ភ្នំពេញ ៖ យុវជន២នាក់ បានធ្វើសកម្មភាពឆក់ទូរស័ព្ទដៃមួយគ្រឿងម៉ាក6 plus បានសម្រេចពីយុវតីម្នាក់នៅវេលាម៉ោង១និង២០នាទី ថ្ងៃទី៨ ខែកុម្ភៈ ឆ្នាំ២០១៩ ស្ថិតនៅតាមបណ្ដោយផ្លូវវែងស្រេង ភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។
បើតាមការអោយដឹងពីលោកឯម ភារីជា នាយប៉ុស្តិ៍ស្ទឹងមានជ័យ៣បានអោយដឹងថា មុនពេលកើតហេតុយុវតី ដែលជាសិស្សសាលា២នាក់បងប្អូនបង្កើតជិះម៉ូតូzoomer xមួយគ្រឿងចេញពីផ្ទះក្នុងគោលបំណងទៅសាលារៀន តាមបណ្ដោយផ្លូវវែងស្រេង ម្តុំលូ៥ ក៏លេចមុខជនសង្ស័យ២នាក់ជិះម៉ូតូសេ១២៥ ស៊េរីឆ្នាំ២០១៧ បានមកធ្វើសកម្មភាពឆក់យកទូរស័ព្ទដៃពីយុវតីបានសម្រេចតែសំណាងមិនល្អបានជិះទៅបុកគូថរថយន្តមួយគ្រឿងបណ្តាលឱ្យដួល រួចរត់គេចចោលម៉ូតូប្រហែល៣០០ម៉ែត្រ ត្រូវបានកម្លាំងនគរបាល ប៉ុស្តិ៍ស្ទឹងមានជ័យ៣ឈរជើងក្បែរស្តុបនោះស្រាប់បានដេញចាប់បានក្រោយកុងស៊ីកាប់ជ្រូកលូប្រាំទាំង២នាក់តែម្តង។ ក្រោយកើតហេតុឪពុកបង្កើតរបស់យុវតីរងគ្រោះ បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសង្កាត់ស្ទឹងមានជ័យទី៣។
ជនសង្ស័យទាំង២នាក់ទី១ ៖ មានឈ្មោះជិនរតនា អាយុ១៩ឆ្នាំ មុខរបរមិនពិតប្រាកដ និងជនសង្ស័យ ទី២មានឈ្មោះអ៊ី ឈិ អាយុ១៨ឆ្នាំ មុខរបរមិនពិតប្រាកដ។
បច្ចុប្បន្នជនសង្ស័យទាំង២នាក់ ត្រូវបានបញ្ជូនទៅឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌមានជ័យដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធី៕
Source: Kampuchea Thmey Daily
0 Comments