កណ្ដាល ៖ រថយន្ដពីរគ្រឿងសុទ្ធតែជាប្រភេទរថយន្ដបែនដឹកដី និងដឹកថ្ម បានបើកបុកគ្នាពេញទំហឹង ខណៈបើកបរបញ្ច្រាសទិសគ្នា ដោយរថយន្ដបែនមួយគ្រឿងដែលពុំមានដឹកអីនោះទេបានជ្រុលចូលចំណែកផ្លូវរថយន្ដបែនដឹកថ្ម បុកគ្នាលាន់ដូចរន្ទះបណ្ដាលឲ្យរថយន្ដបែនអត់មានដឹកអីនោះបានដាច់កង់ពីរគ្រាប់និងកាប៊ីនខ្ទាតចេញពីតួ រមៀលធ្លាក់ចូលប្រឡាយទឹកស្អុយតាមចិញ្ចើមផ្លូវ ហើយតួរថយន្ដនោះបានខ្ទាតចេញពីគ្នាពី២០ទៅ៣០ម៉ែត្រ អ្នកបើកបររងរបួសធ្ងន់ ចំណែករថយន្ដបែនដឹកថ្ម ដែលមានបិទឡូហ្គោអគ្គបញ្ជាការកងទ័ពជើងគោក ក៏រងការខូចខាតកំពិតកាប៊ីនមុខហើយអ្នកបើកបររបួសធ្ងន់ដែរ តែសមត្ថកិច្ចទៅមិនទាន់ រត់គេចខ្លួនបាត់។
ហេតុការណ៍នេះ បានកើតឡើងកាលពីវេលាម៉ោង៥និង២៥នាទីព្រឹក ថ្ងៃទី២៨ ខែកុម្ភៈ ឆ្នាំ២០១៩ នៅតាមផ្លូវជាតិលេខ៤ ត្រង់ចំណុចមុខភូមិត្រពាំរាំង ឃុំព្រៃពួច ស្រុកអង្គស្នួល។
សមត្ថកិច្ចបានឲ្យដឹងថា ភាគីខាងរថយន្តមួយគ្រឿងម៉ាកហ៊ីយ៉ាន់ដាយជាប្រភេទបែនដឹកដី ពណ៌សលាយបៃតង ពាក់ស្លាកលេខ ភ្នំពេញ 3D-4017 បើកបរដោយបុរសម្នាក់ឈ្មោះ តេង ឈុនទី អាយុ២៨ឆ្នាំ មានទីលំនៅក្នុងភូមិខ្វិតតូច ឃុំជ្រៃវៀន ស្រុកព្រៃឈ ខេត្តកំពង់ចាម បានរងរបួសធ្ងន់ ។ ចំណែកភាគីខាងរថយន្តមួយគ្រឿងទៀតជាប្រភេទបែនដឹកថ្ម ពណ៌ត្រេអ៊ី ពាក់ស្លាកលេខ ខេមរភូមិន្ទ២-៣-០៦២២ មានបិទឡូហ្គោអគ្គបញ្ជាការដ្ឋានកងទ័ពជើងគោកនៅជាប់ទ្វារផង បើកបរដោយបុរសម្នាក់មិនស្គាល់អត្តសញ្ញាណបាន រត់គេចខ្លួនបាត់ស្រមោល។
តាមប្រភពព័ត៌មានបានឲ្យដឹងថា នៅមុនពេលកើតហេតុ គេឃើញរថយន្តទាំង២គ្រឿងបានបើកបរក្នុងទិសដៅបញ្ច្រាសគ្នា ដោយរថយន្តបែនមួយគ្រឿង ពាក់ស្លាកលេខខេមរភូមិន្ទ មានដឹកថ្មពេញទ្រុងបានបើកបរក្នុងទិសដៅពីលិចទៅកើត។ ដោយឡែករថយន្តបែនដឹកដីម៉ាកហ៊ីយ៉ាន់ដាយ បើកបរបោះពួយក្នុង ក្នុងទិសដៅពីកើតទៅលិចក្នុងល្បឿនលឿន លុះមកដល់ត្រង់ចំណុចកើតដោយសារមិនប្រកាន់ស្ដាំ ហើយសង្ស័យអ្នកបើកបរងងុយដេកក៏បានរេចង្កូតចូលចំណែកផ្លូវម្ខាងទៀតជ្រុលទៅបុកជាមួយរថយន្តបែនដឹកថ្មពេញទំហឹងតែម្ដង។
ប្រភពដដែលបានបន្តថា ពេលនោះរថយន្តម៉ាកហ៊ីយ៉ាន់ដាយបានដាច់កាប៊ីនចេញពីតួចម្ងាយប្រមាណ២០ម៉ែត្ររមៀលធ្លាក់ចូលទៅក្នុងប្រឡាយទឹកស្អុយ និងដាច់កង់មុខ ទាំង២គ្រាប់រមៀលខ្ទាតចេញពីតួចម្ងាយប្រមាណជាង៣០ម៉ែត្រ។ ចំណែកអ្នកបើកបរបានធ្លាក់ចេញពីកាប៊ីនរថយន្ត ដួលដេកក្នុងថ្លុកឈាមនៅលើផ្លូវក្បែរតួរថយន្ត។ រីឯរថយន្តបែនមានដឹកថ្មបានក្រពឹតរួញកាប៊ីនរងការខូចខាតទាំងស្រុង ព្រមទាំងផ្ទុះពោងសុវត្ថិភាព ហើយអ្នកបើកបររថយន្តនេះក៏រងរបួសដែរ ព្រោះប្រទះឃើញមានឈាមហូរនៅក្បែររថយន្ត បន្ទាប់មកបានរត់គេចខ្លួនបាត់។
ក្រោយពេលកើតហេតុសមត្ថកិច្ច ចុះទៅសម្រួលចរាចរមិនឲ្យមានការកកស្ទះ ព្រមទាំងបញ្ជូនអ្នកបើកបររថយន្តហ៊ីយ៉ាន់ដាយទៅកាន់មន្ទីរពេទ្យដើម្បីសង្គ្រោះបន្ទាន់ ហើយ សមត្ថកិច្ចបានស្ទូចយករថយន្តទាំងពីរគ្រឿង ទៅរក្សាទុកនៅអធិការដ្ឋាននគរបាលស្រុក រង់ចាំការដោះស្រាយគ្នា៕
Source: Kampuchea Thmey Daily
0 Comments