រតនគិរី ៖ ម៉ូតូមួយគ្រឿងត្រូវបានរថយន្តកាមរីបុកពីក្រោយយ៉ាងពេញទំហឹង បណ្តាលឲ្យស្ត្រីវ័យចំណាស់ម្នាក់បានរងរបួសធ្ងន់ធ្ងរ។
ករណីគ្រោះថ្នាក់ចរាចរណ៍បានកើតឡើងកាលពីវេលាម៉ោង៦និង៣០នាទីព្រឹក ថ្ងៃព្រហស្បតិ៍ ៩រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៨ ខែកុម្ភៈ ឆ្នាំ២០១៩ ត្រង់ចំណុចមុខផ្សារស្រុកកូនមុំ ស្ថិតក្នុងភូមិ៣ ឃុំត្រពាំងច្រេស ស្រុកកូនមុំ។
អធិការរងទទួលផែនសណ្តាប់ធ្នាប់លោក ពុធ សាវី បានឲ្យដឹងថា ជនរងគ្រោះឈ្មោះ យ៉ិន ចន្ថា ភេទស្រី អាយុ៥៦ឆ្នាំ ជនជាតិខ្មែរ មានទីលំនៅភូមិ១ ឃុំត្រពាំងច្រេស ស្រុកកូនមុំ ខេត្តរតនគីរី បានរងរបួសធ្ងន់ បាក់ចង្កេះនិងបែកក្បាល ជិះម៉ូតូមួយគ្រឿងម៉ាក ស៊ុយសាគី ពណ៌ខ្មៅ ពាក់ស្លាកលេខ កំពង់ចាម 1H-8743 ក្នុងទិសដៅពីលិចមកកើត ខណៈមកដល់ចំណុចកើតហេតុក៏បានបត់ឆ្លងផ្លូវថ្នល់មិនបានមើលក្រោយ ស្របពេលរថយន្តមកដល់បុកយ៉ាងពេញទំហឹងតែម្តង។ ក្រោយកើតហេតុរថយន្តបានព្យាយាមបើករត់គេចពីកន្លែងកើតហេតុប្រមាណ១គីឡូម៉ែត្រទុករថយន្តចោលហើយគេចខ្លួនបាត់ស្រមោល។
លោក ពុធ សាវី បានបន្តទៀតថា រថយន្តមួយគ្រឿងម៉ាកកាមរីហើម ពណ៌ស្លែ ពាក់ស្លាកលេខភ្នំពេញ2A-5866 បើកបរក្នុងទិសដៅពីលិចទៅកើតស្របទិសគ្នា។
ក្រោយពេលកើតហេតុ ត្រូវបានរថយន្តសង្គ្រោះដឹកបញ្ជូនទៅមន្ទីរពេទ្យបង្អែកខេត្តដើម្បីជួយសង្គ្រោះ។ ដោយឡែកមធ្យោបាយទាំងពីរគ្រឿង ត្រូវបានសមត្ថកិច្ចជំនាញរឹបអូសយកមករក្សាទុកនៅអធិការដ្ឋាននគរបាលស្រុកកូនមុំ ដើម្បីរង់ចាំធ្វើការដោះស្រាយគ្នានៅពេលក្រោយ៕
Source: Kampuchea Thmey Daily
0 Comments