មេបញ្ជាការកងរាជអាវុធហត្ថទើបចូលកាន់តំណែង មិនត្រូវបញ្ជាកងកម្លាំងទៅធ្វើអ្វី ដែលផ្ទុយពីតួនាទី ភារកិច្ចរបស់ស្ថាប័នកងយោធពលខេមរភូមិន្ទ

រតនគិរី ៖ លោកនាយឧត្ដមសេនីយ៍ សៅសុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស លោកណាប់ ប៊ុនហេងប្រធានក្រុមប្រឹក្សាខេត្តនិងលោក ថង សាវុន អភិបាលនៃគណៈអភិបាលខេត្តរតគិរី បានអញ្ជើញជាអធិបតីដ៏ខ្ពង់ខ្ពស់ក្នុងពិធីប្រកាសផ្ទេរភារកិច្ចនិងតែងតាំងមុខតំណែងកងរាជអាវុធហត្ថខេត្តរតនគិរីនាព្រឹកថ្ងៃច័ន្ទ ១៤កើត ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៨ ខែកុម្ភៈ ឆ្នាំ២០១៩។

មានប្រសាសន៍ក្នុងពិធីប្រកាសតែងតាំងមុខតំណែង មន្ត្រីកងរាជអាវុធហត្ថខាងលើលោកនាយឧត្ដមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានធ្វើការព្រមានដល់មន្ត្រីក្រោមឱវាទ មិនត្រូវយកតួនាទីរបស់ខ្លួនធ្វើជាមុខរបរឡើយ ដើម្បីចៀសវាងការចោទប្រកាន់ពីមហាជនទូទៅ ដែលនាំឲ្យប៉ះពាល់ដល់តម្លៃ និងសេចក្ដីថ្លៃថ្នូរ វិន័យរបស់មន្ត្រីនគរបាល ប្រសិនបើរកឃើញថា មន្ត្រីរូបណាប្រព្រឹត្តិទង្វើបែបនេះ ត្រូវទទួលទោសទៀតផង។

លោក នាយឧត្តមសេនីយ៍ សៅ សុខាមានប្រសាសន៍ថា ក្នុងនាមមន្ត្រីកងរាជអាវុធហត្ថ ជាអ្នកបម្រើប្រជាជន ត្រូវតែបំពេញនូវកាតព្វកិច្ចរបស់ខ្លួនរៀងៗខ្លួន និងរក្សាបាននូវសេចក្តីថ្លៃថ្នូ សាមគ្គីផ្ទៃក្នុងអង្គភាពឲ្យបានរឹងមាំ ដើម្បីធានាបាននូវការបំពេញ កិច្ចការងារប្រកបដោយប្រសិទ្ធភាព តម្លាភាព កាន់តែប្រសើរឡើង។

តែទោះជាបែបនេះក្តីលោកនាយឧត្តមសេនីយ៍ បន្តថា មន្ត្រីកងរាជអាវុធហត្ថទាំងអស់ ត្រូវចៀសវាងឲ្យបានជាដាច់ខាតរាល់ការ យកតួនាទី ភារកិច្ច របស់ខ្លួនទៅធ្វើជាមុខរបរ និងកៀបសង្កត់មន្ត្រីក្រោមឱវាទក្នុងអង្គភាព តាមគ្រប់ រូបភាពណាក៏ដោយ។ ប្រសិនបើរកឃើញថា មន្ត្រីរូបណាបានប្រព្រឹត្តិទង្វើអសកម្មណាមួយ ក្នុងអង្គភាព មន្ត្រីនោះនឹងត្រូវតែទទួលទោសជាមិនខានឡើយ។

ជាមួយគ្នានេះដែរ លោក ថង សាវុនអភិបាលខេត្តរតនគិរីក៏បានជំរុញឲ្យមន្ត្រីកងរាជអាវុធហត្ថខេត្តគ្រប់មូលដ្ឋានទាំងអស់ ត្រូវបង្កើនការសហការគ្នាជាមួយអាជ្ញាធរពាក់ព័ន្ធគ្រប់លំដាប់ថ្នាក់ទាំងអស់ ត្រូវធ្វើយ៉ាងណាបន្តរួមគ្នា បំពេញភារកិច្ច ដែលរាជរដ្ឋាភិបាលប្រគល់ ជូន ដើម្បីរក្សាបាននូវ សន្តិសុខ សណ្តាប់ធ្នាប់ និងសុវត្ថិភាពការរស់នៅរបស់ប្រជាពលរដ្ឋទូទាំងខេត្តរតនគិរីឲ្យមានភាពកក់ក្តៅ ជាពិសេសនោះ ត្រូវបន្តស្រាវជ្រាវបង្ក្រាបឲ្យបានរាល់បទល្មើសផ្សេងៗ ដែលកើតមានក្នុងមូលដ្ឋានឲ្យមានប្រសិទ្ធភាពបំផុត។

