ភ្នំពេញ ៖ បើទោះបីរដ្ឋបាលខណ្ឌដង្កោ ចេញសេចក្ដីជូនដំណឹង ទៅដល់បងប្អូនប្រជាពលរដ្ឋ ស្ដីពីការតម្រូវឲ្យរុះរើផ្ទាំងផ្សព្វផ្សាយ ពាណិជ្ជកម្ម ស្លាកយីហោ សំយាប និងសម្ភារៈ ដាក់តាំងអនាធិបតេយ្យ និងរំលោភចំណីផ្លូវសាធារណៈ ចំនួន២លើក រួចហើយក្តី ហើយក៏ជិតដល់ថ្ងៃឱសានវាទ ដែលត្រូវអាជ្ញាធរខណ្ឌដង្កោ ចាត់វិធានក្តៅចុះរុះរើ ក៏គេសង្កេតឃើញថា ម្ចាស់មូលដ្ឋាន អាជីវកម្ម សេវាកម្មមួយចំនួន បានធ្វើការរុះរើ និងរៀបចំដាក់ផ្ទាំង ផ្សព្វផ្សាយ ពាណិជ្ជកម្ម ស្លាកយីហោ សំយាប និងសម្ភារៈ ដោយខ្លួនឯង ប៉ុន្តែក៏នៅឃើញមានម្ចាស់ អាជីវកម្ម មួយចំនួនទៀត ពុំទាន់បានអនុវត្តឲ្យបានល្អប្រសើរនៅឡើយដែរ។
សូមបញ្ជាក់ឲ្យដឹងថា យោងតាមសេចក្ដីជូនដំណឹងរបស់រដ្ឋបាលខណ្ឌដង្កោ ចេញថ្ងៃទី២៩ ខែមករា ឆ្នាំ២០១៩ ចុះហត្ថលេខាដោយ លោក នុត ពុធដារ៉ា អភិបាល នៃគណៈអភិបាលខណ្ឌដង្កោ ដែល ទទួលបានឲ្យដឹងថា ក្រោយពីបានធ្វើការប្រជុំណែនាំដល់ អស់លោក លោកស្រី ម្ចាស់មូលដ្ឋាន អាជីវកម្ម សេវាកម្ម និងចេញលិខិតជូនដំណឹង ចំនួន២លើក របស់រដ្ឋបាលខណ្ឌដង្កោ ស្ដីពីការតម្រូវឲ្យរុះរើផ្ទាំងផ្សព្វផ្សាយ ពាណិជ្ជកម្ម ស្លាកយីហោ សំយាប និងសម្ភារៈដាក់តាំងអនាធិបតេយ្យ និងរំលោភចំណីផ្លូវសាធារណៈរួចមក ម្ចាស់មូលដ្ឋាន អាជីវកម្ម សេវាកម្មមួយចំនួន បានធ្វើការរុះរើ និងរៀបចំដាក់ផ្ទាំង ផ្សព្វផ្សាយ ពាណិជ្ជកម្ម ស្លាកយីហោ សំយាប និងសម្ភារៈរបស់ខ្លួនបានល្អប្រសើរ តាមការណែនាំ ប៉ុន្តែទន្ទឹងនឹងនេះ ក៏នៅមានម្ចាស់ អាជីវកម្ម សេវាកម្ម មួយចំនួនទៀត ពុំទាន់បានអនុវត្តនៅឡើយនោះទេ។
ដូច្នេះ ប្រសិនបើម្ចាស់ អាជីវកម្ម សេវាកម្ម មួយណាដែលរឹងទទឹង ពុំទាន់បានអនុវត្តតាមការណែនាំទេ រដ្ឋបាលខណ្ឌដង្កោ នឹងចុះចាត់វិធានការរដ្ឋបាលរុះរើផ្ទាំង ផ្សព្វផ្សាយ ពាណិជ្ជកម្ម ស្លាកយីហោ សំយាប និងសម្ភារៈ ដាក់តាំងអនាធិបតេយ្យ និងរំលោភចំណីផ្លូវសាធារណៈ ដោយអនុវត្តចាប់ថ្ងៃទី១១ ខែកុម្ភៈ ឆ្នាំ២០១៩ តទៅ ដោយមិនទទួលខុសត្រូវលើការខូចខាត ឬ បាត់បង់សម្ភារៈអ្វីឡើយ។
ក្នុងករណីរឹងរូស រដ្ឋបាលខណ្ឌដង្កោ នឹងដាក់ពាក្យបណ្ដឹងទៅកាន់សាលាដំបូង រាជធានីភ្នំពេញ ដើម្បីអនុវត្តតាមនីតិវិធី។
យោងតាមសេចក្ដីជូនដំណឹងនេះ រដ្ឋបាលខណ្ឌដង្កោ សង្ឃឹមថា អស់លោក លោកស្រី ជាម្ចាស់អាជីវកម្ម និងសេវាកម្មទាំងអស់ នឹងចូលរួមអនុវត្តតាមខ្លឹមសារខាងលើ ប្រកបដោយស្មារតីទទួលខុសត្រូវខ្ពស់។
ផ្លូវដែលត្រូវអាជ្ញាធរខណ្ឌដង្កោ នឹងចុះអនុវត្តវិធានការក្តៅ ចាប់ថ្ងៃទី១១ ខែកុម្ភៈ ឆ្នាំ២០១៩ តទៅនេះ គឺផ្លូវលេខ២១៧ ( ហៅ ផ្លូវចម្ការដូង ) ផ្លូវលេខ៣៧១ និងផ្លូវព្រៃស ពីព្រោះថា ផ្លូវទាំង៣ខ្សែ នេះ មានការរំលោភបំពានខ្លាំងជាងគេ រួចហើយនឹងបន្តវិធានការតាមបណ្ដាផ្លូវផ្សេងៗទៀតទូទាំងមូលដ្ឋានខណ្ឌដង្កោ៕
Source: Kampuchea Thmey Daily
0 Comments