សៀមរាប ៖ នៅថ្ងៃទី០៩ ខែកុម្ភៈ ឆ្នាំ២០១៩ គ្រឹះស្ថានមីក្រូហិរញ្ញវត្ថុហត្ថាកសិករ លីមីតធីត ចំនួនប្រមាណជិត៤០០នាក់ បានរៀបចំសកម្មភាពការងារសង្គម ដោយបានប្រគល់បង់អង្គុយ តាមទីសាធារណៈ និងសំអាតបរិស្ថាន ក្រោមប្រធានបទ “ខ្ញុំ ស្រលាញ់ទីក្រុងស្អាត” ដែលកម្មវិធីនេះ គឺផ្ដោតការយកចិត្តទុកដាក់ជាសំខាន់ទៅលើបរិស្ថានស្អាត និងការដាក់បង់អង្គុយនៅតាមទីសាធារណៈ ដើម្បីបង្កើនសោភ័ណភាព ជាប្រយោជន៍សម្រាប់សាធារណជនទូទៅ។
លោក ម៉ិច សុខមេត្រី អគ្គនាយកអភិវឌ្ឍន៍អាជីវកម្ម ប្រធានអគ្គនាយក នៃគ្រឹះស្ថានមីក្រូហិរញ្ញវត្ថុ ហត្ថាកសិករ លីមីតធីត បានមានប្រសាសន៍ថា ៖ “នេះមិនមែនជាលើកទីមួយទេ ដែលហត្ថាកសិករបានចូលរួមចំណែកក្នុងការងារសង្គម ហត្ថាកសិករ បានធ្វើការងារសង្គមជាច្រើនដូចជា សាងសង់អគារមន្ទីរពេទ្យ សាងសង់អាគារសិក្សា ផ្ដល់សម្ភារៈសិក្សា អណ្ដូងទឹក បង្រៀនអតិថិជន និងសិស្សានុសិស្សអំពីចំណេះដឹងហិរញ្ញវត្ថុជាដើម។
ការងារបរិស្ថាននៅថ្ងៃនេះ ជាសកម្មភាពថ្មីបន្ថែមទៀត ដែលបានបង្ហាញកាន់តែច្បាស់អំពីការយកចិត្តទុកដាក់របស់ហត្ថាកសិករក្នុងការចូលរួម ចំណែកក្នុងអភិវឌ្ឍន៍សុខុមាលភាពសង្គមកម្ពុជាឲ្យកាន់តែប្រសើរឡើង”។ លើសពីនោះ លោកក៍បាន ថ្លែងអំណរគុណដល់លោកអភិបាលរងក្រុង និងអាជ្ញាធរគ្រប់លំដាប់ថ្នាក់ដែលបានចូលរួម និងជួយជ្រោមជ្រែងទាំងអស់ឲ្យកម្មវិធីក្នុងថ្ងៃនេះប្រព្រឹត្តទៅដោយរលូន។
លោក បូ មេងទ្រី អភិបាលរងក្រុងសៀមរាប បានសម្ដែងនូវការកោតសរសើរចំពោះហត្ថាកសិករដែលតែងតែចំណាយ ពេលវេលា ថវិកា និងលើកទឹកចិត្តឲ្យបុគ្គលិកចូលរួមកិច្ចការសង្គមតាមរូបភាពផ្សេងៗកន្លងមក។
លោកបានមានប្រសាសន៍ កោតសរសើរដល់ថ្នាក់ដឹកនាំ និងបុគ្គលិករបស់ហត្ថាកសិករ ដែលតែងតែចំណាយ ពេលវេលា និងថវិកា ដើម្បីចូលរួមចំណែកក្នុងការអភិវឌ្ឍន៍សង្គម ជាក់ស្ដែងដូចការងារសម្អាតបរិស្ថាន និងការផ្ដល់ បង់អង្គុយ សម្រាប់សាធារណជននៅក្នុងក្រុងសៀមរាបនាថ្ងៃនេះ”។
ហើយលោកសង្ឃឹមថា សកម្មភាពនេះ គឺគំរូដ៏ល្អក្នុងការជំរុញឲ្យក្រុមហ៊ុនឯកជននានា ឲ្យចូលរួមក្នុងកិច្ចការសង្គមឲ្យបានច្រើនផងដែរ។
សម្រាប់ឆ្នាំ២០១៩ នេះ ហត្ថាកសិករ មានគម្រោងសកម្មភាពការងារទំនូលខុសត្រូវជាមួយការងារសង្គមជាច្រើនទៀតដល់សហគមន៍ ដើម្បីរួមចំណែកជាមួយរដ្ឋាភិបាលក្នុងការធ្វើឲ្យកាន់តែប្រសើរឡើងនូវជីវភាពរបស់ប្រជាជនកម្ពុជា៕
Source: Kampuchea Thmey Daily
0 Comments