ប៉ោយប៉ែត ៖ ប្រជាពលរដ្ឋជាច្រើននៅក្នុងខេត្តបន្ទាយមានជ័យ ក៏ដូចជានៅទូទាំងប្រទេសកម្ពុជាផងដែរ បានអបអរសាទរយ៉ាងខ្លាំងចំពោះសមិទ្ធផលថ្មីមួយទៀត ដែលបានកើតឡើងនៅតាមខ្សែបន្ទាត់ព្រំដែនកម្ពុជាថៃ ខណៈដែលពួកគាត់បានឃើញស្ពានអន្តរជាតិថ្មី ត្រូវបានកសាងរួចរាល់ជាស្ថាពរហើយនោះ មិនត្រឹមតែប៉ុណ្ណោះ ប្រជាពលរដ្ឋ និងភ្ញៀវជាតិជាច្រើនតែងតែនាំគ្នាធ្វើដំណើរទៅកម្សាន្តនៅលើស្ពាននោះជារៀងរាល់ថ្ងៃ ទៀតផង។
តាមការឲ្យដឹងពីលោកគឹមសុវណ្ណ ប្រធានមន្ទីរសាធារណការ និងដឹកជញ្ជូនខេត្តបន្ទាយមានជ័យបានប្រាប់កម្ពុជាថ្មីតាមទូរស័ព្ទថា ស្ពានអន្តរជាតិស្ទឹងបត់នេះ គឺស្ថិតនៅក្នុងភូមិស្ទឹងបត់ សង្កាត់ផ្សារកណ្តាលក្រុងប៉ោយប៉ែត ខេត្តបន្ទាយមានជ័យ ហើយស្ពានស្ទឹងបត់ថ្មីនេះបានចាប់ផ្ដើមកសាងឡើងកាលពីខែ 8 ឆ្នាំ 2017 មកម្ល៉េះ។
លោកបានបន្តទៀតថា ស្ពាននេះមានប្រវែង 620ម៉ែត្រទទឹង 17ម៉ែត្រឯណោះ ហើយការកសាងស្ពាននេះគឺជាជំនួយឥតចំណងផ្ទាល់របស់ប្រទេសថៃ សម្រាប់អោយរថយន្តធុនធ្ងន់ និងរទេះដឹកទំនិញចេញពីប្រទេសថៃមកកម្ពុជានិងពីកម្ពុជាចូលទៅប្រទេសថៃវិញ។ ចំពោះការដាក់សម្ពោធអោយប្រើប្រាស់នោះ គឺយើងមិនទាន់កំណត់ថ្ងៃបានទេ វាអាស្រ័យទៅលើភាគីខាងថៃជាអ្នកកំណត់ថាតើត្រូវបើកឲ្យដំណើរការស្ពាននេះនាពេលណានោះ។
ដោយឡែក លោកសានស៊ាន ហូអភិបាលនៃគណៈអភិបាលក្រុងប៉ោយប៉ែតបានប្រាប់ឲ្យដឹងកាលពីព្រឹកថ្ងៃទី9 ខែកុម្ភៈ ឆ្នាំ 2019នេះថា ជាការពិតហើយ ការធ្វើស្ពានអន្តរជាតិស្ទឹងបត់ថ្មីនេះ គឺដើម្បីសម្រួលការដឹកជញ្ជូនទំនិញគ្រប់ប្រភេទតាមរថយន្តតូចធំនិងប្រទេសឲ្យមកធ្វើចរាចរនៅលើស្ពានថ្មីនេះវិញ ហើយស្ពានមិត្តភាពកម្ពុជាថៃនៅច្រកទ្វារអន្តរជាតិប៉ោយប៉ែតនោះ គឺសម្រាប់ឲ្យតែភ្ញៀវជាតិអន្តរជាតិធ្វើដំណើរថ្មើរជើងទៅមកតែប៉ុណ្ណោះ ព្រោះអីកន្លងទៅយើងឃើញថាមានការកកស្ទះជាញឹកញាប់នៅលើស្ពានអន្តរជាតិប៉ោយប៉ែតសព្វថ្ងៃនេះ បើទោះជាអាជ្ញាធរជួយសម្រួលឲ្យអោយមានការកកស្ទះយ៉ាងណាក៏ដោយ ក៏វាមិនអាចទប់ស្កាត់ទៅបានដែរ ព្រោះអីទំនិញចូលមកប្រទេសយើងច្រើនហួសពីការស្មាន ហើយម្យ៉ាងទៀតនោះគឺស្ពានអន្តរជាតិប៉ោយប៉ែតរបស់យើងតូចហើយមានការចង្អៀតក្នុងការធ្វើដំណើរទៅមកទើបមានការកកស្ទះជាប្រចាំបែបនេះ។
លោកអភិបាលក្រុងក្នុងនោះលោកបានបន្តទៀតថា ដោយសារតែមានបញ្ហាកកស្ទះបែបនេះហើយទើបប្រមុខរាជរដ្ឋាភិបាលទាំងពីរកម្ពុជានិងថៃ បានឯកភាពគ្នារួចជាស្រេច ហើយកសាងស្ពានអន្តរជាតិស្ទឹងបត់ថ្មី 1 ទៀតដើម្បីសម្រួលដល់ការដឹកជញ្ជូនទំនិញទៅមកឱ្យបានស្រួលនោះ។
លោកអភិបាលក្រុងខាងលើបានបញ្ជាក់ទៀតថា ពិតហើយការកសាងនិងអភិវឌ្ឍន៍ព្រំដែនសន្តិភាពថ្មីរបស់រាជរដ្ឋាភិបាលកម្ពុជាសព្វថ្ងៃនេះ គឺពិតជាមានប្រសិទ្ធភាព ដែលធ្វើអោយប្រជាពលរដ្ឋទាំងពីរប្រទេសមានការសាទរយ៉ាងខ្លាំងបំផុត ជាពិសេសពួកគាត់សប្បាយចិត្តក្នុងការរកស៊ីទទួលទានដោះដូរទំនិញទៅមករវាងប្រជាពលរដ្ឋកម្ពុជា និងប្រជាពលរដ្ឋជាប់ព្រំដែនបានស្រួលទៀតផង។ ដោយឡែកនៅព្រឹកថ្ងៃទី 9 ខែកុម្ភៈ ឆ្នាំ2019នេះ គេសង្កេតឃើញវត្តមានរបស់លោកជាមយៀប ប្រធានគណៈកម្មការទី២ រដ្ឋសភា បានមកត្រួតពិនិត្យស្ថានភាពច្រកទ្វារអន្តរជាតិចំនួន២ គឺច្រកអន្តរជាតិប៉ោយប៉ែត និងច្រកអន្តរជាតិស្ទឹងបត់ថ្មីដែលទើបតែកសាងរួចហើយនោះ៕
Source: Kampuchea Thmey Daily
0 Comments