កាលពីថ្ងៃចន្ទ នាវាចម្បាំងអាមេរិកពីរគ្រឿង បានធ្វើដំណើរនៅជិតប្រជុំកោះ ដែលអះអាងដោយប្រទេសចិនក្នុងសមុទ្រចិនខាងត្បូង ដែលនេះជាទង្វើមួយអាចនឹងធ្វើឲ្យទីក្រុងប៉េកាំងខឹងសម្បាស្របពេលមានទំនាក់ទំនងតានតឹងរវាងប្រទេសមហាអំណាចសេដ្ឋកិច្ចទាំងពីរនេះ។
ទីក្រុងប៉េកាំងនិងទីក្រុងវ៉ាស៊ីនតោនកំពុងជាប់នៅក្នុងសង្គ្រាមពាណិជ្ជកម្មមួយហើយភាគីទាំងពីរកំពុងព្យាយាមឈានឲ្យដល់កិច្ចព្រមព្រៀងមួយមុនពេលកំណត់ថ្ងៃទី១ខែមីនានៅពេលដែលពន្ធអាមេរិកលើការនាំចូលរបស់ចិនក្នុងតម្លៃ២០០ពាន់លានដុល្លារត្រូវបានកំណត់ថានឹងកើនឡើងពី១០ភាគរយដល់២៥ភាគរយ។
ការកើនឡើងនៃភាពតានតឹងរវាងសហរដ្ឋអាមេរិកនិងចិនបានធ្វើឲ្យប្រទេសទាំងពីរត្រូវខាតបង់ទឹកប្រាក់រាប់ពាន់លានដុល្លារនិងបណ្តាលឲ្យទីផ្សារហិរញ្ញវត្ថុសកលមានភាពចលាចល។
មន្ត្រីម្នាក់ដែលនិយាយក្នុងលក្ខខណ្ឌមិនបញ្ចេញឈ្មោះបានឲ្យដឹងថា នាវាពិឃាដនាំផ្លូវមីស៊ីលចំនួនពីរគ្រឿងបានធ្វើដំណើរក្នុងរយៈចម្ងាយ១២ម៉ាយល៍នៃថ្មប៉ប្រះទឹក Mischief នៅក្នុងប្រជុំកោះ Spratly ដែលមានជម្លោះ។
ប្រតិបត្តិការនេះគឺជាការប៉ុនប៉ងចុងក្រោយបំផុតដើម្បីប្រឆាំងនឹងអ្វីដែលរដ្ឋាភិបាលក្រុងវ៉ាស៊ីនតោនមើលឃើញថាជាការខិតខំប្រឹងប្រែងរបស់ក្រុងប៉េកាំងដើម្បីដាក់កម្រិតលើសេរីភាពនៃការធ្វើនាវាចរណ៍នៅក្នុងដែនសមុទ្រយុទ្ធសាស្ត្រដែលជាកន្លែងកងទ័ពជើងទឹកចិន ជប៉ុននិងប្រទេសអាស៊ីអាគ្នេយ៍មួយចំនួនធ្វើប្រតិបត្តិការ។
ប្រទេសចិនបានទាមទារស្ទើរតែទាំងអស់នៃសមុទ្រចិនខាងត្បូងហើយជារឿយៗបានរិះគន់សហរដ្ឋអាមេរិកនិងសម្ព័ន្ធមិត្តរបស់ខ្លួនពាក់ព័ន្ធប្រតិបត្តិការកងទ័ពជើងទឹកនៅក្បែរប្រជុំកោះដែលកាន់កាប់ដោយប្រទេសចិន។
ប្រទេសចិននិងសហរដ្ឋអាមេរិកបានបង្កជម្លោះជាមួយគ្នាទៅវិញទៅមកម្តងហើយម្តងទៀតកាពីអតីតកាលលើអ្វីដែលរដ្ឋាភិបាលក្រុងវ៉ាស៊ីនតោននិយាយថាជាការធ្វើយោធូបនីយកម្មរបស់ទីក្រុងប៉េកាំងនៅសមុទ្រចិនខាងត្បូងដោយការកសាងប្រព័ន្ធយោធានៅលើកោះសិប្បនិម្មិតនិងថ្មប៉ប្រះទឹក៕ REUTERS
Source: Kampuchea Thmey Daily
0 Comments