ភ្នំពេញ ៖ ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោ ហ៊ុន សែន បានបង្ហោះឃ្លានៃបទចម្រៀង “ទទាយំឆ្លង” ដែលឃ្លានៃបទចម្រៀងនេះមានអត្ថន័យពាក់ព័ន្ធទៅនិងការឆ្លើយឆ្លងគ្នានៃគូសង្សារមួយគូ តែក៏ត្រូវឃ្លាតគ្នា ហើយពេលសន្យាក៏ពុំបានមក ខាងស្រីរង់ចាំខាងប្រុសនិងសួរថាភ្លេចអូនឬនៅ ? ចំណែកខាងស្រីមិនអាចទៅបានដោយសារតែស្ពានក៏បាក់ទឹកក៏ជ្រៅ ។ ក៏ប៉ុន្តែឃ្លានៃបទចម្រៀងដែល សម្តេចតេជោ ហ៊ុន សែន តែងនៅពេលនេះ គឺមានអត្ថន័យខុសពីបទចម្រៀងនោះ ដោយចង់បញ្ជាក់ថាទោះបីទទាយំឆ្លងយ៉ាងណាក៏ត្រយ៉ងមិនឆ្លើយ និង ដោយសារចិត្តបងខ្មៅ។ ដូចនេះស្ពានក៏បាក់ទឹកក៏ជ្រៅធ្វើម្តេចបានទៅតាមកិច្ចសន្យា។
សំណេរនៃឃ្លាបទចម្រៀងរបស់សម្តេចទាំងស្រុងមានដូចតទៅ៖«ទទាយំឆ្លងត្រយ៉ងបងអើយអត់ឆ្លើយ.(ពីរដង)សង្សារបងអើយដល់ពេលហើយឬនៅ?.។ចិត្តអូនចិត្តដាច់ដោយសារចិត្តបងចិត្តខ្មៅ.(ពីរដង)ស្ពានក៏បាក់ទឹកក៏ជ្រៅធ្វើម្តេចបានទៅតាមកិច្ចសន្យា»។
ចុងក្រោយនៃសំណេរសម្តេចតេជោនាយករដ្ឋមន្ត្រីបានសរសេរថាកវីឆ្នេរសមុទ្រសុំការយោគយល់ពីបងប្អូនជនរួមជាតិ។
បើយោងតាមអត្ថន័យនៃបទចម្រៀងនេះគេអាចយល់បានថាសម្តេចតេជោ ហ៊ុន សែន កំពុងតែចង់ ប្រាប់ទៅមនុស្សម្នាក់ដែលបានសន្យាជាមួយសម្តេច ដោយមានការភ្នាល់គ្នាទៀតផង ហើយជននោះគឺគ្មាន អ្នកណាក្រៅពីទណ្ឌិត សម រង្ស៊ី ដែលកំពុងនិរទេសខ្លួននៅក្រៅប្រទេសនោះទេ។
គេនៅចាំបានថា ទណ្ឌិត សម រង្ស៊ី កាលពីថ្ងៃទី០៩ វិច្ឆិកា ឆ្នាំ២០១៨កន្លងទៅបានប្រកាសតាមបណ្តាញសង្គមFacebook ផ្លូវការរបស់ខ្លួនបបួលសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ភ្នាល់គ្នាលើករណីការដោះលែងលោក កឹម សុខា ហើយការភ្នាល់នេះដាក់ថា «បើសិនមានការដោះលែង កឹម សុខា នៅថ្ងៃទី២៩ ខែធ្នូ ឆ្នាំ២០១៨ ឬយ៉ាងយូរថ្ងៃទី០៣ ខែមីនា ឆ្នាំ២០១៩ខាងមុខនេះ, សម្តេចតេជោនឹងចុះចេញពីតំណែងតែបើមិនមានការដោះលែងទេនោះ សម រង្ស៊ី នឹងត្រូវចូលឲ្យចាប់ខ្លួន»។
