កណ្តាល ៖ ឃ្លាំងស្តុកសម្ភារៈសំណង់មួយ ត្រូវបានអគ្គិភ័យឆាបឆេះអស់ប្រមាណ៥០%ក្រោយមកត្រូវបានរថយន្តពន្លត់អគ្គីភ័យជួយសង្គ្រោះទាន់ពេល សង្ស័យបណ្តាលមកពីហើរកម្ទេចភ្លើងពីទីលានចាក់សំរាម។
លោកវរសេនីយ៍ឯក អ៊ុល ប៊ុណ្ណា ស្នងការរងទទួលផែនបង្ការ ពន្លត់អគ្គិភ័យនៃស្នងការដ្ឋាននគរបាលខេត្តកណ្តាល បានប្រាប់ឲ្យដឹងថា គ្រោះអគ្គិភ័យនេះ បានកើតឡើងក្នុងអំឡុងម៉ោងប្រមាណ១និង៣០នាទីរសៀល ថ្ងៃទី២៨ កុម្ភៈ ២០១៩ នៅក្នុងទីតាំងឃ្លាំងស្តុកសម្ភារៈសំណង់មួយ ក្នុងភូមិព្រែកហូរកើត សង្កាត់ព្រែកហូរ ក្រុងតាខ្មៅ ខេត្តកណ្តាល មានម្ចាស់ឈ្មោះ គង់។
លោកបានបន្តថា បន្ទាប់ពីទទួលបានព័ត៌មាន លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល បានចេញបញ្ជាឲ្យជួយសង្គ្រោះជាបន្ទាន់ ដោយប្រើរថយន្តពន្លត់អគ្គីភ័យចំនួន៣គ្រឿង ហើយបន្ទាប់ពីកម្លាំងរបស់យើងខិតខំប្រឹងប្រែងអន្តរាគមន៍ ដោយប្រើពេលប្រមាណជាង១ម៉ោង ទើបយើងអាចគ្រប់គ្រងស្ថានការណ៍បាន។ អគ្គិភ័យនេះ បណ្តាលឲ្យឆេះក្តារកុងប្លាកេ និងស័ង្កសីចាស់ រួមជាមួយសម្ភារៈផ្សេងៗទៀតអស់មួយចំនួន ដែលមិនទាន់អាចសរុបជាទឹកប្រាក់ប៉ុន្មាននោះទេ ហើយតាមការសន្និដ្ឋាន គឺអាចបណ្តាលមកពីហើរកំទេចភ្លើង ពីទីលានចាក់សំរាមនៅក្បែរ ដែលគេដុតសំរាម។ ហើយបើទោះបីភ្លើងបានរលត់ក៏ដោយ ក៏យើងនៅតែមិនទាន់ដករថយន្តចេញដែរ ព្រោះតែខ្យល់នៅតែបក់ខ្លាំងខ្លាចក្រែងកម្ទេចភ្លើងមកលើឆេះមកម្តងទៀត។
លោកស្នងការរង ក៏បានអំពាវនាវទៅដល់ប្រជាពលរដ្ឋទាំងអស់ដែរថា សូមមេត្តាប្រុងប្រយ័ត្នខ្ពស់ទាំងអស់គ្នា ព្រោះតែខែនេះជារដូវក្តៅ និងមិនត្រូវដុតសំរាមផ្ដេសផ្ដាសនោះទេ ព្រោះវា អាចបង្កឲ្យមានអគ្គីភ័យកើតឡើងជាយថាហេតុ ដែលនាំឲ្យខូចខាតបាត់បង់ទ្រព្យសម្បត្តិ ហើយជួនកាលអាចគ្រោះថ្នាក់ដល់អាយុជីវិតថែមទៀតផង។
ចំណែកឯប្រជាពលរដ្ឋនៅក្នុងមូលដ្ឋានខាងលើ បានប្រាប់ថា ទីតាំងចាក់សំរាមនេះ គឺតែងដុតសំរាមជារៀងរាល់ថ្ងៃ ដែលបណ្តាលឲ្យប៉ះពាល់ដល់សុខភាពរបស់ពួកគាត់ណាស់ ហើយក៏សូមសំណូមពរមេត្តាជួយអន្តរាគមន៍ផង៕
Source: Kampuchea Thmey Daily
0 Comments