ពោធិ៍សាត់ ៖ រថយន្តពន្លត់អគ្គីភ័យរបស់នគរបាលជាតិ របស់ស្នងការខេត្ត ព្រមទាំងរថយន្តពន្លត់អគ្គីភ័យស្រុកក្រុងរបស់អធិការដ្ឋានទាំងអស់ចំនួន៦គ្រឿង បានចេញទៅអន្តរាគមន៍ពន្លត់អគ្គីភ័យមួយ បានកើតឡើងនៅក្រុមហ៊ុនចិញ្ចឹមស្វា ដោយបាញ់ពន្លត់ទាន់ពេល។
ហេតុការណ៍នេះ បានកើតឡើងកាលពីវេលាម៉ោង៦និង៤០នាទីថ្ងៃទី១៥ ខែកុម្ភៈ ឆ្នាំ២០១៩ ត្រង់ចំណុចក្រុមហ៊ុនចិនចិញ្ចឹមស្វា ស្ថិតក្នុងភូមិតាកែវក្រោម ឃុំបឹងកន្ទួត ស្រុកក្រគរ ខេត្តពោធិ៍សាត់។
លោកឧត្តមសេនីយ៍ត្រី ម៉ូ លីដា ស្នងការរងនគរបាលខេត្ត ដែលជាវេនប្រចាំបញ្ជាការពារសន្តិសុខជូនប្រជាជនក្នុងខេត្ត របស់ស្នងការបានឲ្យដឹងថា ស្របពេលដែលលោកជាមួយកម្លាំងអន្តរាគមន៍នគរបាលជាច្រើនកំពុងនៅប្រចាំបញ្ជា ក៏មានគេរាយការណ៍ថា មានអគ្គីភ័យមួយបានកើតឡើងនៅចំណុចកើតហេតុខាងកំពុងឆាបឆេះឡោមព័ទ្ធក្រុមហ៊ុនចិញ្ចឹមស្វានោះ។ លោកបានបញ្ជាកម្លាំងអន្តរាគមន៍ជាមួយនឹងរថយន្តពន្លត់អគ្គីភ័យរបស់ស្នងការ នៅទាក់ទងរថយន្តពន្លត់អគ្គីភ័យ៥គ្រឿងបន្ថែមទៀត ស្រុកក្រុងរបស់អធិការនគរបាល មានរថយន្តអធិការក្រុងពោធិ៍សាត់. ស្រុកកណ្ដៀង. ស្រុកបាកាន. ស្រុកក្រវាញនិងស្រុកក្រគរ បានចេញទៅទីតាំងកើតហេតុ ដោយទាន់ហេតុការណ៍ខណៈអគ្គីភ័យ កំពុងឆាបឆេះសំរាមនិងព្រៃខាងក្រៅ រៀបនឹងឆ្លងឆេះចូលដល់តាមបន្ទប់អគារក្រុមហ៊ុនទៅហើយ។
លោកឧត្តមសេនីយ៍ត្រី ម៉ូ លីដា បន្តថា យើងបានប្រើរថយន្តពន្លត់អគ្គីភ័យចំនួន៦គ្រឿង បាញ់ទប់ស្កាត់ភ្លើងនិងបាញ់ពន្លត់ទាំងស្រុងគ្រប់គ្រងបាន ដោយប្រើរយៈពេលប្រមាណជា៣ម៉ោងអស់ទឹកចំនួន១២រថយន្ត។
លោកឧត្តមសេនីយ៍ត្រី ដដែលបញ្ជាក់ថា គឺកម្លាំងនគរបាលយើងបានជួយពន្លត់ទាន់ពេលដោយអគ្គីភ័យនេះពុំបានឆេះប៉ះពាល់ដល់អគាររោងចក្រឡើយ មូលហេតុដែលបណ្ដាលឲ្យមានកើតអគ្គីភ័យរាលដាលឆាបឆេះសន្ធោសន្ធៅ ដោយឡោមព័ទ្ធជិតចូលដល់អគាររោងចក្រគឺដោយសារតែពួកបុគ្គលិកក្រមហ៊ុននេះ ជាជនជាតិចិនដូចគ្នា បានជក់បារីចោលក្បែរនេះ ដែលមានកំទេចសំរាមច្រើនព្រមទាំងព្រៃព័ទ្ធក្បែរនោះ៕
Source: Kampuchea Thmey Daily
0 Comments