ពោធិ៍សាត់ ៖ ស្ត្រីម្នាក់ ដែលមានប្ដីកូនចំនួន៥នាក់នៅបន្ទុកជាមួយ បានស្រវឹងស្រារាល់ថ្ងៃ រហូតប៉ះពាល់ផ្លូវចិត្ត ទាញកូនកាំបិតមុតចុងស្រួចចាក់ពោះខ្លួនឯង ប៉ងធ្វើអត្តឃាត តែមិនបានសម្រេចគ្រាន់តែរបួសធ្ងន់ ត្រូវបានប្ដីនៅក្បែរយកទៅសង្គ្រោះ។
ហេតុការណ៍នេះ កើតឡើងកាលពីវេលាម៉ោង៨និង៣០នាទីយប់ ថ្ងៃទី៦ ខែកុម្ភៈ ឆ្នាំ២០១៩ ត្រង់ចំណុចចម្ការជាប់ជើងភ្នំក្បែរ(ផ្ទះរបស់ខ្លួន) ស្ថិតក្នុងភូមិក្សេត្របូរី ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់។
នគរបាលមូលដ្ឋានទីនោះ ប្រាប់ថា ជនរងគ្រោះ ឈ្មោះ ឡូញ ច្រឹប អាយុ៣៩ឆ្នាំ រស់នៅជាមួយប្ដីនិងកូន គ្រួសារ ភូមិកើតហេតុខាងលើ។
បើតាមនគរបាលប៉ុស្តិ៍មូលដ្ឋានទីនោះទទួលពីសាក្សីបំភ្លឺដែលឃើញរឿងនេះនិយាយថា ស្ត្រីចាក់ខ្លួនឯងនេះ គឺគាត់ផឹកស្រាស្រវឹងអួទីនួរាល់ថ្ងៃ រហូតឡប់សតិម្ដងៗ ហើយមុនពេលកើតហេតុខាងលើ ជនរងគ្រោះ បានមកពីផឹកស្រាស្រវឹងជោក ហើយចូលផ្ទះរបស់គាត់ ដោយប្ដី និងកូន ក៏នៅផ្ទះនោះដែរ។ ស្រាប់តែមួយសន្ទុះ ស្ត្រីនោះទំនងជាកំរោលចូល ដោយសារធាតុស្រាផង ឡប់សតិបានទៅយកកូនកាំបិតតូចមុតចុងស្រួច ចាក់អត្តឃាតខ្លួនឯងចំត្រង់ពោះ លិចដល់ដងកាំបិត បណ្ដាលឲ្យរបួសធ្ងន់មួយកាំបិត។ ភ្លាមៗនោះ ប្ដីស្ត្រីនោះ ឃើញ ក៏បានស្ទុះទៅជួយសង្គ្រោះនៅមណ្ឌលសុខភាពស្រុកភ្នំក្រវាញ តែស្ថានភាពធ្ងន់ធ្ងរពេក ក៏បានបញ្ជូនមកមន្ទីរពេទ្យសុខភាពខេត្តពោធិ៍សាត់ ហើយត្រូវបានក្រុមគ្រូពេទ្យជំនាញៗជួយសង្គ្រោះដោយយកចិត្តទុកដាក់ ស្ត្រីនោះ ក៏ឆ្លងផុតពីអាយុជីវិតតែម្ដង៕
Source: Kampuchea Thmey Daily
0 Comments