តាកែវ ៖ ស្ត្រីរងគ្រោះ ដែលមានកូនខ្ចីម្នាក់ ត្រូវបានស្ត្រី២នាក់បងប្អូននាំគ្នាមកព្រួតវាយដោយពុំដឹងមូលហេតុ ខណៈកំពុងដេកបំបៅដោះកូននៅលើគ្រែ មុខផ្ទះរបស់ខ្លួន។
ហេតុការណ៍បង្កហិង្សាដាក់ស្ត្រីកូនខ្ចីនេះ បានកើតឡើងនៅថ្ងៃទី០៧ ខែកុម្ភៈ ឆ្នាំ២០១៩ វេលាម៉ោង១៤និង០៥នាទីរសៀល ស្ថិតនៅផ្ទះជួលជនរងគ្រោះក្នុងភូមិស្នោ សង្កាត់រកាក្នុង ក្រុងដូនកែវ ខេត្តតាកែវ។
តាមការរៀបរាប់ពីស្ត្រីរងគ្រោះបានប្រាប់ឲ្យដឹងថា រូបគាត់មាន ឈ្មោះ ទាត់ តុលា អាយុ២៧ឆ្នាំ មានស្រុកកំណើតនៅ ភូមិពោធិ៍ម្អម ឃុំត្នោត ស្រុកកំពង់រោទិ៍ ខេត្តស្វាយរៀង សព្វថ្ងៃមកជួលផ្ទះគេលក់ដូរជាមួយនឹងប្តីនៅភូមិស្នោ សង្កាត់រកា ក្នុងក្រុងដូនកែវ ខេត្តតាកែវ។
ស្ត្រីរងគ្រោះបានបន្តថា នៅវេលាម៉ោងកើតហេតុខាងលើ ដោយប្តីរបស់គាត់ចេញទៅធ្វើការបាត់ រូបគាត់ត្រូវបានស្ត្រី២នាក់បងប្អូនដែលមាន ឈ្មោះ គ្រុយ អូន ភេទស្រី និង ឈ្មោះ ឡៃ ភេទស្រី បាននាំគ្នាជិះម៉ូតូមកព្រួតវាយ ដោយពុំដឹងមូលហេតុ ខណៈដែលគាត់កំពុងដេកបំបៅដោះកូននៅលើគ្រែមុខតូបលក់ដូររបស់ខ្លួន។ ហើយសកម្មភាពដែលស្ត្រី២នាក់វាយនោះ គឺ យកស្បែកជើងកែងចោទវាយលើក្បាលជាច្រើនស្បែកជើង និងទាត់ធាក់ផងដែរ។
ក្រោយកើតហេតុ រូបគាត់បានដាក់ពាក្យបណ្ដឹងនៅប៉ុស្តិ៍រដ្ឋបាលនគរបាលរកាក្នុង ទៅលើស្ត្រីទាំង២នាក់នេះហើយ ពីបទបង្កហិង្សាដោយចេតនា និងសូមឲ្យសមត្ថកិច្ចមេត្តាចាត់ការពួកគាត់តាមនីតិវិធីផងចុះ៕
Source: Kampuchea Thmey Daily
0 Comments