រតនគិរី ៖ ម៉ូតូហុងដាឌ្រីមសាកកម្លាំងជាមួយម៉ូតូធំ ម្ចាស់រងរបួសធ្ងន់ស្រាលទាំងសងខាង កាលពីវេលាម៉ោង០៧និង៣០នាទីព្រឹកថ្ងៃសុក្រ ៤កើត ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៨ ខែកុម្ភៈ ឆ្នាំ២០១៩កន្លងទៅ នៅចំណុចមុខផ្លូវចូលភូមិពាក់ លើកំណាត់ផ្លូវជាតិលេខ៧៨ ស្ថិតនៅក្នុងភូមិអ៊ុន ឃុំលំជ័រ ស្រុកអូរយ៉ាដាវ។
មន្ត្រីនគរបាលស្រុកអូរយ៉ាដាវបានឲ្យដឹងថា ម៉ូតូបង្កមួយគ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១២ ពណ៌ខ្មៅ ពាក់ស្លាកលេខ រតនគិរី ១A-៩៨៥១ បើកបរដោយឈ្មោះ សល់ ហ្វាង ភេទប្រុស អាយុ៣០ឆ្នាំ មុខរបរកសិករ មានទីលំនៅបច្ចុប្បន្នភូមិ តេនសុស ឃុំយ៉ាទុង ស្រុកអូរយ៉ាដាវ ខេត្តរតនគិរី បានរងរបួសធ្ងន់។
រីឯជនរងគ្រោះបើកបរម៉ូតូមួយគ្រឿងម៉ាក HONDA ពណ៌ក្រហម ពាក់ស្លាកលេខ ភ្នំពេញ១AD-១៧៩៤ បើកបរដោយឈ្មោះ សុង ប៊ែ ភេទប្រុស អាយុ២១ឆ្នាំ មានទីលំនៅបច្ចុប្បន្ន ភូមិប្លរ ឃុំបរខាំ ស្រុកអូរយ៉ាដាវ ខេត្តរតនគិរី រងរបួសស្រាល។ ចំណែកអ្នករួមដំណើរឈ្មោះ អ៊ុំ ផានុ ភេទប្រុស អាយុ១៩ឆ្នាំ មានទីលំនៅបច្ចុប្បន្នភូមិ/ឃុំជាមួយអ្នកបើកបរម៉ូតូជនរងគ្រោះខាងលើ។
មន្ត្រីនគរបាលបន្តថា មូលហេតុម៉ូតូបង្កបើក ចេញពីផ្លូវគ្មានសិទ្ធិអាទិភាព ដោយខ្វះការប្រុងប្រយ័ត្ន ទើបបណ្ដាលឲ្យម៉ូតូជនរងគ្រោះជ្រុលចង្កូតបុកតែម្ដង។
ក្រោយកើតហេតុនគរបាលមូលដ្ឋានចុះមកអន្តរាគមន៍ធ្វើការវាស់វែង ហើយដឹកបញ្ជូនអ្នករងរបួសធ្ងន់មកកាន់មន្ទីរពេទ្យបង្អែកខេត្តដើម្បីព្យាបាល។
បច្ចុប្បន្នវត្ថុតាងទាំង២គ្រឿង ត្រូវបានកម្លាំងសមត្ថកិច្ចជំនាញរឹបអូសយកមករក្សាទុក នៅអធិការដ្ឋាននគរបាលស្រុកអូរយ៉ាដាវដើម្បីរង់ចាំធ្វើការដោះស្រាយនៅពេលក្រោយ។
គួរបញ្ជាក់ផងដែរថា បច្ចុប្បន្ននៅក្នុងខេត្តរតនគិរី នៃភូមិភាគឦសាន កត្តានៃគ្រោះថ្នាក់ចរាចរណ៍ដោយអ្នកបើកបរម៉ូតូនិងរថយន្តបើកក្នុងល្បឿនលឿន មិនបានយល់ដឹងអំពីច្បាប់ចរាចរណ៍ផ្លូវគោកនោះឡើយ ថែមទាំងប្រជែងគ្នានៅចំណុចផ្លូវគ្រោះថ្នាក់ ពោលគឺផ្លូវកោង ហើយមិនបានពាក់មួកសុវត្ថិភាពដើម្បីការពារអាយុជីវិតនោះទេ ដោយសមត្ថកិច្ចជំនាញបានខិតខំផ្សព្វផ្សាយនិងពង្រឹងច្បាប់ចរាចរណ៍ផ្លូវគោកយ៉ាងណាក៏ដោយ ប៉ុន្តែប្រជាពលរដ្ឋមួយចំនួនមិនបានគោរពច្បាប់នោះឡើយ ទើបបណ្តាលឲ្យមានករណីគ្រោះថ្នាក់ចរាចរណ៍ជារៀងរាល់ថ្ងៃ៕
Source: Kampuchea Thmey Daily
0 Comments