បើគិតត្រឹមថ្ងៃទី០៨ ខែកុម្ភៈ ឆ្នាំ២០១៩នេះ នៅសល់រយៈពេលតែ២៣ថ្ងៃទៀតប៉ុណ្ណោះនឹងដល់ពេលកំណត់នៃការភ្នាល់នោះហើយ ដូចនេះទណ្ឌិត សម រង្ស៊ី បើមិនខ្លាចអាម៉ាស់មុខ និង សម្លាប់ជីវិតនយោបាយរបស់ខ្លួនទេនោះ គួរត្រៀមខ្លួនឲ្យវិលចូលស្រុកឲ្យចាប់ខ្លួនដូចការសន្យា ជាមួយសម្តេចតេជោនាយករដ្ឋមន្ត្រីគុកសម្រាប់សម រង្ស៊ី បានត្រៀមរួចជាស្រេចទៅហើយ ។
កាលពីថ្ងៃទី០៩ វិច្ឆិកា ឆ្នាំ២០១៨ បន្ទាប់ពីសម រង្ស៊ី បបួលភ្នាល់សម្តេចតេជោ ហ៊ុន សែន បានអះអាងថា៖ «ខ្ញុំហ៊ានភ្នាល់ជាមួយលោក សម រង្ស៊ី បើសិនមានការដោះលែង កឹម សុខា មែនខ្ញុំ ហ៊ុន សែន សុខចិត្តចុះចេញពីតំណែងតាមការបបួលភ្នាល់របស់ សម រង្ស៊ី, ប៉ុន្តែបើលោក កឹម សុខា មិនត្រូវបានដោះលែងវិញនោះ នៅចន្លោះពីថ្ងៃទី២៩ ខែធ្នូ ឆ្នាំ២០១៨ រហូតដល់ថ្ងៃទី០៣ ខែមីនា ឆ្នាំ២០១៩ទេ, លោក សម រង្ស៊ី ត្រូវហ៊ានចុះចាញ់ទទួលស្គាល់ការភ្នាល់របស់ខ្លួន ដោយចូលមកឲ្យចាប់ខ្លួន ភ្លាមៗបន្ទាប់ពីបញ្ចប់ការភ្នាល់»។
កាលពីថ្ងៃទី០៣ ខែកុម្ភៈ ឆ្នាំ២០១៩ នៅក្នុងពិធីជួបជុំអ្នកគាំទ្រអតីតគណបក្សសង្គ្រោះជាតិ នៅទីក្រុងSeattleសហរដ្ឋអាមេរិកលោក សម រង្ស៊ី បានប្រកាសថានឹងទៅកាន់ប្រទេសកម្ពុជា ដើម្បីចាប់សម្តេចតេជោ ហ៊ុន សែន និងផ្តួលរំលំរបបគ្រប់គ្រងបច្ចុប្បន្ន។
ក៏ប៉ុន្តែអ្នកវិភាគនយោបាយកម្ពុជាហាក់គ្មានជំនឿទៅលើការសន្យារបស់លោក សម រង្ស៊ី នោះទេ។ ព្រោះវាមិនមែនជាលើកទី១សម្រាប់ ទណ្ឌិតរូបនេះទេ ។ តែប្រសិនជាទណ្ឌិតរូបនេះមកមែនក៏ព្រោះតែខ្លាច ចាញ់សម្បថតែប៉ុណ្ណោះ ហើយក៏ដើម្បីតែបន្តជីវិតនយោបាយរបស់ខ្លួនបន្តទៀត ដោយសារថាជីវិតនយោ បាយរបស់ទណ្ឌិត សម រង្ស៊ី អាចនឹងត្រូវបញ្ចប់ដោយសារតែភាពកំសាកញី របស់ខ្លួនធ្វើឲ្យអ្នកគាំទ្របាត់ជំនឿលើការសន្យា៕
Source: Kampuchea Thmey Daily
0 Comments