ភ្នំពេញ ៖ មន្ត្រីការិយាល័យឥណទានកម្ពុជា បានបន្តជំរុញឲ្យប្រជាពលរដ្ឋប្រើប្រាស់សេវាត្រួតពិនិត្យសុខភាពហិរញ្ញវត្ថុឲ្យបានគ្រប់ៗគ្នាព្រោះថាសេវានេះនឹងជួយឱ្យប្រជាពលរដ្ឋទទួលបាននូវព័ត៌មានស្តីពីឥណទានរបស់ខ្លួនបានគ្រប់ជ្រុងជ្រោយ និងជៀសផុតពីហានិភ័យផ្សេងៗមុននឹងសម្រេចចិត្តស្នើសុំកម្ចីពីធនាគារឬគ្រឹះស្ថានហិរញ្ញវត្ថុនានា។
ថ្លែងនៅក្នុងសន្និសីទសារព័ត៌មាន ស្តីពីកិច្ចសហប្រតិបត្តិការលើការផ្តល់សេវាត្រួតពិនិត្យសុខភាពហិរញ្ញវត្ថុរវាងស្ថាប័នទាំងពីរកាលពីរសៀលថ្ងៃទី១៥ខែ កុម្ភៈឆ្នាំ២០១៩កន្លងទៅនេះនៅទីស្នាក់ការកណ្តាល នៃគ្រឹះ ស្ថានមីក្រូហិរញ្ញវត្ថុ អេអឹមខេ ភីអិលស៊ី លោក អឿ សុធារត្ន័ ប្រធាននាយកប្រតិបត្តិការិយាល័យ នៃការិយាល័យឥណទានកម្ពុជា CBC បានមានប្រសាសន៍ថា ប្រព័ន្ធប្រតិបត្តិការផ្តល់សេវាត្រួតពិនិត្យសុខភាពហិរញ្ញវត្ថុ ដែ លដាក់អោយ ប្រើនេះ នឹងជួយឱ្យអតិថិជនទូទៅក្នុងការស្នើសុំ និងស្វែងយល់អំពីព័ត៌មានឥណទានរបស់ពួកគេ អោយកាន់ តែប្រសើរឡើងក្នុងការត្រៀមខ្លួនសម្រាប់ការស្នើសុំកម្ចី។មិនតែប៉ុណ្ណោះប្រព័ន្ធនេះ ក៏ចូលរួមចំណែកដល់ស្ថិរភាព នៃវិស័យហិរញ្ញវត្ថុនិងសេដ្ឋកិច្ចផងដែរ។
លោកបានបន្តថា សេវាត្រួតពិនិត្យសុខភាពហិរញ្ញវត្ថុនេះ គឺជាសេវាកម្មមួយរបស់ ស៊ីប៊ីស៊ី ដែលអនុញ្ញាតឲ្យប្រជាពលរដ្ឋទូទៅ អាចពិនិត្យមើលរបាយការណ៍ឥណទាន ឬ លទ្ធភាពក្នុងការប្រើប្រាស់ឥណទាន ដោយខ្លួនឯងតាមរយៈភ្នាក់ងារដៃគូយុទ្ធសាស្ត្រ របស់ស៊ីប៊ីស៊ីហើយដើម្បីប្រើប្រាស់សេវាកម្មនេះ អតិថិជនគ្រាន់តែយកអត្តសញ្ញាណប័ណ្ណ ឬ លិខិតឆ្លងដែនច្បាប់ដើមនិងមានសុពលភាពទៅកាន់ដៃគូរបស់ប៊ីស៊ីប៊ី។
លោកបានបន្ថែមទៀតថា «ដោយមើលឃើញពីសារសំខាន់នៃរបាយការណ៍ឥណទានចំពោះប្រជាជនកម្ពុជា និង ដើម្បីផ្តល់ភាពងាយស្រួលដល់ប្រជាជនដែលរស់នៅតាមបណ្តាខេត្ត ទើបការិយាល័យឥណទានកម្ពុជាបានពង្រីកសេវាត្រួតពិនិត្យសុខភាពហិរញ្ញវត្ថុ ដោយធ្វើកិច្ចសហប្រតិបត្តិអាជីវកម្មជាមួយដៃគូយុទ្ធសាស្ត្រ គឺ គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី ដែលមានសាខាជាង១៥០ ទូទាំងប្រទេស ក្នុងការផ្តល់សេវាកម្មនេះ ដោយជំហ៊ានដំបូងយើងដាក់អោយដំណើរការនៅតាមសាខារបស់អេអឹមខេ ចំនួន៥ ហើយគ្រោងនឹងពង្រីកទូទាំងប្រទេសនៅបំណាច់ឆ្នាំ២០១៩នេះ។”
