អាជ្ញាធររាជធានី អំពាវនាវអោយបងប្អូនកម្មករ កម្មការិនីរោងចក្រ សូមកុំយកថ្ងៃ១៤កុម្ភៈ ទៅប្រព្រឹត្តិរឿងស្នេហាប្រាសចាកប្រពៃណីវប្បធម៌ខ្មែរ

ភ្នំពេញ ៖ នៅសល់តែប៉ុន្មានថ្ងៃទៀតប៉ុណ្ណោះ ទិវានៃក្តីស្រឡាញ់នឹងចូលមកដល់ គឺថ្ងៃទី១៤កុម្ភៈខាងមុខនេះ ទន្ទឹមនឹងនេះ លោកឃួង ស្រេង សមាជិកគណៈកម្មាធិការកណ្តាល,អនុប្រធានគណបក្សប្រជាជនកម្ពុជារាជធានីភ្នំពេញ និងជាប្រធានគណៈចលនាសហជីពរាជធានីភ្នំពេញ បានធ្វើការអំពាវនាវអោយបងប្អូនកម្មករ.កម្មការិនីតាមរោងចក្រ សូមកុំយកថ្ងៃ១៤កុម្ភៈទៅប្រព្រឹត្តិរឿងស្នេហា ដែលប្រាសចាកប្រពៃណីវប្បធម៌ខ្មែរ។

លោកបន្តថា ៖ រឿងស្នេហាស្រី.ប្រុសជារឿងធម្មជាតិរបស់សត្វលោក តែយើងមិនត្រូវភ្លេចកិត្តិយស និងប្រពៃណីជាតិនោះទេ។ ថ្ងៃនៃក្តីស្រឡាញ់ មិនមែនសំដៅតែទៅលើរឿងស្នេហាស្រី.ប្រុសនោះទេ គឺគេអាចធ្វើចំពោះឪពុកម្តាយ,លោកគ្រូអ្នកគ្រូ,ជីដូនជីតា,មិត្តភក្ដិជាដើមគ្រប់៣៦៥ថ្ងៃ។

លោកអភិបាលមានប្រសាសន៍ដូច្នេះកាលពីព្រឹកថ្ងៃទី១០ ខែកុម្ភៈ ក្នុងឱកាសជួបសំណេះសំណាលជាមួយសមាជិក សមាជិកាសាខាបក្សសហជីពមូលដ្ឋានតាមរោងចក្រក្នុងខណ្ឌ សែនសុខ នៅទីស្នាក់ការគណបក្សប្រជាជនកម្ពុជាខណ្ឌសែន សុខ។

លោក ឃួង ស្រេង ថ្លែងបន្តទៀតថា បងប្អូនកម្មករ.កម្មការិនីយើងមានឪពុកម្នាក់ប្រកបដោយព្រហ្មវិហារធម៌គឺសម្តេចអគ្គមហាសេនាបតីតេជោហ៊ុនសែន ដែលសម្តេចតែងតែបានគិតគូរសុខទុក្ខ និងបំពេញតម្រូវការជូន បងប្អូនកម្មករ.កម្មការិនីយើងគ្រប់ពេលវេលាតាមរយៈកញ្ចប់អត្ថប្រយោជន៍ទាំង ៩ចំណុចធ្វើឲ្យកម្មករ.កម្មការិនីយើងទទួលបានផលប្រយោជន៍រួមទាំងប្រាក់បៀវត្សបានសមរម្យទៀតផង។

លោកបញ្ជាក់ទៀតថា បងប្អូនកម្មករ.កម្មការិនីបើ មានបញ្ហាបន្ទាន់ណាមួយសុំទៅរកស្នាក់ការគណបក្សប្រជាជនកម្ពុជាដែលនៅ ជិតបំផុត ដោយមន្ត្រីគណបក្សរង់ចាំទទួលដោះស្រាយតាមជាក់ស្ដែងជូនភ្លាម។

ក្នុងឱកាសនោះដែរ លោកឃួង ស្រេង ក៏បានអំពាវនាវដល់បងប្អូនកម្មការ.កម្មការិនីយើង សូមកុំជឿទៅតាមការញុះញុងពីក្រុមជនអគតិក្នុងចេតនាបំភ័ន្ត បំភ្លៃការពិតឬការធ្វើកូដកម្ម,បាតុកម្មបំបែកឆ្នាំងបាយខ្លួនឯងនោះ។

ជាមួយគ្នានេះ លោកឃួង ស្រេង ក៏បានណែនាំ ឲ្យមន្ត្រីអាជ្ញាធរភូមិ.សង្កាត់,ខណ្ឌត្រូវចុះទៅដល់កន្លែងស្នាក់នៅរបស់កម្មករ.កម្មការិនី មើលពីតម្រូវការជាក់ស្តែងទឹក,ភ្លើង,សំរាមជាដើម។

អភិបាលខណ្ឌសែនសុខ លោកម៉ូវ ម៉ានិត បានឲ្យដឹងថា នៅក្នុងខណ្ឌសែនសុខមានរោងចក្រចំនួន ៤៨រោងចក្រ,និងសហគ្រាសចំនួន១៩,មានកម្មករ.កម្មការិនីសរុបចំនួន២៩.២៦២ នាក់និងកម្មករស្នាក់នៅផ្ទះជួលចំនួន៣៤.៣២៤នាក់។

គួរបញ្ជាក់ថា ក្នុងឱកាសដ៏ស្និទ្ធស្នាលនេះដែរ លោកឃួង ស្រេង បាននាំយកថវិការបស់សម្តេចអគ្គមហាសេនាបតីតេជោហ៊ុនសែន និងសម្តេចកិត្តិព្រឹទ្ធបណ្ឌិតទៅផ្តល់ជូនបងប្អូនកម្មករ.កម្មការិនីទាំង១១៣៤នាក់ ក្នុងម្នាក់ថវិកា២ម៉ឺនរៀលផងដែរ៕