តាកែវ ៖ មានគ្រោះថ្នាក់ចរាចរណ៍មួយ បានកើតឡើងរវាងម៉ូតូនិងម៉ូតូដែលបើកបរក្នុងទិសដៅបញ្ច្រាសគ្នាបណ្តាលឲ្យមានអ្នករងរបួសធ្ងន់ទាំងសងខាង ព្រោះតែការបើកបរខ្វះការប្រុងប្រយ័ត្ននិងមានល្បឿនលឿន។
ហេតុការណ៍គ្រោះថ្នាក់ចរាចរណ៍នេះ កើតឡើងនៅព្រលប់ថ្ងៃទី០៨ ខែកុម្ភៈ ឆ្នាំ២០១៩ វេលាម៉ោង១៨និង៤០នាទី នៅលើផ្លូវជាតិលេខ២ ចន្លោះបង្គោលគីឡូម៉ែត្រលេខ៧៦ -៧៧ ស្ថិតក្នុងភូមិស្នោ សង្កាត់រកាក្នុង ក្រុងដូនកែវ ខេត្តតាកែវ។ ប៉ូលិសនៃអធិការនគរបាលក្រុងដូនកែវបានប្រាប់ថា ភាគីរងគ្រោះទី១មានឈ្មោះ ស៊ុន គន្ធា ភេទស្រី អាយុ២២ឆ្នាំ ជានិស្សិត (រងរបួសធ្ងន់) រស់នៅភូមិថ្នួស ឃុំអង្គកែវ ស្រុកទ្រាំង ខេត្តតាកែវ បើកបរម៉ូតូម៉ាកហុងដាសេ១២៥ ស៊េរី២០១៦ ពាក់ស្លាកលេខ តាកែវ 1L 2450។ ចំណែកភាគីម្ខាងទៀតមានឈ្មោះ សួស ទិត្យារ័ត្ន ភេទប្រុស អាយុ១៧ឆ្នាំ ជាសិស្ស (រងរបួសធ្ងន់)និងអ្នករួមដំណើរពីក្រោយម្នាក់មានឈ្មោះ យុត រិទ្ធរក្សា ភេទប្រុស អាយុ១៧ឆ្នាំ ជាសិស្ស (រងរបួសស្រាល) ទាំងពីរនាក់រស់នៅភូមិស្នោ សង្កាត់រកាក្នុង ក្រុងដូនកែវ ខេត្តតាកែវ ដែលបើកបរម៉ូតូប្រភេទយ៉ាម៉ាហា អ៊ិចសងទ័រ គ្មានស្លាកលេខ។
ក្រោយកើតហេតុប៉ូលិសជំនាញនៃអធិការនគរបាលក្រុងដូនកែវ បានចុះដល់ និងចាត់បញ្ជូនអ្នករងរបួសទៅព្យាបាលនៅមន្ទីរពេទ្យ ចំណែកវត្ថុតាងទាំង២គ្រឿង ត្រូវបានយកទៅរក្សាទុកនៅអធិការដ្ឋាននគរបាលក្រុងដូនកែវដើម្បីដោះស្រាយគ្នានៅពេលក្រោយ៕
Source: Kampuchea Thmey Daily
0 Comments