លោកបានឲ្យដឹងទៀតថា សាខារបស់អេអឹមខេ ចំនួន៥ទីតាំងនោះរួមមានគឺនៅស្នាក់ការកណ្តាល សាខាពោធិសែនជ័យ សង្កាត់ចោមចៅ៣ សាខាកំពង់ចាម សាខាខេត្តកណ្តាល និងសាខខេត្តសៀមរាប ។
លោកបានរំលឹកថា ក្នុងរយៈពេលជាង៦ឆ្នាំ នៃប្រតិបត្តិការ ស៊ីប៊ីស៊ី បានចាប់ផ្តើមនិងផ្តោតចម្បង ជាមួយនឹងរបាយការណ៍ឥណទានអតិថិជន ដែលអាចអនុញ្ញាតឱ្យសមាជិក អាចស្វែងយលពីអតិថិជន របស់ពួកគេ កាន់តែច្បាស់ និងធ្វើការសម្រេចចិត្តលើការផ្តល់ឥណទានប្រកបដោយប្រសិទ្ធិភាព និងទំនួលខុសត្រូវ។
លោក គា បូរាណ ប្រធាននាយកប្រតិបត្តិ នៃគ្រឹះស្ថានមីក្រូហិរញ្ញវត្ថុ អេអឹមខេ ភីអិលស៊ីបានមានប្រសាសន៍ថា «លោកពិតជាមានក្តីសោមនស្ស ដែលបានចាប់ដៃគូសហប្រតិបត្តិការ ជាមួយការិយាល័យ ឥណទានកម្ពុជា (ស៊ីប៊ីស៊ី)ក្នុងការបម្រើសេវាត្រួតពិនិត្យសុខភាពហិរញ្ញវត្ថុដល់ប្រជាជនកម្ពុជា អោយបាន រឹតតែទូលំទូលាយ តាមរយៈការស្នើសុំត្រួតពិនិត្យ របាយការណ៍ឥណទានផ្ទាល់ខ្លួន នៅតាមសាខានៃគ្រឹះ ស្ថានមីក្រូហិរញ្ញវត្ថុ អេអឹមខេ»។
លោកបានបន្តទៀតថា «ដូច្នេះសេវាហិរញ្ញវត្ថុមួយនេះនឹងជួយដល់អតិថិជនក្នុងការស្វែងយល់ពីស្ថានភាពហិរញ្ញវត្ថុរបស់ខ្លួន លើកកម្ពស់ចំណេះដឹងផ្នែកហិរញ្ញវត្ថុ និងត្រៀមខ្លួនរួចរាល់ប្រកបដោយការទទួលខុសត្រូវក្នុងការទទួលបានប្រាក់កម្ចីពីស្ថាប័នហិរញ្ញវត្ថុ»។
លោកបានបន្ថែមទៀតថាបច្ចុប្បន្ននេះ អេអឹមខេ បានផ្តល់សេវាទៅដល់អតិថិជនជាង៧៦ម៉ឺននាក់ និងមា ន សាខា គ្របដណ្តប់ស្រុកនិងឃុំទូទាំងប្រទេស។ដូច្នេះសេវាហិរញ្ញវត្ថុនេះ និងជួយដល់អតិថិជនក្នុងការស្វែងយល់ ពីស្ថានភាពហិរញ្ញវត្ថុរបស់ខ្លួន លើកកម្ពស់ចំណេះដឹងផ្នែកហិរញ្ញវត្ថុ និងត្រៀមខ្លួនរួចរាល់ ប្រកប ដោយការ ទទួលខុសត្រូវក្នុងការទទួលបានប្រាក់កម្ចីពីស្ថាប័នហិរញ្ញវត្ថុ។
លោក គាបូរាណបានបញ្ជាក់ថា អេអឹមខេគឺជាគ្រឹះស្ថានមីក្រូហិរញ្ញវត្ថុដែលឈានមុខគេលើវិសាលភាពប្រតិបត្តិការនិងចំនួនអតិថិជនប្រាក់កម្ចីហើយបើគិតមកដល់ឆ្នាំ២០១៨មកនេះអេ អឹម ខេ មានអតិថិជនជាង៧ ៦ម៉ឺននាក់ជាមួយនឹងផលបត្រប្រាក់កម្ចីជាង២៥២លានដុល្លារអាមេរិក និងប្រាក់បញ្ញើជាង១៦០លានដុល្លារអាមេរិក មានការិយាល័យ ប្រតិបត្តិចំនួន១៥០កន្លែង និងមានភ្នាក់ងារជាង៤ពាន់កន្លែងនៅទូទាំងប្រទេស៕
Source: Kampuchea Thmey Daily
0 Comments