ភ្នំពេញ ៖ បន្ទាប់ពីបានទទួលអនុសាសន៍ពីស្ថាប័នចំនួន១០ ពាក់ព័ន្ធសេចក្តីព្រាងបទបញ្ជា និងនីតិវិធី សម្រាប់ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៣ ឆ្នាំ២០១៩ អគ្គលេខាធិការដ្ឋាន គ.ជ.ប បានរៀបចំកិច្ចប្រជុំពិគ្រោះ យោបល់លើអនុសាសន៍ទាំងនោះ ក្រោមអធិបតីភាពលោក ទេព នីថា អគ្គលេខាធិការ គ.ជ.ប ដែលកិច្ចប្រជុំនេះ ធ្វើឡើងនៅសាលសន្និសីទសារព័ត៌មានរបស់ គ.ជ.ប កាលពីព្រឹកថ្ងៃទី០៨ ខែកុម្ភៈ ឆ្នាំ២០១៩ ។
កិច្ចប្រជុំពិគ្រោះយោបល់នេះ ប្រព្រឹត្តទៅពេញមួយព្រឹក ដោយមានការចូលរួមពីភាគីពាក់ព័ន្ធ រួមមាន តំណាងអគ្គលេខាធិការដ្ឋានព្រឹទ្ធសភា តំណាងក្រសួង ស្ថាប័នរដ្ឋ ចំនួន៥ គណបក្សនយោបាយចំនួន៤ អង្គការមិនមែនរដ្ឋាភិបាលចំនួន២ អង្គភាពសារព័ត៌មានចំនួន៨ និងមន្ត្រី គ.ជ.ប និងលធ.ខប ចំនួន ៣១នាក់ សរុបអ្នកចូលរួមចំនួន៦៣នាក់។
ថ្លែងក្នុងកិច្ចប្រជុំពិគ្រោះយោបល់នោះ លោក ទេព នីថា លើកឡើងថា គ.ជ.ប សូមស្វាគមន៍រាល់អនុសាសន៍ទាំងឡាយ ទាំងលើទិដ្ឋភាពច្បាប់ ទាំងលើទិដ្ឋភាពបច្ចេកទេស ដើម្បីធ្វើការកែសម្រួលសេចក្តីព្រាងនេះឱ្យកាន់តែពេញលេញ ត្រឹមត្រូវតាមច្បាប់ ងាយស្រួលយល់ និងអនុវត្តន៍។ លោកបន្តថា សេចក្តីព្រាងនេះ ត្រូវបានរៀបចំដោយផ្អែកលើច្បាប់ និងលិខិតបទដ្ឋានគតិយុត្តសំខាន់ៗ ដែលរួមមាន ទី១- ច្បាប់ស្តីពី ការរៀបចំ និងការប្រព្រឹត្តទៅនៃ គ.ជ.ប ទី២- ច្បាប់ស្តីពី ការបោះឆ្នោតជ្រើសតាំងតំណាងរាស្ត្រ និងច្បាប់ស្តីពី វិសោធនកម្មនៃច្បាប់នេះ ទី៣- ច្បាប់ស្តីពី ការបោះឆ្នោតជ្រើសរើសក្រុមប្រឹក្សា ទី៤- ច្បាប់ស្តីពី វិសោធនកម្មច្បាប់ស្តីពីការបោះឆ្នោតជ្រើសរើសក្រុមប្រឹក្សា ទី៥- ច្បាប់ស្តីពី ការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ទី៦- ច្បាប់ស្តីពី វិសោធនកម្មច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ទី៧- បទបញ្ជាផ្ទៃក្នុងនៃ គ.ជ.ប ទី៨- គោលការណ៍ ដែលមានចែងក្នុងបទបញ្ជា និងនីតិវិធី ឆ្នាំ២០១៤ ឆ្នាំ២០១៧ និងឆ្នាំ២០១៨ និងទី៩- លិខិតបទដ្ឋានគតិយុត្តពាក់ព័ន្ធផ្សេងទៀត។
បន្ទាប់ពីទទួលបានអនុសាសន៍រួចមក អគ្គលេខាធិការដ្ឋាន គ.ជ.ប បានប្រជុំពិនិត្យលើអនុសាសន៍ទាំងនោះមួយជំហានហើយ។ ចំណែកពេលនេះ គ.ជ.ប បើកការប្រជុំដើម្បីពិគ្រោះយោបល់បន្ថែមទៀតជាមួយភាគីពាក់ព័ន្ធ មុននឹងរៀបចំដាក់ជូន គ.ជ.ប អនុម័តសម្រេចឱ្យប្រើប្រាស់ជាផ្លូវការ ។
