ភ្នំពេញ ៖ ក្រសួងវប្បធម៌ និងវិចិត្រសិល្បៈបានរៀបចំមហោស្រពសិល្បៈយុវជនទូទាំងប្រទេស ឆ្នាំទី៥ ដើម្បីអបអរសាទរទិវាវប្បធម៌ជាតិ៣មីនា លើកទី២១នាពេលខាងមុខនេះក្រោមអធិបតីភាពលោក សំរាំង កម្សាន្ត រដ្ឋលេខាធិការក្រសួងវប្បធម៌ និងវិចិត្រសិល្បៈ។
ថ្លែងក្នុងសន្និសីទសារព័ត៌មានស្តីពីដំណើរឆ្ពោះទៅមហោស្រពសិល្បៈយុវជនទូទាំងប្រទេស ឆ្នាំទី៥ ដើម្បីអបអរសាទរទិវាវប្បធម៌ជាតិ៣មីនា លើកទី២១នៅទីស្តីការក្រសួងវប្បធម៌ និងវិចិត្រសិល្បៈកាលពីថ្ងៃទី១៥ ខែកុម្ភៈឆ្នាំ២០១៩ លោក សំរាំង កម្សាន្តបានមានប្រសាសន៍ថាការរៀបចំមហោសិល្បៈយុវជនទូទាំងប្រទេស គឺក្រសួងតែងតែប្រារព្ធធ្វើឡើងជារៀងរាល់ឆ្នាំក្នុងគោលបំណងដើម្បីលើកស្ទួយការអបរំ និងផ្សព្វ ផ្សាយអំពីចំណេះដឹងសិល្បៈវប្បធម៌ ក្នុងបុព្វហេតុជំរុញការចូលរួមថែររក្សា អភិរក្ស និងអភិវឌ្ឍន៍វប្បធម៌ជាតិ ប្រកបដោយខ្លឹមសារអភិរក្ស អភិវឌ្ឍន៍ ការអប់រំយុវជន និងសីលធម៌សង្គម។
លោក សំរាំង កម្សាន្តបានឲ្យដឹងទៀតថា នៅក្នុងមហោស្រពនេះយុវជនកម្ពុជាត្រូវបានលើកទឹកចិត្ត តាមរយៈឲ្យពួកគេចូលរួមបង្កើតស្នាដៃសិល្បៈដែលបង្ហាញពីអត្តសញ្ញាណជាតិខ្មែរលើការតែងនិពន្ធ ការសម្តែងសិល្បៈ របាំ តន្ត្រី និងផ្សព្វផ្សាយសិល្បៈទស្សនីយភាពខ្មែរ ជាដើម។
លោកឡុង ប៉ុណ្ណាស៊ីរីវត្ថ អគ្គនាយករដ្ឋបាល និងហិរញ្ញវត្ថុនៃក្រសួងវប្បធម៌និងវិចិត្រសិល្បៈ បានឲ្យដឹងថា ការបង្កើតឲ្យមានការសម្តែងនេះ ក៏ជាការបណ្តុះស្មារតីឲ្យយុវជន និងមហាជនស្រលាញ់មរតកសិល្បៈវប្បធម៌ខ្មែរ ពិសេសជំរុញការផលិត និងរកទីផ្សារវប្បធម៌ឲ្យកាន់តែទូលំទូលាយ។
លោកបានបន្តទៀតថា ការរៀបចំព្រឹត្តិការណ៍សិល្បៈវប្បធម៌ អាចរួមវិភាគទានដោយផ្ទាល់ដល់ការងារអភិរក្ស និងការអភិវឌ្ឍវិស័យសិល្បៈវប្បធម៌ជាតិ ពិសេសដើម្បីឲ្យយុវជនមានឱកាសបញ្ចេញនូវសមត្ថភាព និងទេពកោសល្យពិតៗរបស់ខ្លួនអំពីផលិតផលវប្បធម៌ខ្មែរដ៏សម្បូណ៌បែប
លោករដ្ឋលេខាធិការក្រសួងវប្បធម៌និងវិចិត្រសិល្បៈបានលើកទឹកចិត្តដល់យុវជនឲ្យចូលរួមថែរក្សា និងអភិវឌ្ឍន៍វប្បធម៌ជាតិ ខណៈពួកគេកំពុងប្រឈមនឹងការស្រូបយកឥទ្ធិពលនៃការហូរចូលវប្បធម៌បរទេស។
គួរបញ្ជាក់ថា មហោស្រពសិល្បៈយុវជនទូទាំងប្រទេសឆ្នាំនេះ ធ្វើឡើងក្រោមប្រធានបទ«យុវជន ដើម្បីវប្បធម៌ជាតិ» បន្ទាប់ពីកើតឡើងនៅឆ្នាំ២០១៥ តាមប្រសាសន៍ណែនាំ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា ដែលជំរុញឲ្យមានព្រឹត្តិការណ៍ប្រចាំឆ្នាំ។
មន្ត្រីជាន់ខ្ពស់ក្រសួងវប្បធម៌ និងវិចិត្រសិល្បៈ ដដែលបានឲ្យដឹងថា មហោស្រពសិល្បៈយុវជនទូទាំងប្រទេស ដែលនឹងចាប់ផ្តើមនៅសាលសន្និសីទចតុមុខនៅដើមសប្តាហ៍ក្រោយនេះ ត្រូវបានសម្រិតសម្រាំងយកស្នាដៃយុវជនចំនួន៤៦ក្រុម ដែលមានផ្នែករបាំប្រពៃណីខ្មែរ របាំសហសម័យខ្មែរ និងឈុតល្ខោនដើម្បីចូលរួមអបអរសាទរទិវាវប្បធម៌ជាតិ៣មីនា លើកទី២១ ក្រោមអធិបតីភាពសម្តេចតេជោ ហ៊ុន សែន នៅថ្ងៃទី៦ ខែមីនាខាងមុខនេះ នាសាលមហោស្រពកោះពេជ្រ៕
Source: Kampuchea Thmey Daily
0 Comments