ក្រុមតាលីបង់បានចាប់ផ្តើមជំនួបដ៏ចម្លែកមួយជាមួយអ្នកនយោបាយជាន់ខ្ពស់របស់អាហ្វហ្គានីស្ថានរួមទាំងស្ត្រីផងដែរ កាលពីថ្ងៃអង្គារ នៅក្នុងទីក្រុងមូស្គូដែលជាកន្លែងគូប្រជែងរបស់លោកប្រធានាធិបតី Ashraf Ghani បានអំពាវនាវឲ្យមានរដ្ឋាភិបាលបណ្តោះអាសន្នមួយខណៈពួកគេបានចរចាដោយគ្មានគាត់។
ក្នុងការប្រមូលផ្តុំគ្នាដែលមិនធ្លាប់មានពីមុនមកមួយនេះ ក្រុមតាលីបង់បានគូសបញ្ជាក់អំពីចក្ខុវិស័យរបស់ពួកគេចំពោះប្រទេសអាហ្វហ្គានីស្ថានរួមទាំងច្បាប់លើស្ត្រីនិងការអនុម័តរដ្ឋធម្មនុញ្ញឥស្លាមមួយផងដែរ។
ក្រុមតាលីបង់បានដឹកនាំការអធិស្ឋានហើយបានចូលរួមពិសាអាហារពេលល្ងាចជាមួយមេដឹកនាំមុនពេលពួកគេបើកកិច្ចពិភាក្សាជាមួយអ្នកនយោបាយអាហ្វហ្គានីស្ថាន។
កិច្ចពិភាក្សានេះបានកើតឡើងមួយសប្តាហ៍បន្ទាប់ពីក្រុមបះបោរបានធ្វើកិច្ចចរចាជាមួយអ្នកចរចាអាមេរិកនៅក្នុងទីក្រុងដូហាអំពីការបញ្ចប់សង្គ្រាមរយៈពេល១៧ឆ្នាំ។
លោក Ghani បានប្រាប់ទូរទស្សន៍អាហ្វហ្គានីស្ថាន TOLOnews កាលពីល្ងាចថ្ងៃអង្គារថា “កិច្ចប្រជុំនៅក្នុងប្រទេសរុស្ស៊ីគឺគ្មានអ្វីលើសពីការសុបិននោះទេ។ គ្មាននរណាម្នាក់អាចសម្រេចចិត្តដោយគ្មានការយល់ព្រមពីប្រជាជនអាហ្វហ្គានីស្ថានឡើយ។ អ្នកដែលបានប្រមូលផ្តុំនៅក្នុងទីក្រុងមូស្គូគឺមិនមានអំណាចប្រតិបត្តិទេ។ ពួកគេអាចនិយាយអ្វីដែលពួកគេចង់និយាយ”។
ប៉ុន្តែគូប្រជែងធំៗជាច្រើនរបស់គាត់រួមទាំងអ្នកដែលនឹងប្រជែងការបោះឆ្នោតប្រធានាធិបតេយ្យមួយចំនួនក្នុងខែកក្កដាផងដែរនោះគឺមានវត្តមាននៅក្នុងរដ្ឋធានីរុស្ស៊ីហើយអ្នកខ្លះបានអំពាវនាវឲ្យបង្កើតរដ្ឋាភិបាលបណ្តោះអាសន្នមួយដែលរួមបញ្ចូលទាំងពួកតាលីបង់ផងដែរ។
សន្និសីទនេះដែលត្រូវបានរៀបចំឡើងដោយក្រុមជ្វីហ្វអាហ្វហ្គានីស្ថានគឺត្រូវបានស្វាគមន៍ថា “មានប្រយោជន៍” ដោយរដ្ឋមន្ត្រីការបរទេសរុស្ស៊ីលោក Sergei Lavrov នៅក្នុងសេចក្តីថ្លែងការណ៍មួយ។
ក្រុមតាលីបង់ដែលគ្រប់គ្រងប្រទេសអាហ្វហ្គានីស្ថានក្រោមច្បាប់ Sharia ដ៏សាហាវព្រៃផ្សៃចន្លោះឆ្នាំ១៩៩៦ដល់ឆ្នាំ២០០១បាននិយាយថា ពួកគេមិនចង់បានអំណាចផ្ដាច់មុខទេប៉ុន្តែចង់បានប្រព័ន្ធឥស្លាមរួមមួយ៕ AFP
Source: Kampuchea Thmey Daily
0 Comments