ស្វាយរៀង ៖ កាលពីរសៀលថ្ងៃទី៧ ខែកុម្ភៈ ឆ្នាំ២០១៩ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន បានសហការជាមួយអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក និងមន្ទីរសាធារណការ និងដឹកជញ្ជូនខេត្តស្វាយរៀង រួមទាំងមានការចូលរួមពីលោកនាយកវិទ្យាល័យស្វាយរៀង តំណាងនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តស្វាយរៀង សាខាកាកបាទក្រហមកម្ពុជាខេត្តស្វាយរៀង បានរៀបចំកម្មវិធីចុះអប់រំផ្សព្វផ្សាយច្បាប់ ស្ដីពីចរាចរណ៍ផ្លូវគោក នៅវិទ្យាល័យស្វាយរៀង ក្រុងស្វាយរៀង ដែលមានអ្នកចូលរួម ពីសិស្សានុសិស្ស យុវជនកាយរឹទ្ធិ យុវជនស.ស.យ.ក ក្រុងស្វាយរៀង សរុបចំនួន ១.៥៦៣នាក់ (ស្រី ៨៨៧នាក់)។
កម្មវិធីអប់រំផ្សព្វផ្សាយនាពេលនេះ រៀបចំឡើងដើម្បីផ្តល់នូវចំណេះដឹងបន្ថែម ស្តីពីសុវត្ថិភាពចរាចរណ៍ ដល់អ្នកប្រើប្រាស់ផ្លូវ ជាពិសេសសិស្សានុសិស្ស ដែលស្ថិតក្នុងវ័យប្រើប្រាស់កង់ ឬម៉ូតូ ជាមធ្យោបាយធ្វើដំណើរ និងជាជនងាយរងគ្រោះថ្នាក់ដោយសារគ្រោះថ្នាក់ចរាចរណ៍ ឲ្យមានការយល់ដឹងកាន់តែច្បាស់ ក៏ដូចជាការពញ្ញាក់ស្មារតីឲ្យមានការប្រុងប្រយ័ត្ន និងត្រូវគោរពច្បាប់ចរាចរណ៍ផ្លូវគោកទាំងអស់គ្នា ឲ្យបានខ្ជាប់ខ្ជួន ហើយយកចំណេះដឹងដែលខ្លួនទទួលបានទៅអប់រំ និងផ្សព្វផ្សាយបន្តដល់ក្រុមគ្រួសារ និងមិត្តភ័ក្ដិ។
ក្នុងកម្មវិធីអប់រំផ្សព្វផ្សាយនេះ មានការចែកជូននូវឯកសារពាក់ព័ន្ធ ស្តីពីសុវត្ថិភាពចរាចរណ៍ និងការសួរសំណួរ ហើយឆ្លើយ ដើម្បីទទួលបានរង្វាន់ជាមួកសុវត្ថិភាព។
ឱកាសនោះ ក្រុមការងារ បានចែកជូននូវសម្ភារៈ ពាក់ព័ន្ធនឹងសុវត្ថិភាពចរាចរណ៍រួមមាន ៖
១.មួកសុវត្ថិភាព ១១០មួក (មួកសម្រាប់មនុស្សធំ)។
២.សៀវភៅច្បាប់ ស្ដីពីចរាចរណ៍ផ្លូវគោក ៨០០ក្បាល។
៣.ស្ទីកឃ័រចំណាំងផ្លាតសុវត្ថិភាព ៨០០សន្លឹក។
៤.សៀវភៅអ្វីដែលអ្នកបើកបរម៉ូតូត្រូវយល់ដឹង ៨០០ក្បាល។
៥.ខិត្តប័ណ្ណជំនួយស្មារតី ស្តីពីសុវត្ថិភាពចរាចរណ៍ ៨០០ច្បាប់។
៦.ផ្ទាំងសញ្ញាថ្មើរជើង ៥០ផ្ទាំង៕
Source: Kampuchea Thmey Daily
0 Comments