ភ្នំពេញ ៖ ជនសង្ស័យមុខសញ្ញាចាស់ម្នាក់ ចំណោមបក្ខពួក២នាក់ត្រូវជនរងគ្រោះចាប់ប្រគល់ជូនសមត្ថកិច្ចបន្ទាប់ពីបន្លំខ្លួនចូលក្នុងបន្ទប់ទ្រូម៉ាន់នី លួចលុយបានជាង៣៥ម៉ឺនរៀល។
ហេតុការណ៍នេះ កើតឡើងកាលពីវេលាម៉ោង១២និង៣០នាទី ថ្ងៃ១៦ ខែកុម្ភៈ ឆ្នាំ២០១៩ នៅចំណុច ផ្ទះលេខ២៤៦A ផ្លូវ៥៩៨ ក្រុមទី៤ ភូមិទួលថ្ងាន់ សង្កាត់ទួលសង្កែទី២ ខណ្ឌឫស្សីកែវរាជធានីភ្នំពេញ។
សមត្ថកិច្ចឲ្យដឹងថា ជនសង្ស័យទី១ឈ្មោះ សុខ បុត្រ ភេទប្រុស អាយុ២៥ឆ្នាំមុខរបរ មិនពិតប្រាកដ ទីលំនៅមិនពិតប្រាកដ ជនសង្ស័យទី២ ឈ្មោះ រិទ្ធ ភេទប្រុស អាយុប្រហែល៣៥ឆ្នាំ ជាម្ចាស់ម៉ូតូម៉ាកសេ១២៥ពណ៌ខ្មៅ សេរីឆ្នាំ២០១៥ (គេចខ្លួន) រីឯ ជនរងគ្រោះឈ្មោះ ប៉ាន់ ត្រៀក ភេទប្រុស អាយុ៥៦ឆ្នាំ មុខរបរលក់ដូរ ស្នាក់ផ្ទះកើតហេតុ។
បន្ទាប់ពីឃាត់ខ្លួនហកហូត វត្ថុតាងទឹកប្រាក់៣៥ម៉ឺនរៀល (បានប្រគល់ជូនជនរងគ្រោះវិញ)។ សមត្ថកិច្ចឲ្យដឹងថា មុនពេលកើតហេតុ នៅវេលាម៉ោងខាងលើជនរងគ្រោះកំពុងតែលក់នៅផ្ទះស្រាប់មានជនសង្ស័យ២នាក់ បានមកហើយគ្នាវាម្នាក់ធ្វើជាទិញប្រាក់ដុល្លារចំនួន៥០ដុល្លារ បន្ទាប់មកទិញស្រាបៀរចំនួនមួយកេសទៀត ហើយបានឲ្យប្រាក់រាយមិនគ្រប់ចំនួនដើម្បីពន្យារពេល ពេលនោះគ្នាវាម្នាក់ទៀតឈ្មោះ សុខ បុត្រ បានបន្លំចូលទៅក្នុងផ្ទះលួចយកប្រាក់ដាក់ក្នុងថង់ ក៏ត្រូវម្ចាស់តាមទាន់ស្រែកឆោឡោផ្អើលឃាត់ខ្លួនបានម្នាក់រីឯម្នាក់ទៀតឈ្មោះ រិទ្ធ រត់គេចខ្លួនបាត់។
អ្វីដែលហួសចិត្តនោះ ខណៈបងប្អូនប្រជាពលរដ្ឋស្វាគមន៍ម្នាក់មួយដៃមួយជើង ជនសង្ស័យស្រែកថា ខ្លួនកើតអេដស៍កុំវ៉ៃខ្លាំងពេកប្រយ័ត្នបែកឈាមប្រឡាក់ឆ្លងអេដស៍។
បច្ចុប្បន្នជនសង្ស័យផ្នែកជំនាញខណ្ឌ កំពុងសាកសួរយកចំលើយនឹងបទល្មើសកន្លងមក ដើម្បីកសាងសំណុំរឿងបញ្ចូនទៅសាលាដំបូងរាជធានីភ្នំពេញអនុវត្តន៍តាមនីតិវិធី៕
Source: Kampuchea Thmey Daily
0 Comments