ពោធិ៍សាត់ ៖ គ្រាប់អាវុធយុទ្ធភណ្ឌមិនទាន់ផ្ទុះ ដែលរាយប៉ាយតាមព្រៃ នៅសេសសល់ពីអតីតនាសម័យសង្គ្រាម ត្រូវបានសមត្ថកិច្ចនគរបាលស្រុក សហការជាមួយអង្គការដោះមីនកម្ពុជា បន្តប្រមូលដុតកម្ទេចចោល បន្ទាប់ពីពលរដ្ឋប្រទះឃើញ រាយការណ៍សមត្ថកិច្ចឲ្យចុះប្រមូលយកទុកបណ្ដោះអាសន្នរួចមក។
ការដុតគ្រាប់អាវុធយុទ្ធភណ្ឌមិនទាន់ផ្ទុះនេះ បានធ្វើឡើងនៅវេលាម៉ោង៣និង១៥នាទីរសៀលថ្ងៃទី៧ ខែកុម្ភៈ ឆ្នាំ២០១៩ ត្រង់ចំណុចព្រៃសហគមន៍ភ្នំទំព័រ ក្នុងភូមិទំព័រ ឃុំប្រម៉ោយ ស្រុកវាលវែងខេត្តពោធិ៍សាត់។
តាមលោកឈាន ឆោម អធិការរងនគរបាលស្រុកវាលវែង បានឲ្យដឹងថា គ្រាប់សល់ពីសង្គ្រាម ដែលពលរដ្ឋប្រទះឃើញតាមព្រៃនេះ គឺជាប្រភេទគ្រាប់ប្រភេទ (M47 ចំនួន54គ្រាប់) ត្រូវបានសមត្ថកិច្ចយើងសហការជាមួយមន្ត្រី អង្គការដោះមីនកម្ពុជា ធ្វើការដុតកម្ទេចចោល ដោយជោគជ័យ។ លោកអធិការរងបន្តថា អាវុធយុទ្ធភណ្ឌគ្រប់ប្រភេទមិនទាន់ផ្ទុះ ដែលនៅសេសសល់នាសម័យសង្គ្រាមក្នុងទឹកដីស្រុកវាលវែងនេះ គឺមានច្រើនណាស់ ហើយនេះក៏មិនដុតលើកទីមួយដែរ ខាងអង្គការដោះមីនកម្ពុជា បានដុតបំផ្លាញចោលដោយជោគជ័យច្រើនលើកមកហើយ ហើយរាប់សិបតោនគ្រាប់ឯណោះ។
លោកឈាន ឆោម បានបញ្ជាក់ថា បច្ចុប្បន្នគ្រាប់អាវុធយុទ្ធភណ្ឌមិនផ្ទុះសល់ពីអតីតសង្គ្រាមពេលនេះ គឺមានការថយចុះយ៉ាងច្រើន ហើយកាត់បន្ថយហានិភ័យដល់ពលរដ្ឋនៅតំបន់នេះធូរស្រាលជាងមុន ដោយសារតែ ខាងអង្គការដោះមីនផង សមត្ថកិច្ចយើង និងប្រជាពលរដ្ឋ បានជួយសហការ ពេលប្រទះឃើញ នៅក្នុងព្រៃនិងតាមព្រៃបោះ រាយការណ៍ជូនសមត្ថកិច្ចយើងឲ្យចុះទៅប្រមូលទុកដើម្បីរាយការណ៍ទៅមន្ត្រអង្គការដោះមីនសហការគ្នាដុតកម្ទេចចោល ហើយក៏សូមអរគុណដល់ពលរដ្ឋ និងសូមបន្តសហការជាមួយសមត្ថកិច្ចយើង និងអង្គការដោះមីនកម្ពុជាទៀត ដើម្បីសុវត្ថិភាពដល់អ្នកស្រុកវាលវែងយើង ឬសត្វគោក្របីជួបគ្រោះថ្នាក់នូវអាវុធយុទ្ធភណ្ឌមិនទាន់ផ្ទុះនេះតទៅទៀត៕
Source: Kampuchea Thmey Daily
0 Comments