ភ្នំពេញ ៖ តារាចម្រៀងOriginal Songប្រុសលោក ថេណា ពេលនេះកំពុងរងនូវដំបងនៃការរិះគន់យ៉ាងខ្លាំងពីសំណាក់មហាជនក៏ដូចជាអ្នកសិល្បៈ ព្រមទាំងមន្ត្រីរបស់ក្រសួងវប្បធម៌និងវិចិត្រសិល្បៈ។ ខណៈមានទស្សនៈជាច្រើនក៏បានស្នើឲ្យក្រសួងត្រូវចាត់វិធានការក្តៅលើតារាប្រុសរូបនេះ។
ការផ្ទុះប្រតិកម្មនេះ បានកើតឡើងភ្លាមៗ ក្រោយពេលដែលតារាចម្រៀងលោកថេណា និងលោក YT បានធ្វើការទម្លាយផ្សព្វផ្សាយនូវចម្រៀងរ៉េបរបស់ខ្លួននៅលើបណ្តាញសង្គមហ្វេសប៊ុក និងយូធូបមានចំណងជើងថា អេម ។ អត្ថន័យបទនេះបានច្រៀងរៀបរាប់បង្កប់អត្ថន័យជុំវិញរឿងរ៉ាវអាម៉ាស់របស់មនុស្សស្រី គ្រាឡើងលើគ្រែជាមួយគ្នា។
ស្របពេលដែលកំពុងមានការរិះគន់យ៉ាងក្តៅគគុកពីសំណាក់ទស្សនិកជននិងអ្នកសិល្បៈមួយចំនួននោះដែរ លោកថៃ នរៈសត្យា រដ្ឋលេខាធិការ និង ជាអ្នកនាំពាក្យរបស់ក្រសួងវប្បធម៌និងវិចិត្រសិល្បៈ បានចេញមុខប្រតិកម្មនិងបង្ហាញការមិនពេញចិត្តចំពោះការផ្សព្វផ្សាយបទ អេម របស់លោក ថេណា និង YT នៅបណ្តាញសង្គមដូច្នេះ។ ប៉ុន្តែគេមិនទាន់ដឹងនៅឡើយទេថាក្រសួងនឹងមានវិធានការបែបណាលើតារាប្រុសរូបនោះ។
លោក ថៃ នរៈសត្យាបានលើកឡើងថា ទស្សនៈយ៉ាងម៉េចហ្នឹងដែលអាចបង្កើតគំនិតផលិតស្នាដៃរបៀបនេះ?។ ជាអ្នកនិពន្ធជាអ្នកចម្រៀង ជាអ្នកសិល្បៈ ជាសាធារណៈបុគ្គល គួរតែជាគំរូល្អជាសាធារណៈជាពិសេស ចំពោះប្អូនៗយើងជំនាន់ក្រោយ តែនេះមិនអ៊ីចឹងទេបែរជាបន្ទាបបន្ថោកខ្លួនឲ្យក្លាយជាអ្នកបំពុលនិងបំផ្លាញខ្លួនក្នុងវិស័យវប្បធម៌របស់ជាតិខ្លួនទៅវិញ។
លោក ថៃ នរៈសត្យា បានបន្ថែមថា មិនយល់តើសង្ឃឹមមានអ្នកគាំទ្រភាពលីលានេះបានប៉ុន្មាននាក់ទៅហ្នឹង ? បើគ្រាន់តែងើបក្បាលមកត្រូវមហាជនសំពងយ៉ាងដំណំទៅហើយនោះ យករឿងដាក់ខ្លួនមែន។
ដោយឡែកភ្លាមៗនោះដែរប្រធានសមាគមសិល្បករខ្មែរអ្នកនាង ចន ច័ន្ទលក្ខិណា ក៏បានប្រតិកម្មដែរថា ទទួលយកអត់បានទេអូន រឿងអាម៉ាស់របស់មនុស្សស្រីណាអូន ។ ខ្លាំងអស្ចារ្យណាស់ប្អូនប្រុស ដែលយករឿងលើគ្រែរបស់ប្អូននិងមនុស្សស្រីមកអួតជាសាធារណៈអោយគេដឹងថាប្អូនពិតជាជាប់ចិត្ត និងពូកែនូវទង្វើសកម្មភាពបែបនោះរបស់មនុស្សស្រី។
