ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជាបានបង្ហោះសារនយោបាយខ្លីមួយនាព្រឹកថ្ងៃទី ៩ ខែ កុម្ភៈនេះតាមរយៈផេកហ្វេសប៊ុកផ្លូវការរបស់សម្តេចដោយបានលើកឡើងថាសុខសន្តិភាព និងឯករាជ្យភាពជាតិ គឺជាបុព្វហេតុចម្បងមួយធ្វើឲ្យកម្ពុជារឹងមាំនិងរីកចម្រើនកាន់តែខ្លាំង។
នៅក្នុងផេកហ្វេសប៊ុកផ្លូវការសម្តេចតេជោ ហ៊ុន សែន បានភ្ជាប់ជាមួយរូបថតមួយសន្លឹកដែលបានថតជាមួយស្លឹកដែលគេដឺងថាប្រហែលក្នុងអំឡុងទសវត្សទី ៩០ គឺថតជាមួយ ព្រះបរមរតនកោដ្ឋ សម្តេចព្រះនរោត្តម សីហនុ និង សម្តេចម៉ែ និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន , ។
សម្តេចតេជោ ហ៊ុន សែន បានបញ្ជាក់នៅលើផេកហ្វេសបុកផ្លូវការថា៖ «យើងរៀនសូត្រពីប្រវត្តិសាស្ត្រដើម្បីខិតខំកសាងប្រទេសជាតិឲ្យបានល្អ។ អ្វីដែលធ្វើឲ្យកម្ពុជាយើងរឹងមាំ និងកាន់តែរីកចម្រើនរុងរឿងទៅមុខ “គឺសន្តិភាព, ឯករាជ្យភាព និងបូរណភាពទឹកដី” ដែលយើងដាច់ខាតមិនត្រូវយកទៅដូរនឹងថ្នូរអ្វីមួយនោះឡើយ»។
សម្តេចនាយករដ្ឋមន្ត្រីបានបន្តថា «កម្ពុជាទម្រាំមានថ្ងៃនេះ គឺបានឆ្លងកាត់ឧបសគ្គ និងការលំបាកខ្លាំងណាស់ ដូច្នេះយើងមិនត្រូវបណ្តោយឲ្យជនអគតិទាំងឡាយណា មកបំផ្លិចផ្លាញសេចក្តីសុខរបស់កម្ពុជាបានតទៅទៀតជាដាច់ខាត»។
សម្តេចតេជោ ហ៊ុន សែន ក៏បានអរគុណដល់ជនរួមជាតិ ដែលផ្តល់នូវទំនុកចិត្ត ភាពជឿជាក់ និងការគាំទ្រសម្តេចក្នុងការដឹកនាំប្រទេសឲ្យកាន់តែរីកចម្រើនទៅមុខ។
គួរកត់សំគាល់ថា៖នៅក្នុងប្រវត្តិសាស្ត្រនៃប្រទេសកម្ពុជារយៈពេល ៦៦ ឆ្នាំចុងក្រោយនេះគណបក្សប្រជាជនកម្ពុជាដែលបាននិងកំពុងដឹកនាំគ្រប់គ្រងជាតិបានហែលឆ្លងកាត់នូវរឿងរ៉ាវជាច្រើននៅក្នុងសង្គ្រាមបែកបាក់ជាតិ។ ៦៦ ឆ្នាំនៃការបម្រើ ជាតិមាតុភូមិ គណបក្សប្រជាជនកម្ពុជា បានស្ថិតនៅផ្សាភ្ជាប់ជានិច្ចជាមួយប្រជាជនព្រោះគណបក្សនេះត្រូវបានបង្កើតឡើងដោយប្រជាជនដើម្បីប្រជាជននិងសម្រាប់ប្រជាជន។
ពីមុនរហូតដល់បច្ចុប្បន្នគ្មានគណបក្សនយោបាយណាមួយអាចជំនួសគណបក្សប្រជាជនកម្ពុជានៅក្នុងកិច្ចការពារឯករាជភាព អធិបតេយ្យភាព និងបូរណភាពដែនដីកម្ពុជាបានឡើយនិងក៏មិនទាន់ មានបទពិសោធន៍និងសមត្ថភាពគ្រប់គ្រងនិងអភិវឌ្ឍន៍ប្រទេសបានឡើយ។ ក្នុងក្របខ័ណ្ឌនេះហើយបានជាឈ្មោះគណបក្សប្រជាជនកម្ពុជារួមនឹងសមិទ្ធផលទាំងឡាយត្រូវបានចងចាំនៅក្នុងក្រ អៅបេះដូងប្រជាជនកម្ពុជាគ្រប់ៗរូបហើយគណបក្សប្រជាជនកម្ពុជានៅតែជាបក្សតែមួយគត់ដែលមានសមត្ថភាព បទពិសោធន៍ការងារ ធនធានមនុស្ស និងធនធានហិរញ្ញវត្ថុដឹកនាំប្រកបដោយសុខសន្តិភាព និងការអភិវឌ្ឍ និងមានសមត្ថភាពគ្រប់គ្រាន់ដើម្បីទប់ស្កាត់ផែនការក្បត់ជាតិនិងការប៉ុនប៉ងបំផ្លាញកម្ពុជាពីសំណាក់ជនអគតិទាំងឡាយ៕
Source: Kampuchea Thmey Daily
0 Comments