ឧត្តរមានជ័យ ៖ កាលពីវេលាម៉ោង០១និង២៥នាទី នៅថ្ងៃទី០៩ ខែកុម្ភៈ ឆ្នាំ២០១៩ កម្លាំងអធិការនគរបាលស្រុកអន្លង់វែង បានសហការជាមួយកម្លាំងអធិការនគរបាលស្រុកកងមាស ខេត្តកំពង់ចាម ចុះអនុវត្តដីកាបង្គាប់ឲ្យចាប់ខ្លួននិងឃុំខ្លួនលេខ១១៣ ព.ស ចុះថ្ងៃទី១២ ខែមីនា ឆ្នាំ២០១៤ របស់សាលាដំបូង ខេត្តកំពង់ចាម ចេញដោយ លោក រៀល សុភិន ព្រះរាជអាជ្ញារង តំណាងអយ្យការអមសាលាដំបូង បង្គាប់ឲ្យចាប់ខ្លួនជនជាប់ចោទ ឈ្មោះ ម៉ូវ ម៉យ ភេទប្រុស អាយុ៣៥ឆ្នាំ ពីបទឃាតកម្មគិតទុកជាមុន ដែលបានប្រព្រឹត្តកាលពីថ្ងៃទី០៦ ខែវិច្ឆិកា ឆ្នាំ២០០៩ នៅភូមិបារ៉ាយក្រោម ឃុំបារ៉ាយ ស្រុកកងមាស ខេត្តកំពង់ចាម និងត្រូវបានតុលាការផ្ដន្ទាទោសឲ្យជាប់ពន្ធនាគារ១២ឆ្នាំ គិតពីថ្ងៃចាប់ខ្លួន។
សមត្ថកិច្ចបានឲ្យដឹងថា ជនជាប់ចោទត្រូវបានចាប់ខ្លួននៅចំណុចភូមិត្រពាំងតាវ ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ បន្ទាប់ចាប់ខ្លួនកម្លាំងសមត្ថកិច្ចយើង បានដំណើរការឆែកឆេរលំនៅឋានជនជាប់ចោទ ដើម្បីស្វែងរកវត្ថុតាងពាក់ព័ន្ធបទល្មើស ប៉ុន្តែពុំទទួលបានលទ្ធផលនោះទេ។
បច្ចុប្បន្ន ជនសង្ស័យខាងលើ ត្រូវបានសមត្ថកិច្ចយើងប្រគល់ជូនសមត្ថកិច្ចខេត្តកំពង់ចាម ជាម្ចាស់ករណីចាត់ការបន្តតាមនីតិវិធី៕
Source: Kampuchea Thmey Daily
0 Comments