សៀមរាប ៖ បុរសវ័យ៥៣ឆ្នាំម្នាក់ បានដាច់ចិត្តចូលទៅសាលាឃុំរលួស ដើម្បីដាក់ពាក្យប្តឹងប្រពន្ធរបស់ខ្លួន ដែលមានវ័យ១៧ឆ្នាំ ទើបនឹងរៀបការថ្មីថ្មោង ហើយបានចុះចេញពីផ្ទះដោយមិនប្រាប់ដំណឹង។ ករណីនេះ បុរសជាប្តីដាក់ពាក្យបណ្តឹងទារថ្លៃបណ្ដាការមកវិញ។
ជាក់ស្ដែង នៅព្រឹកថ្ងៃទី០៩ ខែកុម្ភៈ ឆ្នាំ២០១៩នេះ លោក សាត ឧស្សា ភេទប្រុស អាយុ៥៣ឆ្នាំ បានរៀបរាប់ប្រាប់អ្នកកាសែតថា នៅព្រឹកថ្ងៃទី០៨ ខែកុម្ភៈ ឆ្នាំ២០១៩ ម្សិលមិញនេះ លោកបានដាច់ចិត្តចូលទៅសាលាឃុំរលួសដើម្បីដាក់ពាក្យប្តឹងប្រពន្ធរបស់ខ្លួនដែលមានវ័យ១៧ឆ្នាំ ទើបនឹងរៀបការថ្មីថ្មោង បាន១សប្ដាហ៍ ហើយបានចុះចេញពីផ្ទះដោយមិនប្រាប់ដំណឹងដល់គាត់សោះ រួចទៅរស់នៅជាមួយម្តាយបង្កើតរបស់គាត់។ ករណីនេះ បុរសជាប្តីដាក់ពាក្យបណ្ដឹងទារថ្លៃបណ្ដាការមកវិញ។
លោកបន្តថា លោកបានចាប់ដៃគ្នារៀបការនៅខែមីនា ឆ្នាំ២០១៨ ជិត១ឆ្នាំហើយ ជាមួយប្រពន្ធឈ្មោះ ច័ន្ទ សុធាវី។ ប៉ុន្តែហាក់រស់នៅមិនចុះសម្រុងនឹងគ្នាសោះ។
លោកបន្ថែមថា ករណីនេះ បុរសជាប្តីដាក់ពាក្យបណ្តឹងទារថ្លៃបណ្ដាការមកវិញចំនួន៦.០០០ដុល្លារ សហរដ្ឋអាមេរិក។
ចំណែក លោក ច័ន្ទ ថ្លៃ ត្រូវជាឪពុកស្ត្រីវ័យ១៧ឆ្នាំ បានរៀបរាប់ប្រាប់ថា លោកនៅមិនទាន់ដឹងច្បាស់ពីការប្តឹងផ្តល់នេះនៅឡើយទេ។ តែលោកថា ឥឡូវនេះលោករវល់ពេក ចាំទំនេរសិន នឹងរកពេលដោះស្រាយគ្នាម្តង។
លោកបន្តថា នេះជារឿងគ្រួសាររបស់កូនគាត់ ហើយបើកូនរស់នៅមិនមានសេចក្តីសុខ គឺនាង(កូន)មានសិទ្ធិចុះចេញចែកផ្លូវគ្នាបាន។ ព្រោះលោកមិនអាចបង្ខិតបង្ខំកូនបានទេ។
ទាក់ទិននឹងករណីនេះដែរ អ្នកព័ត៌មានមិនអាចទាក់ទងសុំការពន្យល់ពីមេឃុំរលួស ក្នុងស្រុកប្រាសាទបាគង បានទេ នៅរសៀលថ្ងៃទី០៩ ខែកុម្ភៈ ឆ្នាំ២០១៩នេះ៕
Source: Kampuchea Thmey Daily
0 Comments