មេបញ្ជាការកំពូលអាមេរិកដែលមើលការខុសត្រូវកងកម្លាំងអាមេរិកនៅតំបន់មជ្ឈិមបូព៌ាបាននិយាយកាលពីថ្ងៃអាទិត្យថា សហរដ្ឋអាមេរិកទំនងជានៅសល់ពេលត្រឹមតែប៉ុន្មានសប្តាហ៍ទៀតប៉ុណ្ណោះសម្រាប់ការចាប់ផ្តើមដកកងទ័ពជើងគោកចេញពីប្រទេសស៊ីរីតាមបញ្ជារបស់លោកប្រធានាធិបតី Donald Trump។
ឧត្តមសេនីយ៍ឯក Joseph Votel ដែលជាប្រមុខបញ្ជាការកណ្តាលអាមេរិកបានកត់សម្គាល់ថា ពេលវេលាពិតប្រាកដនឹងពឹងផ្អែកទៅលើស្ថានការណ៍នៅក្នុងប្រទេសស៊ីរីដែលជាកន្លែងយុទ្ធជនគាំទ្រដោយអាមេរិកបានបើកការវាយប្រហារផ្តាច់ព្រ័ត្រលើតំបន់របស់ក្រុមរដ្ឋឥស្លាមនៅជិតព្រំដែនប្រទេសអ៊ីរ៉ាក់។
យោធាអាមេរិកបានចាប់ផ្តើមដកសម្ភារៈចេញពីប្រទេសស៊ីរីរួចទៅហើយ។ នៅពេលសួរថាតើការដកកងទ័ពរបស់អាមេរិកជាង២ពាន់នាក់នឹងចាប់ផ្តើមនៅក្នុងរយៈពេលប៉ុន្មានថ្ងៃឬប៉ុន្មានសប្តាហ៍ទៀតនោះ លោក Votel បាននិយាយថា “ប្រហែលជាប៉ុន្មានសប្តាហ៍ទៀតប៉ុន្តែវានឹងត្រូវបានជំរុញដោយស្ថានភាពនៅលើដី”។
លោក Votel បានប្រាប់អ្នកយកព័ត៌មានដែលធ្វើដំណើរជាមួយគាត់អំឡុងការធ្វើដំណើរមួយទៅកាន់តំបន់មជ្ឈឹមបូព៌ាថា “ទាក់ទងនឹងការដកទ័ពនេះ ខ្ញុំគិតថាយើងកំពុងធ្វើដំណើរតាមផ្លូវដ៏ត្រឹមត្រូវ”។
ការប្រកាសដ៏ភ្ញាក់ផ្អើលរបស់លោក Trump នៅក្នុងខែធ្នូដែលថា លោកនឹងដកកងទ័ពអាមេរិកពីប្រទេសស៊ីរីបានបង្កឲ្យមានការលាលែងពីតំណែងរបស់រដ្ឋមន្ត្រីក្រសួងការពារជាតិលោក Jim Mattis ហើយបានបណ្តាលឲ្យមន្ត្រីយោធាអាមេរិកត្រូវធ្វើការយ៉ាងញាប់ដៃញាប់ជើងដើម្បីបង្កើតផែនការដកខ្លួន។
ទាហានរាប់រយនាក់បន្ថែមទៀតត្រូវបានបញ្ជូនទៅប្រទេសស៊ីរីដើម្បីសម្របសម្រួលការដកទ័ពនេះ។
មន្ត្រីអាមេរិកបានប៉ាន់ប្រមាណជាយូរមកហើយថា ការដកទ័ពនៅប្រទេសស៊ីរីអាចធ្វើឡើងរហូតដល់ខែមីនាឬមេសាដើម្បីប្រតិបត្តិឲ្យបានពេញលេញប៉ុន្តែមានការស្ទាក់ស្ទើរក្នុងការកំណត់ពេលវេលាពិតប្រាកដដោយសារតែលក្ខខណ្ឌសមរភូមិ។
មានសំណួរដ៏ធំមួយថា តើកងកម្លាំងសហរដ្ឋអាមេរិកមួយចំនួននៅប្រទេសស៊ីរីអាចរើទៅប្រទេសអ៊ីរ៉ាក់ដែលនៅជិតខាងដែរឬក៏យ៉ាងណា។ អ៊ីរ៉ាក់ជាប្រទេសដែលសហរដ្ឋអាមេរិកមានទាហានជាង៥,០០០នាក់កំពុងជួយដល់រដ្ឋាភិបាលក្រុងបាកដាដប្រយុទ្ធប្រឆាំងនឹងក្រុមរដ្ឋឥស្លាមហើយរារាំងការងើបឡើងវិញរបស់ក្រុមនេះ៕ REUTERS
Source: Kampuchea Thmey Daily
0 Comments