កណ្តាល ៖ ចោរលួចឆ្លងដែនយ៉ាងសកម្មពីរនាក់ ត្រូវបាននគរបាលពីរស្រុកដេញចាប់ទម្រាំនឹងបាន ខណៈក្រុមចោរនោះ បានធ្វើសកម្មភាពលួចម៉ូតូ ពីប្រជាពលរដ្ឋចតទុកដាក់មុខផ្ទះ។
ហេតុការណ៍គួរឲ្យភ្ញាក់ផ្អើលនេះ បានកើតឡើងនៅថ្ងៃសុក្រ ៤កើត ខែមាឃ ឆ្នាំច សំរឹទ្ធិស័កព.ស២៥៦២ ត្រូវនឹងថ្ងៃទី៨ ខែកុម្ភៈ ឆ្នាំ២០១៩ វេលាម៉ោង០៨និង១៥នាទី នៅចំណុចភូមិព្រែកខ្មែរ ឃុំស្អាងភ្នំ ស្រុកស្អាង ខេត្តកណ្ដាល។
ជនរងគ្រោះ ឈ្មោះទី ធី ភេទប្រុស អាយុ៤១ឆ្នាំ ជនជាតិខ្មែរ មានទីលំនៅ ភូមិព្រែកខ្មែរ ឃុំស្អាងភ្នំ ស្រុកស្អាង ខេត្តកណ្ដាល មានមុខរបរលក់ដូរ។
ជនសង្ស័យមានគ្នា០៤នាក់ ទី០១-ឈ្មោះ ជា ម៉ា ហៅអាជ្រុយ ភេទប្រុស អាយុ៣៥ឆ្នាំ ជនជាតិខ្មែរ មុខរបររើសអេតចាយ ស្នាក់នៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ (ឃាត់ខ្លួន)។ ស្រុកកំណើត នៅភូមិពេចនា ឃុំបន្ទាយមាស ស្រុកបន្ទាយមាស ខេត្តកំពត។ ទី០២-ឈ្មោះ ម៉េង លីហុង ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅម្ដុំគិរីរម្យ រាជធានីភ្នំពេញ មានស្រុកកំណើតនៅភូមិកំពង់អំពិល ឃុំកំពង់អំពិល ស្រុកពារាំង ខេត្តព្រៃវែង (ឃាត់ខ្លួន)។ ទី០៣-ឈ្មោះ ម៉ាប់ ភេទប្រុស អាយុ២៣ឆ្នាំ មុខរបរមិនពិតប្រាកដ ស្នាក់នៅក្រុងតាខ្មៅ ខេត្តកណ្ដាល (គេចខ្លួន)។ និងទី០៤-ឈ្មោះ តន ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅម្ដុំពេទ្យរុស្សី រាជធានីភ្នំពេញ(គេចខ្លួន)។
រីឯវត្ថុតាងចាប់យករួមមាន ម៉ូតូម៉ាកហុងដាសេ១២៥ ពណ៌គ្រាប់អំពិល ស៊េរីឆ្នាំ២០០៧ ចំនួន១គ្រឿង ពាក់ស្លាកលេខភ្នំពេញ០១.៦៣៩១(ជារបស់ជនរងគ្រោះ) មានស្នាមបាក់ក្បាលម៉ូតូចំនួន១គ្រឿង ម៉ាកហុងដាសេ១២៥ ពណ៌ខ្មៅ ពាក់ស្លាកលេខភ្នំពេញ១AP.៩៦០៨ ជារបស់ជនសង្ស័យជិះធ្វើសកម្មភាព។
នគរបាលស្រុកស្អាងបានឲ្យដឹងថា នៅវេលាម៉ោងពេលកើតហេតុខាងលើ ជនរងគ្រោះបានទុកម៉ូតូនៅខាងមុខផ្ទះរបស់ខ្លួន ដោយពុំបានដកសោចេញ ព្រោះជាប់រវល់លក់ដូរ ឆ្លៀតឱកាសនោះ ជនសង្ស័យខាងលើជិះម៉ូតូចំនួន២គ្រឿង បានធ្វើសកម្មភាពលួចម៉ូតូជនរងគ្រោះ ដោយមានឈ្មោះ ម៉េង លីហុង ឡើងជិះម៉ូតូយកទៅតែម្ដង។ ពេលជាមួយគ្នានោះ ម្ចាស់ម៉ូតូឃើញ ក៏បានស្រែកថា ចោរៗភ្លាមនោះ សមត្ថកិច្ចប៉ុស្តិ៍ស្អាងភ្នំ និងកម្លាំងអន្តរាគមន៍ស្រុកស្អាង បានធ្វើសកម្មភាពដេញតាមពីក្រោយជនសង្ស័យ រហូតដល់ចំណុចភូមិព្រែករុន ឃុំព្រែកគយស្រុកស្អាង ជនសង្ស័យផ្ដួលម៉ូតូចោល រួចរត់ឡើងជិះម៉ូតូជាមួយ ឈ្មោះ ជា ម៉ា សំដៅទៅទិសខាងត្បូងតាមផ្លូវជាតិលេខ២១។
ដោយមានការដឹកនាំកម្លាំងផ្ទាល់ពី លោកវរសេនីយ៍ឯក សេង សុជាតិ(អធិការ) និងបានសហការជាមួយសមត្ថកិច្ចនគរបាលស្រុកកោះធំ ទើបសមត្ថកិច្ចនគរបាលស្រុកស្អាង ដេញតាមឃាត់ខ្លួនបានជនសង្ស័យខាងលើនៅភូមិកោះទាវ (ក)ឃុំសំពៅពូន ស្រុកកោះធំ ចំណែកជនសង្ស័យឈ្មោះម៉ាប់ និង ឈ្មោះ តន បានជិះម៉ូតូ១គ្រឿងផ្សេងទៀតគេចខ្លួនបាត់។
បច្ចុប្បន្ន ជនសង្ស័យទាំង២នាក់ បានឃាត់ខ្លួននៅអធិការដ្ឋាននគរបាលស្រុកស្អាង ដើម្បីបន្តអនុវត្តន៍តាមនីតិវិធី៕
Source: Kampuchea Thmey Daily
0 Comments