បន្ទាយមានជ័យ ៖ សិស្សសាលា១ក្រុម មានគ្នា៧នាក់ ក្រោយពីនាំគ្នាលេងបាល់ទាត់រួច ក៏បាននាំគ្នាមកងូតទឹកនៅរណ្ដៅម៉ៃខូ ជម្រៅ៨ម៉ែត្រ ដោយក្មេង៤នាក់ ចុះលេងទឹក ក្មេង៣នាក់ នៅលើគោក អកុសលក្មេងដែលចុះងូតទឹកស្រាប់តែលង់ទឹក សំណាងដែរពេលនោះមានអ្នកបង់ត្រីជួយសង្គ្រោះទាន់ពេលបាន២នាក់ តែ២នាក់ទៀតស្លាប់មិនអាចសង្គ្រោះបាននៅវេលាម៉ោង១១ព្រឹក ថ្ងៃទី១៧ ខែកុម្ភៈ ឆ្នាំ២០១៩ ស្ថិតក្នុងរណ្ដៅម៉ៃខូ ដែលមានជម្រៅ៨ម៉ែត្រ ខាងក្រោយសាលាក្រុងសិរីសោភ័ណ ឆ្ងាយពីផ្ទះជនរងគ្រោះប្រហែល៧០០ម៉ែត្រ ស្ថិតក្នុងភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
លោកវរសេនីយ៍ទោ ស៊ីឌី អធិការក្រុងសិរីសោភ័ណបាននិយាយថា ជនរងគ្រោះ ១.ឈ្មោះ បឿន ស្រីណូ ភេទស្រី អាយុ៩ឆ្នាំ រៀននៅសាលារៀនពង្រ ថ្នាក់ទី៤ក រស់នៅជាមួយ ជីដូនឈ្មោះ អ៊ិន ស៊ីនួន ឪពុកក្មេងស្រីមានឈ្មោះ បិត ប៊ុននី និង ម្តាយ ឈ្មោះ ចេវ សែម ទៅធ្វើការនៅស្រុកថៃ ទាំង២នាក់ ១ឆ្នាំមកម្តង យកលុយមកចិញ្ចឹមគ្រួសារនេះ មានកូនពីរនាក់។ ២.ឈ្មោះ ប៉ុច សុឃីម ភេទស្រី អាយុ១២ឆ្នាំ រស់នៅជាមួយនឹងជីដូនឈ្មោះ ហ៊ា ហ៊ាង អាយុ៦៧ឆ្នាំ និងជីតាឈ្មោះ កែប៉ុច អាយុ៩៦ឆ្នាំ។ ចំណែកឪពុកក្មេងស្រីមាន ឈ្មោះ កែវ ម៉ៅ អាយុ៤១ឆ្នាំ ម្តាយមានឈ្មោះ សៀន សោម អាយុ៤៣ឆ្នាំ គ្រួសារនេះ មានបងប្អូន៤នាក់ ឪពុកម្តាយបានទៅធ្វើការនៅស្រុកថៃ យកលុយមកចិញ្ចឹមកូនដែរ។ ចំណែកក្មេងស្រីដែលជួយសង្គ្រោះបានមាន ១-ឈ្មោះ ស្រីវ៉ន ភេទស្រី អាយុ១០ឆ្នាំ ។ ២-ឈ្មោះ សុភី អាយុ៩ឆ្នាំ ទាំង៤នាក់ រៀននៅសាលារៀនពង្រ រស់នៅក្នុងភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
លោកបានបញ្ជាក់ឲ្យដឹងទៀតថា នៅមុនពេលកើតហេតុនោះ នៅម៉ោង៨ព្រឹក ក្មេងទាំង៧នាក់ បាននាំគ្នាលេងទាត់បាល់នៅក្នុងសាលារៀន ដោយក្មេងទាំង៧នាក់ ជាក្រុមបាល់ទាត់ ប្រចាំសាលាក្រោយពីលេងហើយ ជីដូនក្មេងរងគ្រោះ បានមកហៅចៅទៅស៊ីបាយ តែចៅថា ចាំមកតាមក្រោយពេលនោះដោយសារតែលេងបាល់ទាត់ក្តៅពេក បាននាំគ្នាមកងូតទឹកនៅអាងរណ្ដៅម៉ៃខូ ក្រោយមកដល់កន្លែងងូតទឹក ក្មេងស្រី៣នាក់នៅលើកគោក ចំណែក៤នាក់ នាំគ្នាចុះងូត ដោយសាររណ្ដៅម៉ៃខូគេជីកដូចរន្ធបាយខំ បណ្តាលឲ្យក្មេង២នាក់ធ្លាក់ចូលក្នុងរណ្ដៅជ្រៅ ចំណែក២នាក់ទៀត ក៏លង់ដែរ ស្របពេលនោះមានអ្នកបង់ត្រីជាច្រើននាក់នៅទីនោះដែរ ក៏នាំគ្នាចុះស្រង់ក្មេងទាំង៤នាក់ មកលើគោក ហើយបានបញ្ជូនទៅមន្ទីរពេទ្យដើម្បីជួយសង្គ្រោះ ពេលនោះលោកគ្រូពេទ្យ ជួយសង្គ្រោះបានក្មេងស្រីបាន២នាក់ តែអកុសល២នាក់ទៀត បានស្លាប់បាត់បង់ជីវិតទៅហើយ។
ចំណែកឪពុកម្តាយសពក្មេងស្រីទាំង២នាក់គ្រាន់តែបានឮដំណឹងថាកូនស្លាប់ ម្នាក់យំបោកខ្លួនដូចអកស្ទើរតែគាំងបេះដូងស្លាប់ ហើយបាននាំគ្នាត្រឡប់ពីស្រុកថៃវិញ ដើម្បីចាត់ចែងធ្វើបុណ្យសពកូននៅផ្ទះរៀងខ្លួនតាមប្រពៃណីផងដែរ៕
Source: Kampuchea Thmey Daily
0 Comments