ភ្នំពេញ ៖ យុវជនម្នាក់ដេកស្លាប់ក្នុងផ្ទះម្នាក់ឯង សង្ស័យខ្យល់គ ករណីនេះកើតឡើងកាលពីវេលាម៉ោង០៨ និង៣០នាទី នាថ្ងៃទី១៥ ខែកុម្ភៈ ឆ្នាំ២០១៩ នៅចំណុចផ្ទះលេខ១៨៧ ផ្លូវបេតុង ភូមិភ្លូរផ្អែម សង្កាត់គោករកា ខណ្ឌព្រែកព្នៅ រាជធានីភ្នំពេញ។
សពជនរងគ្រោះឈ្មោះ រស់ សិលា ភេទប្រុស អាយុ២៤ឆ្នាំ ជនជាតិខ្មែរ មុខរបរនិស្សិត ស្នាក់នៅផ្ទះលេខ១៨៧ ផ្លូវបេតុង ភូមិភ្លូរផ្អែម សង្កាត់គោករកា ខណ្ឌព្រែកព្នៅ ភ្នំពេញ។ ស្លាក់ស្នាមបន្សល់ទុកស្នាមរយះគល់ចិញ្ចើមខាងស្ដាំចំនួន០១កន្លែង។
ប៉ូលិសមូលដ្ឋានបានឲ្យដឹងថា មុនពេលកើតហេតុ ឈ្មោះខាត់ សុខេត ភេទប្រុស (ត្រូវជាឪពុកមា)បានទូរស័ព្ទ ទៅឈ្មោះរស់ ចរិយា (ត្រូវជាបងស្រីបង្កើតរបស់សពជនរងគ្រោះ)ថាឲ្យទៅមើលឈ្មោះ រស់ សិលា ផង ព្រោះខលទៅមិនលើកទូរស័ព្ទទេ ភ្លាមនោះឈ្មោះខាត់ សុខេត បានចេញដំណើរពីកន្លែងធ្វើការរបស់ខ្លួនក្នុងខណ្ឌពោធិ៍សែនជ័យ ឆ្ពោះទៅផ្ទះជនរងគ្រោះ ពេលទៅដល់ក៏បានអើតមើលតាមទ្វាកញ្ចក់ ក៏ប្រទះឃើញ ឈ្មោះរស់ សិលា បានដេកផ្កាប់មុខ និងមានឈាមប្រឡាក់លើឥដ្ឋការ៉ូ ឃើញដូចនោះឈ្មោះខាត់ សុខេត ក៏បានរាយការណ៍ជូនសមត្ថកិច្ចតែម្ដង។ ដោយមានការឯកភាពពីលោក សឿ ឡង់ឌី ព្រះរាជអាជ្ញារង នៃសាលាដំបូងរាជធានីភ្នំពេញ បានឲ្យសមត្ថកិច្ចប្រគល់សពជនរងគ្រោះទៅក្រុមគ្រួសារសពដើម្បីយកទៅធ្វើបុណ្យតាមប្រពៃណីនៅឯស្រុកកំណើត។
ការសន្និដ្ឋានឆ្លងតាមការពិនិត្យ និងធ្វើកោសល្យវិច័យ របស់ការិយាល័យជំនាញ នៃស្នងការដ្ឋាននគរបាលរាជធានីភ្នំពេញ និងតាមការពិនិត្យរបស់វេជ្ជបណ្ឌិត នង សុវណ្ណរត្ន័ គ្រូពេទ្យបច្ចេកទេសវិទ្យាសាស្ត្រ និង កោសល្យវិច័យ បានឲ្យដឹងថា សពជនរងគ្រោះពិតជាស្លាប់ដោយសារគាំងបេះដូងពិតប្រាកដមែន៕
Source: Kampuchea Thmey Daily
0 Comments