ភ្នំពេញ ៖ ដោយសារទុស្សេខ្សែភ្លើង បង្កឲ្យមានអគ្គិភ័យឆាបឆេះឃ្លាំងស្តុកកម្ទេចក្រណាត់ក្នុងរោងចក្រផលិតស្បែកជើងម៉ារូឈុន អស់ចំនួន៥បន្ទប់ រងការខូចខាតទាំងស្រុង បង្កឲ្យមានការភ្ញាក់ផ្អើលដល់កម្លាំងសមត្ថកិច្ចមូលដ្ឋាន និងពលរដ្ឋ ចុះមកជួយ តែជនជាតិម្នាក់ គ្រាន់តែឃើញឡានទឹកទៅដល់ បានចាក់សោទ្វាររបងរោងចក្រក្រឹប ដោយមិនខ្វល់ពីការឆេះខូចខាតអ្វីឡើយ ទោះជាយ៉ាងណា សមត្ថកិច្ចនគរបាលខណ្ឌ បានធ្វើអន្តរាគមន៍ឲ្យរថយន្តចូលបាញ់ទឹកពន្លត់ទាល់តែបាន កាលពីវេលាម៉ោង៣និង៣០នាទីទៀបភ្លឺព្រឹក ថ្ងៃទី៦ ខែកុម្ភៈ ឆ្នាំ២០១៩ ស្ថិតនៅចំណុចរោងចក្រផលិតស្បែកម៉ារូឈុន តាមបណ្តោយផ្លូវបេតុង ខាងត្បូងផ្សារទួលពង្រ ប្រមាណជា៥០ម៉ែត្រ ក្នុងសង្កាត់ចោមចៅ១ ខណ្ឌពោធិ៍សែនជ័យ។
ក្នុងហេតុការណ៍នេះ ពុំបណ្ដាលឲ្យមនុស្សណាម្នាក់រងរបួស ឬគ្រោះថ្នាក់អ្វីនោះទេ ពោលគឺគ្រាន់តែឆេះខូចខាតកម្ទេចក្រណាត់ក្នុងឃ្លាំងតែប៉ុណ្ណោះ។
តាមប្រភពពីសន្តិសុខយាមនៅកន្លែងកើតហេតុបានឲ្យដឹងថា មុនកើតហេតុ គាត់ឃើញទុស្សេខ្សែភ្លើងចេញពីចំណុចឃ្លាំងស្តុកកម្ទេចក្រណាត់ ហើយចេញជាអណ្តាតភ្លើង ភ្លាមនោះរូបគាត់ក៏បាននាំគ្នាស្រែក ហើយជនជាតិចិនដែលស្នាក់នៅក្នុងរោងចក្រឲ្យភ្ញាក់ឡើង រួចក៏នាំគ្នាយកបំពង់ពន្លត់អគ្គិភ័យបាញ់អស់៣បំពង់ និង ទាញទុយយោបាញ់ទឹក ប៉ុន្តែដោយសារភ្លើងនៅតែឆេះខ្លាំងពេកក៏បានរាយការណ៍ទៅក្រុមរថយន្តពន្លត់អគ្គិភ័យ ចុះមកជួយអន្តរាគមន៍ចំនួន៩គ្រឿង តែអ្វីគួរឲ្យហួសចិត្តនោះ រថយន្តពន្លត់អគ្គិភ័យចុះមកដល់ ស្រាប់តែជនជាតិចិនបញ្ជាឲ្យសន្តិសុខចាក់សោទ្វារមិនឲ្យរថយន្តចូលជួយសង្គ្រោះឡើយ។ បន្ទាប់មក ដោយមានការបញ្ជាផ្ទាល់ពីលោកអធិការខណ្ឌពោធិ៍សែនជ័យ ទើបកម្លាំងសមត្ថកិច្ច សម្រេចចិត្តកាត់សោទ្វារចូលទៅដល់ក្នុងរោងចក្រ រួចបានបាញ់ទឹកអស់ចំនួន៤រថយន្ត ប្រើពេលវេលាអស់ជាងកន្លះម៉ោង ទើបបានរលត់ទៅវិញទាំងស្រុង។
ក្នុងករណីអគ្គិភ័យឆាបឆេះឃ្លាំងស្តុកកម្ទេចក្រណាត់ ក្នុងរោងចក្រផលិតស្បែងជើងម៉ារូឈុននេះអស់ចំនួន៥បន្ទប់ ខូចខាតទាំងស្រុង តែមិនបង្កឲ្យមានអ្នករងរបួសនោះទេ៕
Source: Kampuchea Thmey Daily
0 Comments