ខ្ទើយ ដែលដៀលប្រមាថជនជាតិខ្មែរ ត្រូវបានតុលាការ សម្រេចឃុំខ្លួនបណ្ដោះអាសន្ននៅគុកព្រៃស

ភ្នំពេញ ៖ បុរសភេទទី៣ម្នាក់ ដែលជេរដៀលខ្មែរមួយប្រទេសតាមហ្វេសប៊ុក ត្រូវបានបញ្ជូនមកដល់សាលាដំបូងរាជធានីភ្នំពេញ នៅរសៀលថ្ងៃទី០៦ ខែកុម្ភៈ ឆ្នាំ២០១៩នេះ ហើយត្រូវតុលាការសម្រេចឃុំខ្លួនបណ្ដោះអាសន្ននៅគុកព្រៃស ក្រោមការចោទប្រកាន់ពីបទញុះញង់ឲ្យមានការរើសអើង តាមមាត្រា៤៩៦នៃក្រមព្រហ្មទណ្ឌ។ នេះបើតាមការបញ្ជាក់ពីលោកលី សុផាណា អ្នកនាំពាក្យអយ្យការអមសាលាដំបូងរាជធានី។

នគរបាលខណ្ឌដូនពេញមានការប្រុងប្រយ័ត្នណាស់ក្នុងការបញ្ជូនជនសង្ស័យមកតុលាការនេះ ដោយខ្លាចមហាជនផ្ទុះកំហឹងស្ទាក់រថយន្តសមត្ថកិច្ចហើយប្រើហិង្សាលើជនសង្ស័យ។

ជនសង្ស័យឈ្មោះ យិន ហេង ហៅ ចំប៉ីខ្មៅ កើតនៅថ្ងៃទី២៦ ខែកុម្ភៈ ឆ្នាំ១៩៩៦ នៅភូមិអណ្តូងពោធិ៍ សង្កាត់កំពង់ប្រណាក ក្រុងព្រះវិហារ ខេត្តព្រះវិហារ។

ជននេះត្រូវបាននគរបាលចាប់ខ្លួន កាលពីល្ងាចថ្ងៃទី០៥ ខែកុម្ភៈ ឆ្នាំ២០១៩ នៅ ហាងកាហ្វេ មួយកន្លែងក្នុងទឹកដីខណ្ឌដូនពេញ។

ដើមចមដែលនាំឲ្យសមត្ថកិច្ច ឃាត់ខ្លួនជនសង្ស័យ រូបនេះ គឺកាលពីវេលាម៉ោង១៧និង២៥នាទីយប់ថ្ងៃទី០៤ ខែកុម្ភៈ ឆ្នាំ២០១៩ នៅចំណុចមុខព្រះបរមរាជវាំង ជនសង្ស័យ បាន Live លើទំព័រ ហ្វេសប៊ុក ឈ្មោះ ចំប៉ីខ្មៅ Chompey Khmoa ដោយបានស្រែកជេរដៀលប្រមាថថា ពូជអាខ្មែរតិរច្ឆាន៣នាក់ ដែលជិះម៉ូតូមកខោកក្បាលខ្ញុំតាមផ្លូវ ដែលមានភ្ជាប់ឃ្លីប វីដេអូ រយៈពេល ១នាទី ៥៣វិនាទី ដោយជេរក្រុមជនបង្កដែលបានវាយក្បាល គាត់ មួយក្រញ៉ និងបានប្រមាថដល់ពូជសាសន៍ខ្មែរយ៉ាងធ្ងន់ធ្ងរ។

ការប្រមាថពូជសាសន៍ខ្មែរ ដោយសារកំហឹងចំពោះអ្នកវាយក្បាលគាត់បែរនេះ បានធ្វើឲ្យ មហាជន ជាពិសេសក្រុមអ្នកនិយមលេងបណ្តាញសង្គមហ្វេសប៊ុក ថ្កោលទោស និងទាមទារឲ្យសមត្ថកិច្ចស្វែងរកចាប់ខ្លួនជននេះអោយខាងតែបានដើម្បីយកមកផ្ដន្ទាទោសតាមច្បាប់អោយសក្ដិសមទៅនឹងកំហុស។

ជាការកត់សម្គាល់ឈ្មោះយិន ហេងប្រើអាខោនហ្វេសប៊ុកឈ្មោះចំប៉ីខ្មៅនេះធ្លាប់បង្កការក្ដៅក្រហាយតាមបណ្ដាញសង្គមច្រើនដងហើយ តាំងពីករណីដែលអង្គការយូនីស្កូចុះបញ្ជីទទួលស្គាល់ល្ខោនខោល របស់ខ្មែរជាបេតិកភណ្ឌពិភពលោក និងជម្លោះកន្លែងចតយានយន្តជាដើម ដោយអាជ្ញាធរខណ្ឌបានអោយជននេះធ្វើកិច្ចសន្យាបញ្ឈប់ការបង្កបញ្ហាទៀត។

