ជំនួយ​ទៅដល់​ព្រំដែន​វេ​ណេ​ហ្ស៊ូ​អេ​ឡា​ ប៉ុន្តែ​មានការ​ព្រមាន​អំពី​ភាព​ចលាចល

រថយន្ត​ដឹក​ជំនួយ​មនុស្សធម៌​ ដែល​ត្រូវការ​ចាំបាច់​សម្រាប់​ប្រទេស​វេ​ណេ​ហ្ស៊ូ​អេ​ឡា ​បាន​ទៅដល់​ព្រំប្រទល់​របស់​ប្រទេស​នេះ​ ជាមួយ​ប្រទេស​កូ​ឡុំ​ប៊ី​ ហើយ​កាលពី​ថ្ងៃ​ព្រហស្បតិ៍​ ស្រប​ពេល​ដែល​រដ្ឋមន្ត្រី​មកពី​បណ្តា​ប្រទេស​អឺរ៉ុប​និង​អាមេរិក​ឡាទីន​ជាច្រើន​ បាន​អំពាវនាវ​ឲ្យ​មេដឹកនាំ​សង្គមនិយម​លោក Nicolas Maduro រៀបចំ​ការបោះឆ្នោត​ប្រធានាធិបតី​ដោយ​សេរី។

កិច្ចប្រជុំ​ក្រុម​ទំនាក់ទំនង​អន្តរជាតិ​នៅ​ទីក្រុង Montevideo បាន​និយាយថា ខ្លួន​បាន​ប្តេជ្ញាចិត្ត​ក្នុងការ​ស្វែងរក​វិធី​សន្តិភាព​និង​ប្រជាធិបតេយ្យ​ចេញពី​ការតស៊ូ​អំណាច​រវាង​លោក Maduro និង​គូប្រជែង​បក្សប្រឆាំង​លោក Juan Guaido ដោយ​គ្មាន​ការប្រើ​កម្លាំង​។​

វា​ស្របគ្នា​ជាមួយនឹង​ការមកដល់​នៅ​ព្រំប្រទល់​ប្រទេស​កូ​ឡុំ​ប៊ី​ជាប់​វេ​ណេ​ហ្ស៊ូ​អេ​ឡា​សម្រាប់​រថយន្ត​លើកដំបូង​ដែល​ដឹកជញ្ជូន​មនុស្សធម៌​អាមេរិក​។​

រថយន្ត​ជាច្រើន​គ្រឿង​ដែល​ផ្ទុក​ដោយ​ស្បៀងអាហារ​និង​ថ្នាំពេទ្យ​បាន​ចូល​ទៅដល់​មជ្ឈមណ្ឌល​ប្រមូលផ្ដុំ​មួយ​នៅ​ផ្នែក​ខាង​ព្រំដែន​ប្រទេស​កូ​ឡុំ​ប៊ី​នៃ​ស្ពាន Tienditas ដែល​នៅតែ​ត្រូវបាន​បិទ​ដោយ​កងទ័ព​វេ​ណេ​ហ្ស៊ូ​អេ​ឡា​ដែលជា​ហេតុ​បង្កើន​ភាព​តានតឹង​ជាមួយ​ទីក្រុង​វ៉ាស៊ីនតោន​។​

ដោយ​អះអាង​ពី​ភាពស្របច្បាប់​របស់គាត់​ពី​រដ្ឋធម្មនុញ្ញ លោក Guaido ដែលជា​ប្រមុខ​រដ្ឋសភា​វ័យ​៣៥​ឆ្នាំ​បាន​បង្ក​ការភ្ញាក់ផ្អើល​ដល់​ប្រជាជន​វេ​ណេ​ហ្ស៊ូ​អេ​ឡា​នៅពេល​គាត់​ប្រកាស​ខ្លួនឯង​ជា​ប្រធានាធិបតី​បណ្តោះអាសន្ន​កាលពី​ថ្ងៃទី​២៣​ខែមករា​ដែល​បង្កើត​ឲ្យ​មាន​ភាព​តានតឹង​ជាមួយ​លោក Maduro​។ បុរស​ទាំង​ពីរបាន​អំពាវនាវ​ឲ្យ​មានការ​ប្រមូលផ្តុំ​គ្នា​ធំៗ​នៅតាម​ដងផ្លូវ​។​

នៅឯ​វេទិកា​អន្ដរជាតិ​លើកទីមួយ​ក្នុង​រដ្ឋធានី​របស់​ប្រទេស​អ៊ុយ​រ៉ា​ហ្គា​យ​ដើម្បី​ដោះស្រាយ​វិបត្ដិ​នេះ ប្រធាន​គោលនយោបាយ​បរទេស​សហភាព​អឺរ៉ុប​លោកស្រី Federica Mogherini បាន​អំពាវនាវ​ឲ្យ​មាន​ដំណោះស្រាយ​ដោយ​សន្តិវិធី​ដើម្បី​ចៀសវាង​ភាពវឹកវរ​និង​គ្រោះថ្នាក់​ដល់​សង្គម​វេ​ណេ​ហ្ស៊ូ​អេ​ឡា​។​

បន្ទាប់ពី​កិច្ចចរចា​រយៈពេល​៥​ម៉ោង ក្រុម​នេះ​បានប្រកាសថា ខ្លួន​នឹង​បញ្ជូន​បេសកកម្ម​បច្ចេកទេស​មួយ​ទៅកាន់​ប្រទេស​វេ​ណេ​ហ្ស៊ូ​អេ​ឡា​ដើម្បី​បង្កើត​ការធានា​ចាំបាច់​សម្រាប់​ដំណើរការ​បោះឆ្នោត​គួរ​ឲ្យ​ទុកចិត្ត​ឲ្យ​បាន​ឆាប់រហ័ស​តាម​ដែល​អាចធ្វើ​ទៅបាន​និង​អនុញ្ញាត​ឲ្យ​ជំនួយ​មនុស្សធម៌​ចូល​។​

ក្រុម​អ្នកគាំទ្រ​លោក Maduro រាប់សិប​នាក់​បានធ្វើ​បាតុកម្ម​នៅ​ខាងក្រៅ​កិច្ចប្រជុំ​នេះ​ប្រឆាំងនឹង​អន្តរាគមន៍​របស់​អាមេរិក​នៅក្នុង​ប្រទេស​វេ​ណេ​ហ្ស៊ូ​អេ​ឡា​៕ AFP
​
​

Source: Kampuchea Thmey Daily