ភ្នំពេញ ៖ អ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន នៅថ្ងៃទី០៧ ខែកុម្ភៈ ឆ្នាំ២០១៩នេះ បានចេញសេចក្តីថ្លែងការណ៍មួយ បង្ហាញពីការគាំទ្រចំពោះការប្តេជ្ញាចិត្តរបស់សម្តេចអគ្គមហាសេនាបតីតេជោ ហ៊ុន សែន ដែលបានប្រកាសធានាមិនឲ្យមានសង្គ្រាមជាថ្មី នៅលើដែនដីកម្ពុជា និងបានចាត់ទុក ការប្តេជ្ញាចិត្តនេះ ថាជាឧត្តមគតិជាតិពិត និងជាសេចក្តីចង់បានបំផុត របស់ប្រជាពលរដ្ឋខ្មែរទាំងអស់គ្នា។
សេចក្តីថ្លែងការណ៍បានលើកឡើងថា ការិយាល័យអ្នកនាំពាក្យ សូមសម្តែងនូវអំណរសាទរ និងក្តីគោរពដ៏ជ្រាលជ្រៅបំផុតចំពោះ សមត្ថកិច្ចគ្រប់ជាន់ថ្នាក់ ដែលបានប្តេជ្ញាជាឱឡារិក ក្នុងកិច្ចអនុវត្តន៍នូវកាតព្វកិច្ចរបស់ខ្លួន ក្នុងកាគាំទ្រ និងការពារប្រជាពលរដ្ឋខ្មែរ ដែលជាម្ចាស់វាសនា នៃប្រទេសជាតិរបស់ខ្លួន ហើយអំណាចទាំងអស់ ជារបស់ប្រជាពលរដ្ឋ ដែលលោកបានអនុវត្តន៍សិទ្ធិរបស់ខ្លួនរួចមកហើយ តាមរយៈការបោះឆ្នោតសាកស និងលទ្ធផលចេញពីប្រអប់ឆ្នោត កាលពីថ្ងៃទី២៧ កក្កដា ឆ្នាំ២០១៨ ក៏ដូចជាសេចក្តីរីករាយ សុខក្សេមក្សាន្តរបស់មហាជនទាំងមូល ដែលមានស្រាប់ក្នុងពេលបច្ចុប្បន្ន។
ការិយាល័យអ្នកនាំពាក្យ ក៏បានថ្លែងអំណរគុណសាជាថ្មី ចំពោះជនរួមជាតិទាំងអស់ ដែលបានជ្រើសយក សម្តេចតេជោ ហ៊ុន សែន ជានាយករដ្ឋមន្ត្រី តាមរយៈគណបក្សប្រជាជនកម្ពុជា ជាទីទុកចិត្តលើសមត្ថភាពដឹកនាំ និងស្មោះត្រង់បំផុត របស់សម្តេចចំពោះជាតិ សាសនា ព្រះមហាក្សត្រ ព្រមទាំងចូលរួមយ៉ាងក្លៀវក្លាជាមួយ សម្តេចតេជោ ក្នុងការថែរក្សាសន្តិភាព ស្ថិរភាពនយោបាយ និងរួមចំណែកកសាងប្រទេសជាតិ កាន់តែរីកចម្រើនទៅមុខទៀត សមដូចប្រសាសន៍សម្តេចតេជោ បានលើកឡើងថា “យើងទាំងអស់គ្នាបានខិតខំប្រឹងប្រែង និងធ្វើពលិកម្មខ្លាំងណាស់ ហើយក៏គ្មាននរណានឹងជំនួសយើងទេ បើយើងមិនប្រឹងដោយខ្លួនឯង”។
ការិយាល័យអ្នកនាំពាក្យ បានសម្តែងនូវមោទនភាព និងសេចក្តីគោរពបំផុត ក្នុងកិច្ចប្ដេជ្ញាចិត្តរបស់សម្តេចតេជោ ដែលលោកបានលើកឡើងថា “នៅក្រោមការដឹកនាំរបស់ខ្ញុំ គឺដាច់ខាតមិនឱ្យកម្ពុជាវិលទៅរកសង្គ្រាម វិនាសកម្មសារជាថ្មីឡើយ ទោះបីក្នុងរូបភាពណាក៏ដោយ” ដែលនេះជាឧត្តមគតិជាតិពិត និងជាសេចក្តីចង់បានបំផុត របស់ប្រជាពលរដ្ឋខ្មែរទាំងអស់គ្នា។
ជាមួយគ្នានោះ ការិយាល័យអ្នកនាំពាក្យរាជរដ្ឋាភិបាល បានរំលឹកសាជាថ្មីថា សន្តិភាព ស្ថិរភាពនយោបាយ នីត្យានុកូលភាព ប្រក្រតីភាព សណ្ដាប់ធ្នាប់ និងសន្តិសុខសាធារណៈ គឺជាកាតព្វកិច្ចរបស់រាជរដ្ឋាភិបាលក្នុងកិច្ចការពារ និងធានា ដែលមិនអនុញ្ញាតឱ្យបុគ្គល ឬក្រុមណា បៀតបៀនបានឡើយ។
សូមបញ្ជាក់ថា កាលពីថ្ងៃពុធ ទី០៦ ខែកុម្ភៈ ឆ្នាំ២០១៩ សម្តេចតេជោ ហ៊ុន សែន បានប្តេជ្ញាចិត្តជាថ្មី ក្នុងការធានារក្សាឲ្យបាននូវសុខសន្តិភាព ដែលកំពុងគ្រប់ដណ្តប់ទូទាំងផ្ទៃប្រទេសកម្ពុជា នាពេលបច្ចុប្បន្ន ដោយមិនអនុញ្ញាតឲ្យសង្គ្រាម វិនាសកម្មបំផ្លាញប្រទេស បំផ្លាញក្តីសុខប្រជាពលរដ្ឋ កើតមានជាថ្មីនោះឡើយ៕
Source: Kampuchea Thmey Daily
0 Comments