អ្នកនាង ចន ច័ន្ទលក្ខិណាបានរៀបរាប់ទៀតថា បងសូមសរសើរអូនដែលក្លាហានរឿងបែបនេះជាច្បាប់ធម្មជាតិដែលបង្កើតមនុស្ស និង សត្វអោយមានតម្រេកតណ្ហាតែមនុស្សម្នាក់ៗគេមិននិយាយជាសាធារណៈនោះទេ ព្រោះជារឿងកេរខ្មាសរបស់មនុស្សទាំងបីភេទ។ ហើយអូនមានគិតទេថាទង្វើបែបនេះអ្នកម្តាយ និង បងស្រី ប្អូនស្រីរបស់ប្អូនក៏ធ្លាប់មានដែរ ហើយបើឪពុកឬ ដៃគូរួមភេទរបស់ពួកគាត់លើកយកទង្វើសកម្មភាពរួមភេទរបស់អ្នកទាំងនោះមកនិយាយជាសាធារណៈវិញតើអូនមានអារម្មណ៍បែបណា ?បងសូមទោសចំពោះហ្វេនៗរបស់ប្អូនប្រុសផង។
ករណីនេះដែរត្រូវបានទស្សនិកជនកំពុងរង់ចាំមើលថា តើក្រសួងវប្បធម៌និងវិចិត្រសិល្បៈនឹងចាត់វិធានការក្តៅបែបណាលើតារាចម្រៀងលោក ថេណា ក្រោយពេលដែរការរិះគន់កំពុងផ្ទុះឡើងស្ទើរមួយចំហៀងប្រទេស បន្ទាប់ពីចេញបទរ៉េបបែកស្លុយ អេម។ ខណៈដែលសាមីខ្លួនបានផុសការសូមទោសថា ពួកយើងនឹងធ្វើការremove បទចម្រៀងមួយបទនេះចេញ។សូមទោសអ្នកទាំងអស់គ្នាផងបាទអរគុណបាទសម្រាប់អ្នកដែលយកvideoទៅ post បន្តយើងមិនទទួលខុសត្រូវនោះទេ។
លោក ថេណា បានបញ្ជាក់ថា សូមទោសទៅដល់អ្នកទាំងអស់គ្នាដែលមិនពេញចិត្តនូវចម្រៀងមួយបទនេះខ្ញុំដឹងថាប៉ារ៉ូលវាខ្លាំងតែចម្រៀងបែបនេះមិនមែនមានតែខ្ញុំទេដែលធ្វើបងប្អូនមានចម្រៀងបរទេសចម្រៀងខ្មែរថៃ និងប្រទេសច្រើនណាស់ដែល rap បារូលបែបនេះខ្លាំងជាងខ្ញុំផងសិល្បៈនៃការ rap វាតែងតែមានពាក្យធ្ងន់ខ្លះហើយបងប្អូន ហើយខ្ញុំក៏បានដាក់ logo ដែលខ្ញុំគូរង្វង់សនឹងហើយដាក់ថា18+ទៀតហើយ។
តារារូបនេះបានបន្ថែមថា ខ្ញុំគ្រាន់តែជាអ្នកធ្វើភ្លេងតាម internet តែប៉ុណ្ណោះមិនមែនអ្នកចម្រៀងផ្លូវការឯណា ហើយបទនេះពួកខ្ញុំធ្វើលេងទុកស្ដាប់ជាមួយមិត្តភក្ដិខ្ញុំតែប៉ុណ្ណោះតែក៏ឃើញ fans របស់ខ្ញុំគាត់ចូលចិត្តក៏បង្ហោះទៅមិនបានលក់លើកទីផ្សារនោះទេ ខ្ញុំដឹងថាទោះនិយាយយ៉ាងម៉េចក៏នៅតែមានកំហុសព្រោះមនុស្សមានការគិតខុសគ្នាតែចង់បកស្រាយប្រាប់អ្នកទាំងអស់គ្នាអគុណបាទ៕
Source: Kampuchea Thmey Daily
0 Comments