តាកែវ ៖ ជនរងគ្រោះម្នាក់ បានស្លាប់ភ្លាមៗនៅកន្លែងកើតហេតុ ដោយឡែកម្នាក់ទៀតបានរងរបួសធ្ងន់ ក្រោយជួបហេតុការណ៍គ្រោះថ្នាក់ចរាចរណ៍រវាងម៉ូតូនិងម៉ូតូ រួចខ្ទាតចូលក្រោមរថយន្តដឹកសម្ភារៈសំណង់មួយគ្រឿង។
ករណីគ្រោះថ្នាក់ចរាចរណ៍នេះ បានកើតឡើងនៅរសៀលថ្ងៃទី០៩ ខែកុម្ភៈ ឆ្នាំ២០១៩ វេលាម៉ោង១៣និង៣០នាទី នៅលើផ្លូវខេត្តលេខ១២២A ចន្លោះគីឡូម៉ែត្រលេខ ៤-៥ ស្ថិតក្នុងភូមិត្រពាំងសាប ឃុំត្រពាំងសាប ស្រុកបាទី ខេត្តតាកែវ។ ជនរងគ្រោះដែលខ្ទាតចូលក្រោមរថយន្តកិនស្លាប់នោះមានឈ្មោះ អៀង នាង ភេទប្រុស អាយុ៤៤ឆ្នាំ រស់នៅភូមិខ្នារង់ ឃុំកុមារាជា ស្រុកបាទី។ ចំណែកម៉ូតូជនរងគ្រោះបើកបរម៉ាកហុងដាសេ១២៥ ស៊េរីឆ្នាំ២០១៨ ពាក់ស្លាកលេខ តាកែវ 1Q 0859។
ដោយឡែកម្ចាស់ម៉ូតូមួយគ្រឿងទៀតមានឈ្មោះ ប៉ិច គឿន ភេទប្រុស អាយុ២១ឆ្នាំ រស់នៅភូមិត្រពាំងសាប ឃុំត្រពាំងសាប ស្រុកបាទី (រងរបួសធ្ងន់)។ ជនរងគ្រោះបើកបរម៉ូតូហុងដាសេ១២៥ ស៊េរីឆ្នាំ២០១៤ ពាក់ស្លាកលេខ ភ្នំពេញ 1CD 9440។
តាមសាក្សីនៅក្បែរកន្លែងកើតហេតុបានឲ្យដឹងដែរថា នៅមុខពេលកើតហេតុភាគីម៉ូតូជនរងគ្រោះដែលស្លាប់ធ្វើដំណើរពីទិសខាងលិចទៅកើត លុះមកដល់កន្លែងកើតហេតុបានបុកគ្នាជាមួយម៉ូតូមួយគ្រឿងដែលធ្វើដំណើរពីកើតទៅលិចរួចក៏ដួលខ្ទាតចូលក្រោមរថយន្តដឹកសម្ភារៈសំណង់ម៉ាក់ទីតាន់ ពាក់ស្លាក់លេខ ភ្នំពេញ 2A 3044 បណ្តាលឲ្យកិនស្លាប់ភ្លាមៗតែម្តងទៅ។ ចំណែកអ្នកបើកបររថយន្តបានរត់គេចខ្លួនបាត់ស្រមោល។
ក្រោយកើតហេតុសមត្ថកិច្ចជំនាញស្រុកបាទីបានចុះដល់ធ្វើការវាស់វែងនិងចាត់បញ្ជូនជនរងគ្រោះទៅព្យាបាលនៅមន្ទីរពេទ្យបង្អែកខេត្តតាកែវ និងបានដកហូតវត្ថុតាងទាំង៣គ្រឿងយកទៅរក្សាទុកនៅអធិការដ្ឋាននគរបាលស្រុកបាទីរង់ចាំដោះស្រាយតាមនីតិវិធីនៅពេលក្រោយ។ ចំណែកសពជនរងគ្រោះដែលស្លាប់ ត្រូវបានប្រគល់ជូនសាច់ញាតិយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments