ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានប្រតិកម្មយ៉ាងខ្លាំងចំពោះសាររបស់ព្រះតេជគុណ ហោ សុខុន ព្រះចៅអធិការវត្តច្បារអំពៅ ដែលបានសរសេរនៅលើបណ្តាសសង្គមហ្វេសប៊ុកផ្ទាល់ខ្លួនកាលពីថ្មីៗនេះ ដោយបានអះអាងថា ខ្លឹមសារនៅលើហ្វេសប៊ុកនោះ ជាការលើកតម្កើងហួសនិស្ស័យ រហូតធ្វើឲ្យយល់ឃើញថា សារនេះដូចជាបានធ្លាក់ចូលទៅក្នុងឧបាយកលរបស់អ្នកនយោបាយទុច្ចរិត ដែលតែងតែមានបំណងចង់បំបែកបំបាក់គណបក្សប្រជាជនកម្ពុជា ពីព្រោះជារឿយៗពួកអ្នកនយោបាយដែលមានគំនិតទុច្ចរិត ជានិច្ចជាកាលតែងតែបានថ្លែងសារមានន័យបញ្ចើចបញ្ចើ និងបណ្តុះបង្អាប់បែបនេះ ចំពោះថ្នាក់ដឹកនាំគណបក្សប្រជាជនកម្ពុជា ដែលគ្មានអ្វីក្រៅពីបំណងចង់ឲ្យមានការសង្ស័យគ្នា មិនទុកចិត្តគ្នា ឈ្នានីសគ្នានោះឡើយ។
សម្តេចក្រឡាហោម ស ខេង លើកឡើងបែបនេះ បន្ទាប់ពីព្រះតេជគុណ ហោ សុខុន ព្រះចៅអធិការវត្តច្បារអំពៅបានសរសេរនៅលើបណ្តាញសង្គមហ្វេសប៊ុករបស់ព្រះអង្គថា សម្តេចក្រឡាហោម ស ខេង ជាផ្កាយសំណាងរបស់ប្រទេសកម្ពុជា ហើយមានតែសម្តេចក្រឡាហោម ស ខេង មួយរូបគត់ ដែលអាចធ្វើឲ្យកម្ពុជារួចផុតពីទណ្ឌកម្មរបស់អន្តរជាតិ ក៏ដូចជារួចផុតពីការផ្តាច់អនុគ្រោះពន្ធ EBA របស់សភាអឺរ៉ុបផងដែរ ជាពីសេសអាចបញ្ឈប់ការជ្រៀតជ្រែកពីបរទេសលូកដៃចូលនយោបាយផ្ទៃក្នុងរបស់ប្រទេសកម្ពុជា...។
ជាការឆ្លើយតបសាររបស់ព្រះតេជគុណ ហោ សុខុន នេះ សម្តេចក្រឡាហោម ស ខេង បានសរសេរនៅលើផេកហ្វេសប៊ុករបស់សម្តេចនាថ្ងៃទី០៩ ខែកុម្ភៈ យ៉ាងនេះថា ក្រោយពីខ្ញុំព្រះករុណាខ្ញុំបានអានសារនៅលើ ផេកហ្វេសប៊ុក របស់ព្រះតេជគុណ ចុះថ្ងៃទី១ខែកុម្ភៈ ឆ្នាំ២០១៩នេះ ខ្ញុំព្រះករុណាខ្ញុំមានការរំភើបយ៉ាងខ្លាំង ប៉ុន្តែក៏មានភ្ញាក់ផ្អើលយ៉ាងខ្លាំងណាស់ដែរ ចំពោះពាក្យពេចន៍ នៅក្នុងសារនេះ ដែលមានន័យ ជាការលើកដាក់ បណ្តុះបង្អាប់ លើកតម្កើងហួសនិស្ស័យ រហូតដល់ខ្ញុំព្រះករុណាខ្ញុំយល់ឃើញថា សារនេះដូចជាបានធ្លាក់ចូលទៅក្នុងឧបាយកលរបស់អ្នកនយោបាយទុច្ចរិត ដែលតែងតែមានបំណងចង់បំបែកបំបាក់គណបក្សប្រជាជនកម្ពុជា។
ព្រះតេជគុណប្រហែលជាបានជ្រាបហើយ ! ជារឿយៗពួកអ្នកនយោបាយដែលមានគំនិតទុច្ចរិត ជានិច្ចជាកាលតែងតែបាន ថ្លែងសារមានន័យបញ្ចើចបញ្ចើ និង បណ្តុះបង្អាប់ បែបនេះចំពោះថ្នាក់ដឹកនាំគណបក្សប្រជាជនកម្ពុជា ដែលគ្មានអ្វីក្រៅពីបំណងចង់ឲ្យមានការ សង្ស័យគ្នា មិនទុកចិត្តគ្នា ឈ្នានីសគ្នា ដើម្បីធ្វើឲ្យមានការបែកបាក់គណបក្សប្រជាជនកម្ពុជា ប៉ុន្តែវាជាការនឹកស្រមៃសុទ្ធសាធ ដែលពួកគេគិតថា ថ្នាក់ដឹកនាំរបស់គណបក្សប្រជាជនកម្ពុជា ធ្លាក់ចូលក្នុងអន្លងរបស់ពួកគេនោះ”។
