ភ្នំពេញ ៖ រោងចក្រផលិតម្ជុលដេរមួយខ្នង ស្ថិតនៅក្នុងតំបន់សេដ្ឋកិច្ចពិសេសភ្នំពេញត្រូវបានអគ្គីភ័យឆាបឆេះអស់ទាំងស្រុង ទោះជាមានរថយន្ដពន្លត់អគ្គីភ័យទៅជួយជាង២០គ្រឿងក៏ដោយតែមិនបង្កឲ្យគ្រោះថ្នាក់ដល់មនុស្សឡើយ ព្រោះពេលយប់អត់មានកម្មករធ្វើការដែលករណីនេះបានកើតឡើងកាលពីវេលាម៉ោង២ និង៣០នាទី រំលងអធ្រាត្រឈានចូល ថ្ងៃទី៩ ខែកុម្ភៈ ឆ្នាំ២០១៩នេះស្ថិតក្នុងតំបន់សេដ្ឋកិច្ចពិសេសភ្នំពេញក្នុងភូមិសាស្ដ្រ សង្កាត់ភ្លើងឆេះរទេះខណ្ឌពោធិ៍សែនជ័យ។ រោងចក្រខាងលើនេះមានយីហោ មកូដុ។
តាមប្រភពព័ត៌មានបានឲ្យដឹងថា មុនពេលកើតហេតុ គេឃើញមានផ្សែងហុយចេញពីក្នុងរោងចក្រ រួមជាមួយអណ្ដាតភ្លើងឆេះ ឡើងយ៉ាង សន្ធោសន្ធៅភ្លាមៗតែម្ដងទើបភ្លាមៗនោះ ប្រជាពលរដ្ឋក៏បានរាយការណ៍ទៅសមត្ថកិច្ចហៅរថយន្តពន្លត់អគ្គិភ័យជាច្រើនគ្រឿង មកជួយអន្តរាគមន៍បាញ់ទឹកពន្លត់យ៉ាងញាប់ដៃញាប់ជើង។ ប្រតិបត្តិការនេះប្រើប្រាស់រថយន្ត ពន្លត់អគ្គិភ័យជាង២០គ្រឿង ដោយប្រើទឹកអស់ជាច្រើនស៊ីទែន និងប្រើ រយៈពេលជាង៤ម៉ោង ទើបអាចគ្រប់គ្រង់ស្ថានការណ៍ បានតែគ្រាន់តែមិនឲ្យឆេះរាលដាលប៉ុណ្ណោះឯរោងចក្រនោះបានឆេះខ្ទេចអស់ទៅហើយ ទោះយ៉ាងណាមិនបង្កឲ្យមនុស្សរងរបួសនោះឡើយដោយសាររោងចក្រនេះគ្មានកម្មករធ្វើការវេនយប់ទេ។
សម្ភារៈក្នុងរោងចក្រ គឺត្រូវបានអគ្គិភ័យលេបត្របាក់ អស់ស្ទើរទាំងស្រុង ចំណែកមូលហេតុសមត្ថកិច្ចមិនទាន់បញ្ជាក់ឲ្យដឹងនោះទេតែជំហានដំបូងគេបានដាក់ការសង្ស័យទៅលើទុសេខ្សែភ្លើង៕
Source: Kampuchea Thmey Daily
0 Comments