លោក ឧត្តមសេនីយ៍ត្រី ថាវ យ៉េនមេបញ្ជាការកងរាជអាវុធហត្ថខេត្តរតនគិរីរ ដែលទើបតែងតាំងថ្មី បានប្ដេជ្ញាអនុវត្តឲ្យបាន ម៉ឺងម៉ាត់បំផុតរាល់ការដាក់ចេញនូវបទបញ្ជារបស់ថ្នាក់ដឹកនាំ ជាពិសេសនោះ ធ្វើឲ្យផ្ទៃក្នុងអង្គភាពកាន់តែមានភាពរឹងមាំ សំដៅដល់ការ បម្រើ ការពារ ផលប្រយោជន៍ប្រជាពលរដ្ឋ ប្រកបដោយប្រសិទ្ធភាព និងតម្លាភាពប្ដេជ្ញាគោរពនៅអនុសាសន៍៧ចំណុចនិងពាក្យស្លាក៣ជារបស់នាយឧត្តមសេនីយ៍សៅ សុខា អគ្គមេបញ្ជាការរងកងយោធពលខេមរភូមិន្ទនិងជាមេបញ្ជាការកងរាជអាវុធហត្ថលើផ្ទៃប្រទេសដែលមានជាអាទិ៍ដូចតទៅ%១ធ្វើការតាមដានក្តាប់សភាពការណ៍ទូទៅបម្រើភ្ញៀវជាតិ និងអន្តរជាតិដែលមកកម្សាន្ត។ ២-ធ្វើការស្រាវជ្រាវរកមុខសញ្ញានិងបង្ក្រាបរាល់បទល្មើសដោយទុច្ចរិតយកចិត្តទុកដាក់និងឲ្យទាន់ពេលវេលាលើបទបញ្ជា ការជួញដូរមនុស្សការចែកចាយគ្រឿងញៀនការនាំចូលទំនិញគេចពន្ធនិងទំនិញខូចគុណភាពការលួចភ្លន់ ការដឹងជញ្ជូននិងការកាប់បំផ្លាញព្រៃឈើខុសច្បាប់បទល្មើសធនធានធម្មជាតិការពារស្ពានថ្នល់និងសមិទ្ធផលសាធារណៈគ្រប់ប្រភេទ។ ៣-អនុវត្តឲ្យម៉ឺងម៉ាត់នៅតួនាទីរបស់កងរាជអាវុធហត្ថតាមខ្លឹមសារអនុក្រឹត្យ៧៧គឺរ៉ាប់រងសកម្មភាពតាមប៉ូលិសរដ្ឋបាលប៉ូលិសតុលាការតម្រួតយោធានិងសហការជាមួយអន្តរក្រសួង។ ៤-ចូលរួមការពារសន្តិសុខសណ្ដាប់ធ្នាប់ជូនប្រជាពលរដ្ឋ។ ៥-ពន្លឿនការអនុវត្តច្បាប់ភូមិឃុំមានសុវត្ថិភាពការងារបង្ក្រាបត្រូវចេះសហការជាមួយរដ្ឋបាលព្រៃឈើកងកម្លាំងអាជ្ញាធរមូលដ្ឋាន។ ៦-រៀបចំមធ្យោបាយជួយសង្គ្រោះប្រជាពលរដ្ឋក្នុងឧបទ្ទវហេតុផ្សេងៗដូចជាគ្រោះធម្មជាតិអគ្គីភ័យទឹកជំនន់និងគ្រោះថ្នាក់ចរាចរណ៍។ ៧-រៀបកម្លាំងមធ្យោបាយបរិក្ខារដើម្បីប្រយុទ្ធចាំទទួលបទបញ្ជាថ្នាក់លើ។ រួមជាមួយពាក្យស្លោក៣ឃ្លា(រួមគិត រួមធ្វើ រួមទទួលខុសត្រូវ)។

សូមបញ្ជាក់ថា ការតែងតាំងមុខតំណែងកងរាជអាវុធហត្ថខេត្តរតនគិរីថ្មីនេះ គឺតែងតាំងលោក ឧត្តមសេនីយ៍ត្រី ថាវ យ៉េន អត្តលេខ 009751 មេបញ្ជាការរងនិងជានាយសេនាធិការកងរាជអាវុធហត្ថខេត្តរតនគិរី ជំនួសលោក ឧត្តមសេនីយ៍ត្រី គឹម រស្មី អត្តលេខ017893អតីតមេបញ្ជាការកងរាជអាវុធហត្ថ ខេត្តរតនគិរី ដែលត្រូវព្រះមហាក្សត្រលុបឈ្មោះពីគ្របខណ្ឌកងយោធពលខេមរភូមិន្ទនាពេលថ្មីៗកន្លងទៅនេះ៕