្រណិតប្រភេទគ្រញូងនេះក្នុងខេត្តរតនគិរីពុំសូវឃើញមានចរាចរណ៍ញឹកញាប់ទៀតទេក្នុងពេលបច្ចុប្បន្ន ព្រោះក្រុមឈ្មួញកំពុងតែសម្រុកដឹកជញ្ជូនប្រភេទឈើធ្នង់ និងឈើប្រភេទសុក្រំ ដែលកំពុងមានហាងឆេងខ្ពស់លើទីផ្សារក្នុងប្រទេសវៀតណាម។ ជាក់ស្តែងក្នុងមួយរយៈនេះគេសង្កេតឃើញឈ្មួញកំពុងសម្រុកដឹកជញ្ជូនតាមរថយន្តដូចជាកាមរីឆ្លាម បាឡែន សាំយុង ឡិចស៊ីស ឡង់គ្រីសរ័ និងរហូតឈានដល់ប្រភេទរថយន្តក្រុងដឹកភ្ញៀវទេសចរណ៍។ ចំពោះករណីនេះសមត្ថកិច្ចគ្រប់លំដាប់ថ្នាក់ក៏ត្រូវទទួលបានលាភសក្ការៈគ្រប់ៗគ្នាដែរទើបអាចចរាចរណ៍ដឹកជញ្ជូនឈើប្រណិតបានយ៉ាងរលូនបែបនេះ។ តាមប្រភពពីប្រជាពលរដ្ឋបានឲ្យដឹងថា អ្នករកស៊ីឈើទាំងនោះ បើមិនជម្រាបជូនសមត្ថកិច្ចគ្រប់ជាន់ថ្នាក់ទេ ពិតជាវិលកង់ឡានមិនបានឡើយ ព្រោះសមត្ថកិច្ចគ្រប់ជំនាញទាំងនោះមានកម្លាំងច្រើនដូចស្រមោចអញ្ចឹង៕
ការដឹកជញ្ជូនឈើសុក្រំ និងធ្នង់ទៅកាន់ប្រទេសវៀតណាមកំពុងកើតឡើងពេញបន្ទុក
0 Comments