ប្រទេស​អូស្ត្រាលី​ជួបប្រទះ​រដូវក្តៅ​ក្តៅ​បំផុត​ក្នុង​កំណត់ត្រា

រដ្ឋាភិបាល​បាន​និយាយ​នៅ​ថ្ងៃ​ព្រហស្បតិ៍​ថា ប្រទេស​អូស្ត្រាលី​បាន​ទទួលរង​នូវ​រដូវក្តៅ​ដ៏​ក្តៅ​បំផុត​របស់ខ្លួន​ក្នុង​កំណត់ត្រា​ចាប់ពី​ខែធ្នូ​ដល់​ខែកុម្ភៈ​ហើយ​ការព្យាករណ៍​បាន​បង្ហាញថា រដូវ​ស្លឹកឈើ​ជ្រុះ​នៅ​ភាគខាងត្បូង​នឹង​បន្ត​ស្ងួត​ហួតហែង​ហើយ​ក្តៅ​ជាង​កម្រិត​មធ្យម​។​

លោក Andrew Watkins អ្នកគ្រប់គ្រង​ការព្យាករណ៍​រយៈពេល​វែង​នៅ​ការិយាល័យ​ឧតុនិយម​បាន​និយាយថា “​បន្ទាប់ពី​កំណត់ត្រា​កំដៅ​ក្នុង​ខែធ្នូ​និង​ខែមករា វា​នឹង​មិនមាន​អ្វី​ត្រូវ​ភ្ញាក់ផ្អើល​ទេ​ដែល​រដូវក្តៅ​នេះ​នឹង​ក្លាយជា​ភាព​ក្តៅ​បំផុត​របស់​យើង​ក្នុង​កំណត់ត្រា​”​។​

ថ្វីបើ​តួលេខ​ចុងក្រោយ​នឹងមិន​ត្រូវ​បញ្ចេញ​រហូតដល់​ថ្ងៃ​សុក្រ​ក៏ដោយ ប៉ុន្តែ​ការិយាល័យ​នេះ​បាន​និយាយថា វា​បានបង្ហាញ​ច្បាស់​រួចទៅហើយ​អំពី​កម្រិត​អតិបរមា​ហើយ​សីតុណ្ហភាព​ជា​មធ្យម​សម្រាប់​រយៈពេល​៣​ខែ​នៃ​រដូវក្តៅ​នឹង​ខ្ពស់ជាង​កម្រិត​ធម្មតា​ចំនួន​២​អង្សា​សេ​ជា​លើកដំបូង​។​

ការធ្លាក់​ភ្លៀង​ក៏​ស្ថិតនៅក្រោម​កម្រិត​ធម្មតា​ផងដែរ​ហើយ​ការិយាល័យ​នេះ​បាន​និយាយថា ខ្លួន​មិនបាន​មើលឃើញ​ពី​ភាព​ធូរស្រាល​ទេ​ក្នុង​គ្រោះរាំងស្ងួត​ដ៏​ធ្ងន់ធ្ងរ​ដែល​បាន​វាយប្រហារ​តំបន់កសិកម្ម​របស់​ប្រទេស​នៅ​ភាគ​ខាងកើត​និង​អាគ្នេយ៍​សម្រាប់​រយៈពេល​ប៉ុន្មាន​ខែ​ខាងមុខនេះ​។​

ការិយាល័យ​នេះ​បាន​រាយការណ៍​កាលពីដើម​ថា ខែមករា​គឺជា​ខែ​ដ៏​ក្តៅ​បំផុត​ដែល​មិន​ធ្លាប់មាន​ក្នុង​កំណត់ត្រា​ប្រទេស​អូស្ត្រាលី​ដោយ​សីតុណ្ហភាព​ទូទាំងប្រទេស​បាន​កើន​លើសពី​៣០​អង្សា​សេ​ជា​លើកទីមួយ​។​

លោក Watkins បាន​និយាយថា លំនាំ​អាកាសធាតុ​នៅលើ​មហាសមុទ្រ​ឥណ្ឌា​និង​មហាសមុទ្រ​ប៉ាស៊ីហ្វិក​បានរួម​ចំណែក​ដល់​សីតុណ្ហភាព​កើនឡើង​ខ្ពស់​និង​កម្រិត​ភ្លៀង​ធ្លាក់​ទាប​ប៉ុន្តែ​និន្នាការ​ប្រែប្រួល​អាកាសធាតុ​រយៈពេល​យូរ​ក៏​ពាក់ព័ន្ធ​ផងដែរ​។​

អាជ្ញាធរ​បាន​និយាយថា រលក​កម្តៅ​កាលពី​ខែមករា​បានរួម​ចំណែក​ដល់​ការស្លាប់​ត្រី​ជាង​មួយ​លាន​ក្បាល​នៅក្នុង​ប្រព័ន្ធ​ទន្លេ Murray-Darling ដែលជា​ទន្លេធំ​បំផុត​របស់​ប្រទេស​ដែល​ហូរ​កាត់​រដ្ឋ​ចំនួន​៥​នៅ​ភាគ​ខាងកើត​ប្រទេស​។​

ទន្ទឹមនឹង​នោះដែរ ភ្លើង​ឆេះ​ព្រៃ​បាន​រីក​រាលដាល​យ៉ាង​ឆ្ងាយ​ទៅដល់​តំបន់​ត្រូពិច​ភាគ​ឦសាន​ប្រទេស​កាលពី​ខែមករា​៕ AFP

​

Source: Kampuchea Thmey Daily