រុស្ស៊ី​ នឹង​អភិវឌ្ឍ​ប្រព័ន្ធ​មី​ស៊ី​ល​ថ្មី​ក្នុង​រយៈពេល​២​ឆ្នាំ ក្រោយ​ការដកខ្លួន​ចេញពី​សន្ធិសញ្ញា

រដ្ឋមន្ត្រី​ក្រសួងការពារជាតិ​រុស្ស៊ី​លោក Sergei Shoigu កាលពី​ថ្ងៃ​អង្គារ​បាន​និយាយថា ប្រទេស​នេះ​ត្រូវតែ​អភិវឌ្ឍ​ប្រព័ន្ធ​មី​ស៊ី​ល​ប្រភេទ​ថ្មី​ក្នុង​រយៈពេល​ពីរ​ឆ្នាំ​ខាងមុខ​ទៀត​ បន្ទាប់ពី​ទីក្រុង​វ៉ាស៊ីនតោន​និង​ទីក្រុង​មូ​ស្គូ​ចាក​ចេញពី​សន្ធិសញ្ញា​គ្រប់គ្រង​អាវុធ​ដ៏​សំខាន់​មួយ​។​

សហរដ្ឋអាមេរិក​បាន​ចោទប្រកាន់​ប្រទេស​រុស្ស៊ី​ម្តង​ហើយ​ម្តង​ទៀតថា​បាន​រំលោភ​លើ​កិច្ចព្រមព្រៀង​កងកម្លាំង​នុយក្លេអ៊ែរ​កម្រិត​មធ្យម (INF) ហើយ​កាលពី​ថ្ងៃ​សុក្រ​លោក​ប្រធានាធិបតី Donald Trump បាន​និយាយថា ក្រុង​វ៉ាស៊ីនតោន​បានចាប់ផ្តើម​ដំណើរការ​ដកខ្លួន​ចេញពី​សន្ធិសញ្ញា​នេះ​ក្នុង​រយៈពេល​៦​ខែ​។​

កាលពី​ថ្ងៃ​សៅរ៍ ប្រធានាធិបតី​រុស្ស៊ី​លោក Vladimir Putin បាន​និយាយថា ក្រុង​មូ​ស្គូ​ក៏​នឹង​ចាក​ចេញពី​សន្ធិសញ្ញា​នេះ​ផងដែរ​ហើយ​ចាប់ផ្តើម​ការងារ​លើ​អាវុធ​ប្រភេទ​ថ្មី​ដែល​នឹង​រំលោភ​លើ​កិច្ចព្រមព្រៀង​សម័យ​សង្គ្រាមត្រជាក់​ដ៏​សំខាន់​មួយ​នេះ​។​

ក្រុមអ្នកវិភាគ​បាន​និយាយថា ការបោះបង់ចោល​សន្ធិសញ្ញា​ឆ្នាំ​១៩៨៧​មួយ​នេះ​បានបង្ហាញ​សញ្ញា​អំពី​ការចាប់ផ្តើម​នៃ​ការប្រកួតប្រជែង​សព្វាវុធ​ថ្មី​។​

នៅក្នុង​កិច្ចប្រជុំ​មួយ​ជាមួយ​ក្រុមមន្ត្រី​កាលពី​ថ្ងៃ​អង្គារ លោក Shoigu បាន​និយាយថា ប្រទេស​រុស្ស៊ី​គួរតែ​អភិវឌ្ឍ​ប្រព័ន្ធ​មី​ស៊ី​ល​ថ្មី​ចំនួន​ពីរ​ក្នុង​រយៈពេល​ពីរ​ឆ្នាំ​ខាងមុខ​ទៀត​។​

លោក Shoigu បាន​ប្រាប់​ក្រុមមន្ត្រី​ការពារជាតិ​ថា “​ក្នុងអំឡុង​ឆ្នាំ​២០១៩-២០២០ យើង​ត្រូវតែ​អភិវឌ្ឍ​ប្រព័ន្ធ​មាន​មូលដ្ឋាន​លើដី​គោក​ឈ្មោះ Kalibr ដែល​បំពាក់​ដោយ​មី​ស៊ី​ល​រយៈ​ចម្ងាយ​ឆ្ងាយ​ដែល​បានបង្ហាញ​ពី​លទ្ធផល​យ៉ាង​ល្អ​នៅក្នុង​ប្រទេស​ស៊ី​រី​”​។​

លោក​បាន​និយាយថា “​ក្នុង​រយៈពេល​ដូចគ្នានេះ យើង​ក៏​នឹង​ត្រូវតែ​បង្កើត​ប្រព័ន្ធ​មី​ស៊ី​ល​ដែលមាន​មូលដ្ឋាន​លើដី​គោក​ជាមួយ​មី​ស៊ី​ល​ល្បឿន​លឿន​ជាង​សំឡេង​រយៈ​ចម្ងាយ​ឆ្ងាយ​ផងដែរ​”​។​

រដ្ឋមន្ត្រី​ការពារជាតិ​រូបនេះ​បាន​និយាយថា ផែនការ​នេះ​ត្រូវបាន​យល់ព្រម​ដោយ​លោក Putin ។​
គួរ​បញ្ជាក់ថា កិច្ចព្រមព្រៀង INF បាន​ហាម​មិន​ឲ្យ​បាញ់​មី​ស៊ី​ល​រយៈ​ខ្លី​និង​មធ្យម​ចេញពី​ដីគោក​ប៉ុន្ដែ​មិន​ហាមឃាត់​មី​ស៊ី​ល​ដែល​បាញ់​ចេញពី​អាកាស​ឬ​សមុទ្រ​ទេ​ដែល​ប្រទេស​រុស្ស៊ី​មាន​រួចទៅហើយ​៕ AFP

​

Source: Kampuchea Thmey Daily