គណបក្សនយោបាយថៃ នឹងគោរពតាមបញ្ជារបស់ព្រះមហាក្សត្រ ដែលរារាំងបេក្ខភាពរបស់ម្ចាស់ក្សត្រីសម្រាប់តំណែងនាយករដ្ឋមន្ត្រី។ នេះបើយោងតាមសេចក្តីថ្លែងការណ៍មួយកាលពីថ្ងៃសៅរ៍ដែលបង្ហាញពីការប្រែប្រួលយ៉ាងខ្លាំងមួយថ្ងៃបន្ទាប់ពីព្រះនាងប្រកាសពីការឈរឈ្មោះ។
គណបក្សបាននិយាយនៅក្នុងសារតាម LINE មួយផ្ញើទៅអ្នកយកព័ត៌មានថា “គណៈបក្សថៃរក្សាជាតិសូមគោរពតាមព្រះរាជបញ្ជា”។
សេចក្តីថ្លែងការណ៍នេះបានបន្ថែមថា គណបក្សនេះបានត្រៀមខ្លួនរួចជាស្រេចដើម្បីបំពេញកាតព្វកិច្ចរបស់ខ្លួនដោយគោរពតាមទំនៀមទម្លាប់និងប្រពៃណីរបស់រាជវង្សក្រោមរបបរាជាធិបតេយ្យអាស្រ័យរដ្ឋធម្មនុញ្ញរបស់ប្រទេសថៃ។
ការប្រកាសនេះបានធ្វើឲ្យការប៉ុនប៉ងមិនធ្លាប់មានពីមុនមករបស់ម្ចាស់ក្សត្រី Ubolratana សម្រាប់តំណែងនាយករដ្ឋមន្ត្រីនៅក្នុងការបោះឆ្នោតខែមីនាត្រូវលែងមានប្រសិទ្ធភាពហើយបានកើតឡើងបន្ទាប់ពីមានការរិះគន់យ៉ាងខ្លាំងចំពោះបេក្ខភាពរបស់ព្រះនាងពីសំណាក់ព្រះមហាក្សត្រថៃ Maha Vajiralongkorn។
គណបក្សថៃរក្សាជាតិបានប្រកាសថា ម្ចាស់ក្សត្រីអង្គនេះជាបេក្ខជនរបស់ពួកគេកាលពីព្រឹកថ្ងៃសុក្រនៅក្នុងទង្វើមួយដែលបង្កឲ្យមានស្ថានភាពតានតឹងនិងគំរាមកំហែងដល់មហិច្ឆតារបស់របបយោធាដែលបានគ្រប់គ្រងប្រទេសថៃចាប់តាំងពីពួកគេបានផ្តួលរំលំរដ្ឋបាលរបស់លោកស្រីយីងឡាក់ស៊ីណាវ៉ាត្រាក្នុងរដ្ឋប្រហារឆ្នាំ២០១៤។
ប៉ុន្តែព្រះមហាក្សត្រថៃបានថ្កោលទោសការប៉ុនប៉ងនេះនៅក្នុងសេចក្តីថ្លែងការណ៍មួយនៅល្ងាចថ្ងៃដដែលនោះដោយទ្រង់មានបន្ទូលថា ការនាំសមាជិកគ្រួសាររាជវង្សជាន់ខ្ពស់ចូលទៅក្នុងឆាកនយោបាយគឺជាការប្រឆាំងនឹងប្រពៃណី វប្បធម៌ជាតិនិងមិនសមរម្យជាទីបំផុត។
ប្រទេសថៃមានច្បាប់ស្តីពីព្រះមហាក្សត្រដ៏តឹងរ៉ឹងបំផុតនៅក្នុងពិភពលោកហើយបន្ទូលរបស់ស្តេចត្រូវបានគេចាត់ទុកថាជាការសម្រេចចុងក្រោយ។
ប្រទេសថៃគឺប្រកាន់របបរាជាធិបតេយ្យអាស្រ័យរដ្ឋធម្មនុញ្ញហើយមិនមានរាជវង្សណាមួយគ្រប់គ្រងតំណែងជួរមុខទេចាប់តាំងពីឆ្នាំ១៩៣២មក៕ AFP
Source: Kampuchea Thmey Daily
0 Comments