ភ្នំពេញ ៖ មន្ត្រីក្រសួងធនធានទឹក ដែលរងការចាប់ខ្លួន និង ប្រើហិង្សាពីសំណាក់ សមត្ថកិច្ចស្លៀកពាក់ស៊ីវិលមួយក្រុមមកពីជំនាញមន្ទីរប្រឆាំងគ្រឿងញៀន ក្រសួងមហាផ្ទៃ បានសម្រេចចិត្ត រៀបចំ ពាក្យបណ្ដឹង ប្តឹងសមត្ថកិច្ចទាំងនោះ តាមផ្លូវច្បាប់ ក្រោយពីពួកគេចាប់វាយខ្នោះ និងប្រើប្រាស់អំពើហិង្សាលើរូបគាត់ទាំងកំរោល ដោយពុំមានកំហុស។
សកម្មភាព នៃហិង្សានេះបានកើតឡើង កាលពីវេលាម៉ោង១១យប់ ថ្ងៃទី០៨ ខែកុម្ភៈ ឆ្នាំ២០១៩ នៅចំណុច ច្រមុះជ្រូកក្បាលថ្នល់ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
ជនរងគ្រោះ ដែលអះអាងថា ខ្លួនត្រូវសមត្ថកិច្ចស្លៀកពាក់ស៊ីវិលចាប់វាយខ្នោះដៃដាក់ទៅក្រោយ និងទះ៥កំផ្លៀងនោះ មាន ឈ្មោះ ឡាយ ប៊ុនថូ អាយុ៣១ឆ្នាំ ស្នាក់នៅសង្កាត់ទួលទំពូង២ ផ្លូវ៤៧៦ ខណ្ឌចំការមន ធ្វើការនៅនាយកដ្ឋានការត្រួតពិនិត្យ ធ្វើអាជីវកម្ម និងអភិរក្ស នៃក្រសួងធនធានទឹក ។
តាមសេចក្ដីរាយការណ៍នៅកន្លែងកើតហេតុបានឲ្យដឹងថា នៅវេលាម៉ោងខាងលើ ខណៈដែលជនរងគ្រោះ ចេញពីក្នុងឡាន ក៏ស្រាប់តែ មានជនស្លៀកពាក់ស៊ីវិល ប្រមាណជា១០នាក់ មកចាប់ គ្រៀក ហើយបុរសម្នាក់ ពាក់ អាវ.ស ចាប់វាយខ្នោះ និងប្រើប្រាស់អំពើហិង្សាលើរូបគាត់ទាំងកំរោល និងចាប់ញាត់ចូលក្នុងឡានដឹកទៅកាន់អគ្គស្នងការនគរបាលជាតិទាំងយប់ ដោយគ្មានសាកសួរ អ្វីសោះ និងបានចោទប្រកាន់ថា បុរសរូបនោះជាប់ពាក់ព័ន្ធនឹងគ្រឿងញៀន។ ក្រោយពីបញ្ជូនទៅដល់ កន្លែង សមត្ថកិច្ចរកមិនឃើញមានបទល្មើស ក៏បានដោះលែងឲ្យមកវិញ ដោយសារនិយាយថាចាប់ ច្រឡំ ឲ្យគេសុំទោស ប៉ុន្តែបុរសរងគ្រោះមិនព្រមឡើយ។
តាមសេចក្ដីរាយការណ៍ដដែលបន្តថា ក្រោយពីសមត្ថកិច្ចដោះលែង លោក ឡាយ ប៊ុនថូ អាយុ៣១ឆ្នាំ ស្នាក់នៅសង្កាត់ទួលទំពូង២ ផ្លូវ៤៧៦ ខណ្ឌចំការមន ធ្វើការនៅនាយកដ្ឋានការត្រួតពិនិត្យ ធ្វើអាជីវកម្ម និងអភិរក្ស នៃក្រសួងធនធានទឹក ដែលជាជនរងគ្រោះ ក្នុងអំពើហិង្សា និងការចាប់ច្រឡំនេះ បានឡាយវីដេអូ នៅលើបណ្ដាញសង្គម ភ្លាមៗ នោះថា នៅមុនពេលកើតហេតុ លោក រួមនឹង មិត្តភ័ក្ដិ បានជិះរថយន្ត ទៅម្តុំក្បាលថ្នល់ ខណៈនោះ ក៏ស្រាប់តែមានជនស្លៀកពាក់ស៊ីវិលមួយក្រុម មានគ្នា ប្រមាណជា១០នាក់ មកចាប់គ្រឿងញៀន និងវាយខ្នោះ គាត់ទាំងកំរោល នៅពេលនោះ គាត់ក៏បានសួរទៅជនស្លៀកពាក់ស៊ីវិលនោះ ចាប់គាត់មានរឿងអ្វី ក៏ត្រូវគេវាយជាច្រើនដៃ ចាប់ញាត់បញ្ចូលទៅក្នុងរថយន្ត ជាមួយជនសង្ស័យគ្រឿងញៀនមួយចំនួនទៀត មិនតែប៉ុណ្ណោះ ថែមទាំងទះលោកបន្ថែមទៀត មុនពេលបញ្ជូនទៅដល់អគ្គស្នងការនគរបាលជាតិ ដោយសារតែ លោកសួរនាំរឿងចាប់លោក ខុសអី។
លោកបន្តថា ក្រោយពីសាកសួរលោក ក្រុមជនសង្ស័យផ្សេងទៀត ថា លោកមិនមានការជាប់ពាក់ព័ន្ធទេ មន្ត្រីទាំងនោះបានធ្វើការសូមទោស ដោយ និយាយថា ជារឿងចាប់ច្រឡំ រួចក៏ដោះលែងលោកឲ្យត្រឡប់មកវិញ។
លោក ឡាយ ប៊ុនថូ បានបញ្ជាក់ថា ករណីនេះ លោកមិនសុខចិត្តទេ នូវទង្វើដ៏ឃោរឃៅរបស់មន្ត្រី ទាំងនោះ ដែលបានធ្វើសកម្មភាព និងទង្វើ មកលើរូបលោក ហើយនៅព្រឹកថ្ងៃទី៩កុម្ភៈ នេះ លោក នឹងរៀបចំពាក្យបណ្ដឹង ប្ដឹងមន្ត្រីទាំងនោះ ពីរបទល្មើស គឺ បទហិង្សាលោកដោយចេតនា និងប្តឹងទៅនាយកដ្ឋានប្រយុទ្ធប្រឆាំងគ្រឿងញៀន ពីការអនុវត្តិនីតិវិធី។
តាមប្រភពព័ត៌មានបានឲ្យដឹងថា ករណីនេះ នាយឧត្ដមសេនីយ៍ ម៉ក់ ជីតូ អគ្គស្នងការរងនគរបាលជាតិ និងជាអគ្គលេខាធិការរង អាជ្ញាធរជាតិប្រយុទ្ធប្រឆាំងគ្រឿងញៀន (អ.ជ.ប.គ.ញ), បានថ្លែងថាលោក នឹង ចាត់វិធានការឲ្យបានតឹងរ៉ឹង ចំពោះមន្ត្រីដែលប្រព្រឹត្តខុសក្នុងករណីខាងលើនេះ៕
Source: Kampuchea Thmey Daily
0 Comments