ភ្នំពេញ ៖ លោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅបានដឹកនាំកម្លាំងរួមមានមន្ត្រីសាលាខណ្ឌ ប្រជាការពារ កងកម្លាំងប្រដាប់អាវុធ ប្រជាពលរដ្ឋព្រមទាំងសិស្សានុសិស្សចុះធ្វើអនាម័យក្នុងនិងជុំវិញបរិវេណវត្តច្បារអំពៅ។
ការធ្វើអនាម័យនេះគឺប្រព្រឹត្តិធ្វើឡើងនៅថ្ងៃទី៩ ខែកុម្ភៈ ហើយក៏មានការចូលរួមពីព្រះសង្ឃដែលគង់ចាំព្រះវស្សាក្នុងវត្តច្បារអំពៅផងដែរ។
យោងតាមប្រសាសន៍លោកចេង មុនីរ៉ា បានបញ្ជាក់ថា ការចុះធ្វើអនាម័យនាថ្ងៃនេះគឺពុំមែនធ្វើឡើងតែនៅវត្តច្បារអំពៅប៉ុណ្ណោះទេដែលជារៀងរាល់ថ្ងៃចុងសប្តាហ៍លោកតែងតែដឹកនាំកម្លាំងចំរុះចុះធ្វើអនាម័យគ្រប់ទីកន្លែងក្នុងមូលដ្ឋានខណ្ឌច្បារអំពៅ។ ហើយនៅថ្ងៃនេះដោយមើលឃើញមានសំរាមនៅជុំវិញនិងក្នុងបរិវេណវត្តច្បារអំពៅ ទើបលោកអភិបាលខណ្ឌបានដឹកនាំកម្លាំងចុះធ្វើអនាម័យតែម្តង។ ម្យ៉ាងទៀតនៅក្នុងបរិវេណវត្តច្បារអំពៅ គឺមានក្មួយៗសិស្សានុសិស្សរៀននៅក្នុងបឋមសិក្សាវត្តច្បារអំពៅមានចំនួនច្រើនខ្លាចមានមេរោគចេញពីសំរាមស្អុយរលួយកើតទៅជាជំងឺឆ្លងមកសិស្សតូចៗ។
ក្នុងឱកាសនោះដែរលោកចេង មុនីរ៉ា ក៏បានសំណូមពរដល់បងប្អូនប្រជាពលរដ្ឋដែលរស់នៅក្បែរវត្តច្បារអំពៅសុំចូលរួមសំអាតអនាម័យទាំងអស់គ្នា។ ពិសេសសូមបញ្ឈប់ជាបន្ទាន់ការយកសំរាមពីក្នុងផ្ទះរបស់ខ្លួនមកបោះចោលតាមរបងវត្ត ដែលនាំឲ្យប៉ះពាល់យ៉ាងធ្ងន់ធ្ងរទៅលើសោភណភាពបរិស្ថានថែមទៀតផង។ សូមចូលរួមលុបបំបាត់ការយកសំរាមបោះចោលតាមដងផ្លូវនិងទីសាធារណៈ ព្រោះជាកន្លែងរស់របស់ប្រជាពលរដ្ឋយើងទាំងអស់គ្នា៕
Source: Kampuchea Thmey Daily
0 Comments