នៅក្នុងកិច្ចប្រជុំនោះដែរ លោក សោម សូរីដា អគ្គលេខាធិការរង គ.ជ.ប បានធ្វើរបាយការណ៍ពីការរៀបចំបទបញ្ជា និងនីតិវិធីនេះ ដោយបានលើកឡើងពីការកំណត់គោលគំនិតសំខាន់ៗតាមជំពូកនីមួយៗ និងផ្នែកនីមួយៗ រហូតបានទៅជាសេចក្តីព្រាងបទបញ្ជា និងនីតិវិធីសម្រាប់ដាក់ឱ្យពិគ្រោះ និងផ្តល់យោបល់នៅពេលនេះ។ លោកសង្ឃឹមថា ការចូលរួមរបស់ភាគីពាក់ព័ន្ធ គឺជាធាតុចូលរួមយ៉ាងសំខាន់ ដើម្បីឱ្យដំណើរការបោះឆ្នោតជ្រើសរើសក្រុមប្រឹក្សា ដែលនឹងប្រព្រឹត្តិទៅនៅថ្ងៃទី២៦ ខែឧសភា ឆ្នាំ២០១៩ ប្រព្រឹត្តទៅដោយរលូន ប្រកបដោយភាពសេរី ត្រឹមត្រូវ និងយុត្តិធម៌ ស្របតាមគោលការណ៍លទ្ធិប្រជាធិបតេយ្យ សេរី ពហុបក្ស និងអាចទទួលយកបានពីគ្រប់ភាគីពាក់ព័ន្ធ ។
ក្នុងកិច្ចពិគ្រោះយោបល់នោះ ភាគីពាក់ព័ន្ធដែលចូលរួម បានបញ្ចេញមតិបន្ថែម លើអនុសាសន៍ ហើយថ្នាក់ដឹកនាំអគ្គលេខាធិការដ្ឋានបានធ្វើការបកស្រាយ និងផ្លាស់ប្តូរយោបល់គ្នាយ៉ាងផុលផុសក្នុងស្មារតីសហការ និងទទួលខុសត្រូវខ្ពស់។
ចំណែកលោក ម៉ៅ សុភារិទ្ធ អគ្គលេខាធិការរង គ.ជ.ប បានអះអាងដែរថា គោលបំណងនៃកិច្ចប្រជុំពិគ្រោះយោបល់នេះ គឺដើម្បីឱ្យបទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សា អាណត្តិទី៣ ឆ្នាំ២០១៩ មាននីត្យានុកូលភាពស្របទៅនឹងច្បាប់បោះឆ្នោត។ លោកបន្ថែមថា រាល់បណ្តាអនុសាសន៍ និងមតិយោបល់របស់ភាគីពាក់ព័ន្ធ និងការបកស្រាយរបស់ថ្នាក់ដឹកនាំកិច្ចប្រជុំ មិនមែនជាការសម្រេចចុងក្រោយនោះឡើយ។ បន្ទាប់ពីកិច្ចប្រជុំពិគ្រោះយោបល់នេះ អគ្គលេខាធិការដ្ឋាន គ.ជ.ប នឹងរៀបចំអនុសាសន៍ និង សំណូមពរទាំងឡាយ ដែលបានពិភាក្សា ដាក់ជូន គ.ជ.ប ពិនិត្យ និងសម្រេចជាចុងក្រោយមុននឹង ដាក់ឱ្យប្រើប្រាស់ជាផ្លូវការ ។
សូមបញ្ជាក់ថា សេចក្តីព្រាងបទបញ្ជា និងនីតិវិធីនេះ មាន ២ ជំពូក១៣ ផ្នែក និងមានឧបសម្ព័ន្ធចំនួន៧។ ទាក់ទងនឹងសេចក្តីព្រាងបទបញ្ជា និងនីតិវិធីនេះ មានភាគីពាក់ព័ន្ធចំនួន១០ និងគធ.ខបចំនួន៣ បានបញ្ជូនអនុសាសន៍មក គ.ជ.ប ។ ភាគីពាក់ព័ន្ធទាំងនោះ រួមមាន អគ្គលេខាធិការដ្ឋានព្រឹទ្ធសភា ក្រសួងមហាផ្ទៃ ក្រសួងការពារជាតិ ក្រសួងយុត្តិធម៌ ក្រសួងព័ត៌មាន គណបក្សប្រជាជនកម្ពុជា គណបក្សយុវជនកម្ពុជា គណបក្សមាតុភូមិយើង សហគមន៍គ្រួសារអភិវឌ្ឍន៍កសិកម្ម សមាគមជ័យលាភីបញ្ញាជនកម្ពុជា គណៈកម្មការរាជធានី ខេត្តរៀបចំការបោះឆ្នោត (រាជធានី ភ្នំពេញ ខេត្តកណ្តាល និងខេត្តមណ្ឌលគិរី) ៕
Source: Kampuchea Thmey Daily
0 Comments