សមត្ថកិច្ចនិងអាជ្ញាធរខណ្ឌដូនពេញបានឲ្យដឹងថា ខ្ទើយរូបនោះឈ្មោះ យិន ហេង រហស្សនាម ចំប៉ីខ្មៅ ភេទប្រុស អាយុ២៣ឆ្នាំ ត្រូវកម្លាំងជំនាញរបស់ក្រសួងមហាផ្ទៃ គឺកម្លាំងនាយកដ្ឋានប្រឆាំងបទល្មើសបច្ចេកវិទ្យា ដោយសហការជាមួយកម្លាំងនគរបាលខណ្ឌដូនពេញ និងស្នងការដ្ឋាននគរបាលរាជធានីភ្នំពេញ ធ្វើការឃាត់ខ្លួនចាប់វ៉ៃខ្នោះនៅយប់ ថ្ងៃទី០៥ ខែកុម្ភៈ ឆ្នាំ២០១៩នេះ នៅចំណុចហាងកាហ្វេ Amazon ម៉ាត់ទន្លេ ស្ថិតក្នុងសង្កាត់ជ័យជំនះ ខណ្ឌដូនពេញ ក្បែរព្រះបរមរាជវាំង បន្ទាប់ពីមានប្រតិកម្មខ្លាំងពីសំណាក់មហាជន ក្នុងប្រទេស និងក្រៅប្រទេស ពាក់ព័ន្ធការជេរប្រមាថលើ ជាតិសាសន៍ខ្មែរ កាលពីយប់ថ្ងៃទី០៤ ខែកុម្ភៈ ឆ្នាំ២០១៩។

សមត្ថកិច្ចបន្តទៀតថា យុវជនភេទទី៣ រូបនោះមានស្រុកកំណើតនៅសង្កាត់កំពង់ប្រណាកក្រុងព្រះវិហារ ត្រូវបានកម្លាំងចំរុះធ្វើឡើងភ្លាមៗ បន្ទាប់ពីមានបណ្ដឹងពីអ្នកវិភាគនយោបាយ និងឃ្លាំមើលការអនុវត្តព្រឹត្តិការណ៍សង្គមគឺលោក ហ៊ាង គឹមស្រឿន ដែលបានប្ដឹងឈ្មោះ យិន ហេង ហៅ ចំប៉ីខ្មៅ ទៅកាន់តុលាការក្រុងភ្នំពេញ នៅថ្ងៃទី៥ ខែកុម្ភៈ ឆ្នាំ២០១៩នេះតែម្ដង។

អ្នកវិភាគនយោបាយ ហ៊ាង គឹមស្រឿន បានគូសបញ្ជាក់ប្រាប់តុលាការថា ការជេរប្រមាថរបស់គេ គឺបានធ្វើឲ្យប៉ះពាល់ដល់អង្គព្រះមហាក្សត្រផងដែរ ព្រោះថា ព្រះអង្គទ្រង់ក៏ជាពលរដ្ឋខ្មែរមួយអង្គ ហើយទ្រង់បានគ្រងរាជ្យសម្បត្តិ នៃព្រះរាជាណាចក្រកម្ពុជា ជាទីគោរពសការៈដ៏ខ្ពង់ខ្ពស់បំផុតសម្រាប់ប្រជាជាតិខ្មែរ។ លោកបានស្នើឲ្យតុលាការក្រុងភ្នំពេញ ផ្តន្ទាទោសយុវជនភេទទី៣ខាងលើនេះ ទៅតាមផ្លូវច្បាប់ជាធរមាន។

មិនតែប៉ុណ្ណោះក្រៅពីបណ្ដឹងប្រឆាំងនឹងយុវជនភេទទី៣ ចំប៉ីខ្មៅ នៅពេលនេះ មហាជនក៏មានការខឹងសម្បារផងដែរ ហើយបានស្នើឲ្យស្ថាប័នមានសមត្ថកិច្ចធ្វើការស្រាវជ្រាវចាប់ខ្លួនយុវជនរូបនេះ ចាត់ការតាមច្បាប់ឲ្យសក្ដិសមនឹងទង្វើជេរប្រមាថរបស់គេ។

ប៉ុន្តែក្រោយមក យុវជនរូបនេះ បានទទួលស្គាល់កំហុស ហើយក៏បានបង្ហោះវីដេអូជាថ្មី ធ្វើការសុំទោសជាសាធារណៈ ដោយបញ្ជាក់ថា ការជេរប្រមាថនាពេលនោះ កើតឡើងដោយសារខ្លួនទប់កំហឹងមិនបានចំពោះបុគ្គល៣នាក់ ដែលបានជិះម៉ូតូទៅខោកក្បាលគេតែប៉ុណ្ណោះ៕