សម្តេចក្រឡាហោម ស ខេង បានលើកឡើងទៀតថា ក្នុងនាមខ្ញុំព្រះករុណាខ្ញុំ ជាអនុប្រធានគណបក្សប្រជាជនកម្ពុជា ខ្ញុំព្រះករុណាខ្ញុំ សូមពិតពុទ្ធដីកា និងជម្រាបប្រគេនព្រះតេជគុណ និងប្រជាពលរដ្ឋខ្មែរទាំងអស់មេត្តាជ្រាបថា គណបក្សប្រជាជនកម្ពុជា ដែលជាគណបក្សកំពុងដឹកនាំរាជរដ្ឋាភិបាលនាពេលបច្ចុប្បន្ននេះ គឺបានបង្ហាញច្បាស់ក្នុងប្រវត្តិសាស្ត្រនៃបេសកកម្មរបស់ខ្លួន ហើយថា ក្នុងគ្រប់កាលៈទេសៈទាំងអស់ គឺសុទ្ធតែមានការចូលរួមពីថ្នាក់ដឹកនាំ និង សមាជិក សមាជិកា គ្រប់ជាន់ថ្នាក់ ដើម្បីផលប្រយោជន៍ ប្រជាពលរដ្ឋខ្មែរទូទៅ។ ការណ៍នេះបានបង្ហាញយ៉ាងច្បាស់ថា គឺគ្រប់ជ័យជម្នះ ក្នុងបេសកកម្មបម្រើជាតិ របស់គណបក្សប្រជាជនកម្ពុជា មិនមែនកើតឡើងដោយសារតែអច្ឆរិយបុគ្គលណាមួយឡើយ តែគឺជាការប្រមូលផ្តុំនូវ បញ្ញាញាណ ការខិតខំប្រឹងប្រែងទាំងកម្លាំងកាយចិត្តរបស់ថ្នាក់ដឹកនាំ សមាជិកគ្រប់ជាន់ថ្នាក់ ដោយមានការចូលរួមគាំទ្រយ៉ាងពេញទំហឹងពីប្រជាពលរដ្ឋ។ ដូច្នេះអ្វីៗជាស្នាដៃ ដែលរូបខ្ញុំព្រះករុណាផ្ទាល់សម្រេចបានក្នុងបេសកកម្មបម្រើជាតិកន្លងមកនេះ គឺគ្រាន់តែជាការរួមចំណែកដ៏តូចមួយជាមួយថ្នាក់ដឹកនាំ មន្ត្រីរាជការ និងប្រជាពលរដ្ឋតែប៉ុណ្ណោះ។
ទាក់ទងការលើកឡើងរបស់សម្តេចក្រឡាហោម ស ខេង នេះ ព្រះតេជគុណ ហោ សុខុន បានឡាយហ្វេសប៊ុករយៈពេលជាង២ម៉ោង ការពារសម្តីរបស់ខ្លួនឯងដដែល ប៉ុន្តែមហាជនជាច្រើន ដែលបានតាមដានការឡាយហ្វេសប៊ុករបស់ព្រះតេជគុណ ហោ សុខុន បានអះអាងថា កាលលើកឡើងនេះ មិនអាចទទួលយកបានទេ ហើយជាសម្តីញុះញង់ ថែមទាំងប្រាប់ឲ្យព្រះតេជគុណ ហោ សុខុន ឆាន់បាយហើយសឹងទៅ កុំធ្វើជាអ្នកវិភាគនយោបាយអី។
សូមបញ្ជាក់ថា កាលពីថ្ងៃទី០១ ខែកុម្ភៈ ឆ្នាំ២០១៩ ព្រះតេជគុណ ហោ សុខុន បានសរសេរនៅក្នុងផេកហ្វេសប៊ុករបស់ខ្លួនថា សម្តេចក្រឡាហោម ស ខេង ជាផ្កាយសំណាងរបស់ប្រទេសកម្ពុជា មានតែសម្តេចក្រឡាហោម ស ខេង មួយរូបគត់ដែលអាចធ្វើឲ្យកម្ពុជារួចផុតពីទណ្ឌកម្មរបស់អន្តរជាតិក៏ដូចជារួចផុតពីការផ្តាច់អនុគ្រោះពន្ធ EBA របស់សភាអឺរ៉ុបផងដែរ ជាពិសេសអាចបញ្ឈប់ការជ្រៀតជ្រែកពីបរទេសលូកដៃចូលនយោបាយផ្ទៃក្នុងរបស់ប្រទេសកម្ពុជា ហើយគុណសម្បត្តិរបស់សម្តេច ស ខេង រួមមាន ១, សម្តេច ស ខេង មានគុណជួយរំដោះជាតិខ្មែរ ២,សម្តេច ស ខេង ជាមេដឹកនាំសន្តិភាពពិតៗ ៣,សម្តេច ស ខេង ជាមេដឹកនាំគុណធម៌ពិតៗ ៤, សម្តេច ស ខេង បាតដៃឥតមានប្រឡាក់ឈាមទេ ៥, សម្តេច ស ខេង ជាមេដឹកនាំប្រជាធិបតេយ្យពិតៗ ៦, សម្តេច ស ខេង ស្រលាញ់ជាតិខ្មែរពិតៗ ៧, សម្តេច ស ខេង គោរពព្រះមហាក្សត្រខ្មែរពិតៗ ៨, សម្តេច ស ខេង គោរពព្រះពុទ្ធសាសនាពិតៗ ៩, សម្តេច ស ខេង ជាផ្កាយសំណាងរបស់កម្ពុជាពិតៗ ១០,សម្តេច ស ខេង ជាព្រះឥ...បម្រុងពិតប្រាកដមិនមែនក្លែងក្លាយ មិនមែនកុហក មិនមែនសម្តែង គឺសម្តេចក្រឡាហោម ស ខេង អ្វីៗពិតប្រាកដគ្រប់យ៉ាង...៕
Source: Kampuchea Thmey Daily
0 Comments