ក្លិបបាល់ទាត់ Hougang United FC សមាជិកក្នុងពានរង្វាន់លីគកំពូលរបស់ប្រទេសសឹង្ហបុរី (S-League) បានដាក់ពាក្យស្នើសុំណាត់ក្រុមបាល់ទាត់ចំនួន៣របស់សមាជិកលីគកំពូលប្រទេសកម្ពុជា (Metfone Cambodian League) ធ្វើការប្រកួតមិត្តភាពអំឡុងពេលដែលក្រុមនេះធ្វើដំណើរមកបោះជំរំហ្វឹកហាត់នៅរាជធានីភ្នំពេញ។
យោងតាមការបញ្ជាក់របស់សារព័ត៌មានសឹង្ហបុរី ក្លិបHougang United FC បានធ្វើដំណើរមកដល់រាជធានីភ្នំពេញហើយ ដោយត្រូវប្រកួតមិត្តភាពកម្តៅសាច់ដុំជាមួយក្រុម ណាហ្គាវើល នៅវេលាម៉ោង៤ល្ងាចថ្ងៃអង្គារ ទី១២ ខែកុម្ភៈ លើទីលានពហុកីឡដ្ឋានជាតិ ក្នុងរាជធានីភ្នំពេញ មុនជួបក្រុមភ្នំពេញក្រោន នៅថ្ងៃទី១៤ ខែមករា និងចុងក្រោយប៉ះក្រុមបឹងកេត នៅថ្ងៃទី១៦ ខែមករា ជាបន្តទៀតដែលជំនួបទាំង ២លើកនេះនឹងធ្វើឡើងនៅកីឡដ្ឋាន RSN របស់ក្លឹបភ្នំពេញក្រោនដូចគ្នា។
សូមបញ្ជាក់ថា ក្លិបបាល់ទាត់ Hougang United FC បង្កើតឡើងតាំងពីឆ្នាំ១៩៩៨ មកម្ល៉េះដោយប្រើប្រាស់ទីលានកីឡដ្ឋាន Jalan Besar Stadium បណ្តោះអាសន្នមុនទីលានHougang Stadiumរបស់ខ្លួនសាងសង់រួចរាល់។ ក្លិបនេះមានថៅកែឈ្មោះ Bill Ng ហើយមានគ្រូបង្វឹកគឺលោក Clenment Teo។ កាលពីរដូវកាលឆ្នាំ២០១៨ កន្លងទៅក្លិបនេះ បានបញ្ចប់រដូវកាលរបស់ខ្លួនដោយឈរចំណាត់ថ្នាក់លេខ៩ ដែលជាចំណាត់ថ្នាក់ចុងក្រោយគេ បន្ទាប់ពីប្រកួតបាន២៤លើក ហើយឈ្នះបាន២លើក ស្មើគ្នាបាន៦លើកនិងចាញ់១៦លើកមាន១២ពិន្ទុ។ នៅក្នុងពានរង្វាន់ Singapore Cup វិញក្រុមនេះបានឡើងដល់វគ្គពាក់កណ្ដាលផ្តាច់ព្រ័ត្រ។ ក្រុមនេះអាចធ្លាក់ទៅលេងពានរង្វាន់លំដាប់ទី២របស់សឹង្ហបុរី គឺSingapore National Football League។
នៅឆ្នាំ២០១៩ នេះមានតែក្លិបHougang United FC ដែលជាក្លិបបរទេសតែ១គត់បានសម្រេចជ្រើសរើសយកប្រទេសកម្ពុជា ធ្វើជាទឹកដីសម្រាប់បោះជំរំហ្វឹកហាត់ដល់កូនក្រុមខ្លួនមុនរដូវកាលថ្មីឆ្នាំ២០១៩ មកដល់ ខណៈកាលពីឆ្នាំកន្លងទៅធ្លាប់មានក្លិបមកពីប្រទេសម៉ាឡេស៊ី បានមកបោះជំរំហ្វឹកហាត់នៅកម្ពុជា៕
Source: Kampuchea Thmey Daily
0 Comments