ភ្នំពេញ ៖ បន្ទាប់ពីត្រូវបានព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានចេញព្រះរាជ្យក្រឹត្យលុបឈ្មោះលោក គឹម រស្មី មេបញ្ជាការប៉េអិមខេត្តរតនគិរីចេញពីក្របខណ្ឌ នៃកងយោធពលខេមរភូមិន្ទ កាលពីថ្ងៃទី០៩ ខែកុម្ភៈ មក អង្គភាពប្រឆាំងអំពើពុករលួយ (ACU) បានចាប់ផ្តើមដំណើការបើកការស៊ើបអង្កេតហើយ នេះបើតាមការបញ្ជាក់ពីមន្ត្រីជាន់ខ្ពស់អង្គភាពនេះ។
ការលុបឈ្មោះលោក គឹម រស្មីចេញពីក្របខណ្ឌកងយោធពលខេមរភូមិន្ទ ក៏ដូចជាការចាប់ផ្តើមបើកការស៊ើបអង្កេត របស់អង្គភាពប្រឆាំងអំពើពុករលួយ (ACU) នេះ បានធ្វើឡើង ខណៈលោក គឹម រស្មី ដែលជាមេបញ្ជាការអាវុធហត្ថខេត្តរតនគិរី កាលពីយប់ថ្ងៃទី០៥ ខែកុម្ភៈ ឆ្នាំ២០១៩ បានប្រកាសនៅលើវេទិកាមួយ ក្នុងពិធីខួបកំណើតកូនរបស់ខ្លួន ដោយចែកប្រាក់ដល់កូនៗចំនួន៥នាក់ ដោយម្នាក់ៗទទួលបាន១០ម៉ឺនដុល្លារ សរុប៥០ម៉ឺនដុល្លារ ថែមទាំងអួតអំពីតម្លៃ វ៉ែនតា ស្បែកជើង ខ្សែក្រវាត់ ឬអាវជាដើម ដែលអាវមួយមានតម្លៃ២ពាន់ដុល្លារអាមេរិកជាដើម។ ជាមួយគ្នានោះ ក្នុងកម្មវិធីនោះ លោកមេបញ្ជាការ ក៏បានបញ្ជាក់ពីការ “យកត្រីតូច ស្ទូចយកត្រីធំ” ផងដែរ។
ក្រោយពិធីនោះ វីដេអូរបស់លោក គឹម រស្មី ដែលបានអួតពីការចំណាយលុយដល់កូនៗរបស់ខ្លួន ជាសាធារណៈ ដើម្បីបង្កើតមុខរបររកស៊ីនេះ ត្រូវបានបង្ហោះ ដោយគណនីហ្វេសប៊ុកមួយឈ្មោះថា “Gee Yong”។ បន្ទាប់ពីឃើញវីដេអូនេះ មហាជន ក៏ដូចជាអ្នកលេងហ្វេសប៊ុកជាច្រើន បានដាក់ការសង្ស័យថា ឧត្តមសេនីយ៍ត្រី គឹម រស្មី ដែលសម្ញែងលុយដ៏ច្រើនសន្ធឹកសន្ធាប់បែបនេះ អាចមានការពាក់ព័ន្ធនឹងអំពើពុករលួយ ដោយសារតែប្រាក់បៀវត្សរបស់គាត់ នឹងមិនអាចមានចំនួនច្រើនបែបនេះឡើយ ហើយក៏បានដាក់សង្ស័យថា អាចជាប់ទាក់ទងបទល្មើសព្រៃឈើទៀតផង។
លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) មិនអាចស្វែងការបញ្ជាក់តាមទូរស័ព្ទបានទេ ប៉ុន្តែលោកបានមានប្រសាសន៍ប្រាប់អ្នកសារព័ត៌មានថា អង្គភាពប្រឆាំងអំពើពុករលួយ (ACU) បានចាប់ផ្តើមបើកការស៊ើបអង្កេតលើអតីតមេបញ្ជាការកងរាជអាវុធហត្ថខេត្តរតនគិរី លោក គឹម រស្មី ហើយ តែលទ្ធផលយ៉ាងណានោះ លោកនៅមិនទាន់បង្ហាញបានទេ ហើយការស៊ើបអង្កេតនេះ ក៏មិនមែនធ្វើតាមពាក្យបណ្តឹងរបស់អង្គការNGO ណានោះដែរ គឺកម្លាំងជំនាញរបស់ ACU បានបើកការស៊ើបអង្កេតតាំងពីមានតម្រុយមុនមានករណីនេះម្ល៉េះ។
ប្រធានសមាគមជ័យលាភីបញ្ញាជនកម្ពុជា លោក រស់ សារ៉ុម បានថ្លែងប្រាប់កម្ពុជាថ្មី កាលពីព្រឹកថ្ងៃទី១១ ខែកុម្ភៈថា លោកមិនបានដាក់ពាក្យប្តឹងទេ ដោយសារ ACU បានចាប់ផ្តើមទៅហើយ ពីព្រោះ ACU ជាស្ថាប័នច្បាប់មានសិទ្ធគ្រប់គ្រាន់ក្នុងការធ្វើរឿងនេះ ហើយការបើកការស៊ើបអង្កេតលើអតីតមេបញ្ជាការកងរាជអាវុធហត្ថខេត្តរតនគិរី លោក គឹម រស្មី នេះ គឺធ្វើឡើងតាមអ្វីដែលជាការចង់បានរបស់សមាគមជ័យលាភីបញ្ញាជនកម្ពុជា ទោះបីយើងមិនបានដាក់ពាក្យប្តឹង តែនេះបំណងរបស់យើង។ លោកបញ្ជាក់ថា “ក្នុងនាមសង្គមស៊ីវិល ការដកតំណែងលោក គឹម រស្មី តែមួយមុខ ហើយអ្វីៗចប់នោះ វាមិនបានឆ្លុះបញ្ចាំងពីទិដ្ឋភាពច្បាប់ទេ ដូច្នេះមានតែការបើកការស៊ើបអង្កេតលើលោក គឹម រស្មី ថាតើមានកំហុសអត់ ? “
សូមបញ្ជាក់ថា ព្រះករុណា ព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា កាលពីថ្ងៃទី៩ ខែកុម្ភៈ ឆ្នាំ២០១៩ បានចេញព្រះរាជក្រឹត្យលុបឈ្មោះលោក គឹម រស្មី មេបញ្ជាការកងរាជអាវុធហត្ថខេត្តរតនគិរី ចេញពីក្រមខណ្ឌ នៃកងយោធពលខេមរភូមិន្ទ។ ចំណែកសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបង្ហោះសារមួយពាក់ព័ន្ធករណីមេបញ្ជាកងរាជអាវុធហត្ថខេត្តរតនគិរីនេះ ដោយសម្តេចបានសរសេរថា “នេះគឺជាវះកាត់ប្រកបដោយការឈឺចាប់។ នេះជាអភិក្រមទី៥ គឺការវះកាត់“។
អភិក្រមទាំង៥ របស់សម្តេចតេជោ ហ៊ុន សែន ដែលដាក់ចេញនៅក្នុងអាណត្តិទី៦នេះ ដើម្បីរំលឹកដល់មន្ត្រីទាំងអស់ឲ្យខិតខំបម្រើជាតិ កុំកេងប្រវ័ញ្ច ឬពុករលួយ ដែលអភិក្រមទាំង៥នោះ រួមមាន ទី១, ឆ្លុះកញ្ចក់ ទី២, ងូតទឹក ទី៣, ដុសក្អែល ទី៤, ព្យាបាល និងទី៥, វះកាត់៕
Source: Kampuchea Thmey Daily
0 Comments